ԱՇԽԱՏԵԼ ՍԵՓԱԿԱՆ ԵՐԻՏԱՍԱՐԴՆԵՐԻ ՀԵՏ

ԱՇԽԱՏԵԼ ՍԵՓԱԿԱՆ ԵՐԻՏԱՍԱՐԴՆԵՐԻ ՀԵՏ

Գործող չեմպիոն ՙՈւլիսը՚ սեփական հարկի տակ 1:1 հաշվով ավարտեց ՙՇիրակի՚ հետ հանդիպումը: ՙԲանանցը՚ սեփական հարկի տակ 0:1 հաշվով զիջեց ՙԳանձասարին՚, իսկ ՙԻմպուլսը՚ 3:0 հաշվով հաղթեց ՙՓյունիկին՚:
ՙԱրարատ՚-ՙՄիկա՚ խաղից հետո հյուրերի գլխավոր մարզչի պաշտոնակատար ԺՈԼՏ ՀՈՌՆՅԱԿԸ մասնավորապես նշեց. ՙԳիտեինք, որ մեզ համար այսօր դժվար է լինելու, քանի որ խաղադաշտն այստեղ այնքան էլ լավ վիճակում չէ եւ ծայրահեղ անհարմար էր այն ֆուտբոլի համար, որը ցուցադրում է իմ թիմը: Իմ ֆուտբոլիստները կարող էին ավելի շատ գոլ խփել, բայց, ամեն դեպքում, ցանկանում եմ նրանց շնորհակալություն հայտնել` լավ խաղի եւ արդյունքի համար՚: Նա նաեւ նշեց, որ Ալեքսը եւ Աղվանը փորձառու ֆուտբոլիստներ են եւ գործնականում կարող են խաղալ ցանկացած դիրքում: Կարեւոր է նաեւ այն, որ նրանք օգնում են իրենց երիտասարդ խաղընկերներին, եւ դրանով իրենք, որպես թիմ, ավելի ուժեղ են:
Մենք մի քանի հարց ուղղեցինք սլովակ մասնագետին:
- Ի±նչ վիճակում ընդունեցիք թիմը, եւ հիմա ի±նչ վիճակում է: Շատերի կարծիքով` առաջընթացն ակնհայտ է, թիմն ավելի լավ է խաղում, առաջատար է:
- Ամենամեծ խնդիրն այն էր, որ շատ խաղացողներ հեռացան թիմից: Մեր նպատակն էր ստեղծել ագրեսիվ ֆուտբոլ դավանող թիմ, այսինքն` ֆուտբոլիստները պետք է շատ շարժվեն, մամլիչ ոճով գրոհեն մրցակցի վրա, խլեն գնդակը եւ անմիջապես սկսեն հակահարձակումը: Սկսեցինք այդպես խաղալ, ու դեռեւս ստացվում է:
- Վերջին խաղերին դիպուկությամբ աչքի է ընկնում երիտասարդ Ռաֆայել Ղազարյանը, սկսում են կայուն խաղ ցուցադրել Սեմյոն Մուրադյանը, Արեգ Ազատյանը...  
- Ուզում եմ շնորհակալություն հայտնել փորձառու ֆուտբոլիստներ Աղվան Մկրտչյանին, Արմեն Պետրոսյանին, Գոռ Պողոսյանին, եւ, վերջապես, դարպասապահ Գեւորգ Կասպարովին, ովքեր, այսպես ասած, պահում են թիմը: Ու լավ է, որ ավելացան երիտասարդ խաղացողներ: Ես կարեւորում եմ ֆիզիկական լավ պատրաստվածությունը, շատ շարժումը, եւ խաղացողները հասկացել են, թե ինչ ենք իրենցից ուզում, ու խաղադաշտում անում են այն, ինչ պետք է անեն: Երիտասարդ եզրային խաղացողներ եկան, արագություն ավելացրեցին թիմի խաղին, պայքարում են թիմի համար, եւ այդ ամենը` մեծ տարիքի խաղացողների փորձն ու երիտասարդների արագությունը, շարժումը, տալիս են իրենց արդյունքը: Ռաֆայել Ղազարյանը ամենալավ հեռանկարային խաղացողներից մեկն է: Որոշ ժամանակ առաջ նրա խաղն այնքան էլ չէր ստացվում, բայց մենք նրան խաղալու, ինքնադրսեւորվելու հնարավորություն էինք տալիս, եւ հիմա նրա խաղը ստացվում է, երկու-երեք խաղ արդեն խաղում է այնպես, ինչպես պետք է խաղալ: Երիտասարդներին ժամանակ է հարկավոր ու նաեւ վստահություն...
- Իսկ ի±նչ կասեք լեգեոներների մասին:
- Ինչ վերաբերում է լեգեոներներին, ապա Ալեքսին ես լեգեոներ չեմ համարում, որովհետեւ արդեն հինգ տարի այստեղ է խաղում, կարծես այստեղից է: Բոտի Դեմելը դեռեւս հարյուր տոկոսով պատրաստ չէ... Իմ կարծիքով` ավելի լավ է աշխատել սեփական խաղացողների, երիտասարդների հետ, քան թե հրավիրել լեգեոներների, ովքեր ոչնչով աչքի չեն ընկնում: Չարժե գումար ծախսել նրանց վրա: Ավելի լավ է ծանր աշխատանք տանել երիտասարդների հետ, եւ կես տարի, մեկ տարի հետո արդյունքը կերեւա:
- Ինչպե±ս կգնահատեք Հայաստանի առաջնությունը:
- Հայաստանի առաջնությունում կա հինգ ուժեղ թիմ, կան շատ լեգեոներներ, որոնց ես չէի հրավիրի, եւ, ինչպես նշեցի, ավելի ճիշտ է սեփական խաղացողների հետ աշխատել, իսկ հրավիրելու դեպքում` հրավիրել լավ, ուժեղ լեգեոներների, որոնցից կարելի է սովորել: Ինչպես մեզ մոտ սովորում են Ալեքսից:  
- Հայաստանի հավաքականի խաղին ծանո±թ եք:
- Հայաստանի հավաքականը առաջընթաց է ապրում, հիշենք թեկուզ Սլովակիայի հետ հանդիպումները: Լավ է, որ հավաքականի անդամների մի մասը խաղում է այլ երկրների առաջնություններում` Ռուսաստանում, Ուկրաինայում, Հոլանդիայում... Կուզեի առանձնացնել Յուրա Մովսիսյանին, Հենրիխ Մխիթարյանին: Համոզված եմ, որ Հայաստանի հավաքականի լավագույն խաղերը եւ հաջողությունները դեռեւս առջեւում են:

Ռ. ԹԱԹՈՅԱՆ