ՙՙՙՙՙՙԴԱ ԵՍ ՉՊԵՏՔ Է ՄԵԿՆԱԲԱՆԵՄ՚,- ԱՍՈՒՄ Է ՀՅԴ ՑՈՒՑԱԿՈՎ ԱՆՑԱԾ ՊԱՏԳԱՄԱՎՈՐԸ

ՙԴԱ ԵՍ ՉՊԵՏՔ Է ՄԵԿՆԱԲԱՆԵՄ՚,- ԱՍՈՒՄ Է ՀՅԴ ՑՈՒՑԱԿՈՎ ԱՆՑԱԾ ՊԱՏԳԱՄԱՎՈՐԸ

Երեկ 5-րդ գումարման Աժ-ը հրավիրեց առաջին նիստը: Մի շարք պատգամավորների համար սա նաեւ օրենսդիր գործունեության առաջին օրն էր: Նրանց շարքում է ՀՅԴ համամասնական ցուցակով ընտրված պատգամավոր, ՙԳրանդ Քենդի՚ ընկերության արդեն նախկին տնօրեն Արմեն Բաբայանը: ՙԻրավունքի՚ լրագրողը խնդրեց պատգամավորին պատասխանել մի քանի հարցերի:
-Պարոն Բաբայան, ինչու որոշեցիք առաջադրվել:
- Դուք գիտեք, որ նախորդ գումարման Աժ-ում ՀՅԴ խմբակցությունում ընդգրկված էր ՙԳրանդ Քենդի՚ ընկերության սեփականատեր Կարեն Վարդանյանը: Այս անգամ պարոն Վարդանյանը որոշեց չառաջադրվել, քանի որ, որպես խոշոր գործարար, նա ունի բազմաթիվ ծրագրեր` կապված արտադրության ընդլայնման ու նոր աշխատատեղերի ստեղծման հետ: Բայց հաշվի առնելով, որ Կարեն Վարդանյանը բազմաթիվ ծրագրեր ուներ նաեւ օրենսդիր դաշտում, որոշվեց, որ ես առաջադրվեմ որպես պատգամավորի թեկնածու եւ, ընտրվելու դեպքում, փորձեմ իրականացնել այդ ծրագրերը:
- Օրենսդրական գործունեության որ ոլորտի մասին է խոսքը եւ որոնք են լինելու Ձեր գործունեության առաջնահերթությունները:
- Ես իմ աշխատանքը պատկերացնում եմ ԱԺ տնտեսական հարցերի մշտական հանձնաժողովում: Հույս ունեմ, որ երկրի ամենախոշոր արտադրական ընկերության տնօրենի պաշտոնում իմ երկարամյա աշխատանքային փորձը ինձ կօգնի խորհրդարանում աշխատել ի նպաստ տեղական արտադրության եւ հայրենի տնտեսության զարգացման: Սա է լինելու իմ գործունեության առաջնահերթությունը:
- Ինչպես կմեկնաբանեք, որ ՀՅԴ ցուցակի երկու անդամների ինքնաբացարկի արդյունքում Դուք տեղ ստացաք ԱԺ-ում:
- Կարծում եմ, դա ես չպետք է մեկնաբանեմ: Դա եղել է ՀՅԴ կուսակցության որոշումը: Իմ կարծիքով, կուսակցությունն այդ որոշումը կայացրեց` առաջնահերթությունը տալով երկրի առաջ ծառացած տնտեսական խնդիրների լուծմանը` նաեւ օրենսդրական դաշտում: Եվ ես ամենայն պատասխանատվությամբ պատրաստ եմ իմ գիտելիքներով ու տարիների կուտակած փորձով միանալ իմ գործընկերներին` մասնավորապես Արծվիկ Մինասյանին, եւ ակտիվորեն մասնակցել տնտեսական խնդիրների կարգավորմանն ուղղված օրենսդրական գործունեությանը:
- Ինչպես եք պատկերացնում Ձեր աշխատանքը ընդդիմադիր խմբակցության կազմում:
- Անկախ այն բանից ընդդիմադիր, թե իշխանական դաշտում, յուրաքանչյուր պատգամավորի գերխնդիրը պետք է լինի աշխատել ի նպաստ երկրի բարօրության ու առաջընթացի եւ պետության ու քաղաքացիների շահերի:
- Որոշել եք, թե որն է լինելու Ձեր առաջին նախաձեռնությունը:
- Քանի որ այսօր իմ պատգամավորական գործունեության առաջին օրն է, չեմ ուզում ժամանակից առաջ անցնել ու խոսել ապագա ծրագրերի մասին:
Եթե մի փոքր ժամանակ տաք աշխատելու, հավատացնում եմ, որ կգա նաեւ արվածի մասին խոսելու ժամանակը:

Ա. ՀԱԿՈԲՅԱՆ