ՙՙՙՉԵՄ ՈՒԶՈՒՄ ՄԵԶԱՆՈՒՄ ՀԱՄԱՍԵՌԱՄՈԼՈՒԹՅՈՒՆ ԳՈՎԱԶԴՎԻ՚

ՙՉԵՄ ՈՒԶՈՒՄ ՄԵԶԱՆՈՒՄ ՀԱՄԱՍԵՌԱՄՈԼՈՒԹՅՈՒՆ ԳՈՎԱԶԴՎԻ՚

Մնջախաղի պետական թատրոնի գեղարվեստական ղեկավար ԺԻՐԱՅՐ ԴԱԴԱՍՅԱՆԸ ՙՀայոց Աշխարհ՚ թերթին տված հարցազրույցում անդրադարձել է նաեւ միասեռականների, այսպես կոչված, բազմազանության շքերթին եւ նրանց պահելաձեւին ընդհանրապես.
ՙԱյդ, այսպես կոչված, ՙբազմազանության երթը՚ դիմակ էր, իրենք մոռացել էին մի բառ ավելացնել` սեռական բազմազանություն... Իսկ մեզանում կան հրաշալի թատերական փառատոներ, կինոփառատոներ, որոնք հենց մշակութային բազմազանության լավագույն դրսեւորումներ են: Իմիջիայլոց, այս տարի հնարավոր է` հենց երթով էլ սկսենք մնջախաղի փառատոնը, սկսենք Երեւանից, Հյուսիսային պողոտայից, հուսանք` մեր թատրոնի շենքն էլ արդեն կիսով չափ կառուցված կլինի: Ինչ վերաբերում է բազմազան եւ բազմագույն հասարակական կազմակերպությունների երթին, ապա այն ինտուիցիայի մակարդակում ազդել էր մեր երիտասարդների վրա, որոնք ներքին ըմբոստություն ունեն: Այնպես չէ, որ ինչ-ինչ սեռական բազմազանություն ունեցողներ կարող են իրենց էությունն ու կարծիքը ցուցադրել ու ներկայացնել, իսկ դիմացինն իրավունք չունի ունենալ իր կարծիքը՚:
Ապա Ժ. Դադասյանը շարունակել է. ՙՄենք չենք ուզում դառնալ փոքրամասնություն, մինչդեռ իրենք փոքրամասնություն են, թող դա գիտակցեն: Այո°, այդպիսի բան գոյություն ունի աշխարհում, իմ կարծիքով` դա բոլորովին լավ բան չէ, որովհետեւ առհասարակ սրբում է մշակույթ ասվածը, չես հասկանում, թե ինչի հետ գործ ունես եւ ում հետ: Եվ, ի վերջո, դա չի նշանակում, թե այն, ինչ գոյություն ունի, պետք է դարձնել քարոզչության նյութ` շքերթ, երթ, ինչն ակնհայտ գովազդի ատրիբուտ է: Իրենք կոնկրետ գովազդում են: Բայց ես չեմ ուզում մեզանում համասեռամոլություն գովազդվի: Չեմ ուզում՚:
Նա կողմնակից է իրական եվրոպական արժեհամակարգին, որի շնորհիվ կարող է ծնվել Մոցարտ, Հենդել, Բոտիչելլի, բայց քաղաքացիական հասարակություն կոչված պսեւդոարժեքային համակարգը, ըստ նրա, շատ վնասակար է, ինչի հետեւանքներն արդեն տեսնում ենք:

ԽՈՐՈՎԱԾԻ, ՔԱԲԱԲԻ ԲՈՒՐՄՈՒՆՔՈՎ ՎԱՆԱԿԱՆ ՀԱՄԱԼԻՐ

Անցյալ տարի անդրադարձել էինք ԿԵՉԱՌԻՍ վանական համալիրի հարեւանությամբ կառուցվող ռեստորանային համալիրի շինարարության խնդրին: Բանից պարզվում է, որ շինարարությունը շարունակվում է, եւ դրա վերաբերյալ հայտարարություն են տարածել երիտասարդ գրողների 10-րդ համաժողովի մասնակիցները.
ՙԿեչառիսի վանքային համալիրը միջնադարյան Հայաստանի նշանավոր կրոնական ու մշակութային կենտրոններից էր: Կեչառիսում ապրել եւ գործել են ժամանակի խոշոր գիտնականներ ու քաղաքական գործիչներ... Կեչառիսից 120 մ հեռու կանգուն է Ս. Հարություն փոքրիկ եկեղեցին, որը կառուցվել է 1220թ.-ին: Արեւմտյան ճակատին կից գավիթը եկեղեցու հորինվածքի հետ արտաքինից մի ամբողջություն է կազմում՚:
Ապա երիտասարդ գրողներն անցնում են հարցի բուն էությանը. ՙԵվ այս պատմամշակութային երկու արժեքների միջեւ ներկայումս կառուցվում է ժամանցային համալիր, որն ակնհայտորեն արժեզրկում է մշակութային համալիրի պատմական նշանակությունը եւ կարող է իր գործունեությամբ բացասական ազդեցություն ունենալ տարածքի ընդհանուր հոգեւոր եւ բարոյական միջավայրի վրա: Մեր շրջայցի ժամանակ, հավանաբար մասամբ գործող, կիսակառույց հաստատությունից արդեն իսկ հնչում էր հայալեզու մուղամ՚: Ահա այսպիսի բաներ, հարգելի բնության, հուշարձանների սիրահարներ: Այնպես որ` կարող եք մոռանալ Կեչառիս վանական համալիր գնալու եւ այնտեղ հանգստանալու, առօրյայից կտրվելու մասին, քանի որ ձեզ այնտեղ էլ կդիմավորեն մայրաքաղաքի ՙօբյեկտներին՚ հատուկ անճաշակ երաժշտությունն ու, իհարկե, խորովածի ու քաբաբի բուրմունքը: Գուցե շուտով էլ կողքին գիշերային ակումբ կբացեն, սաունա...
Երիտասարդ գրողները պահանջում են դադարեցնել շինարարությունը եւ պատկան մարմիններից ակնկալում են հետեւողականություն նշյալ տարածքում ցանկացած տեսակի շինարարության օրինականացման եւ իրագործման հարցում:
Հայտարարությունն ուղղված է Ամենայն Հայոց կաթողիկոս Ն.Ս.Օ.Տ.Տ. Գարեգին Բ-ին, ՀՀ վարչապետին, ՀՀ մշակույթի նախարարին, Կոտայքի մարզպետին, Ծաղկաձորի քաղաքապետին:

Կույտը մշակեց ՌՈՒՍԼԱՆ ԹԱԹՈՅԱՆԸ