ՄԵԶ ՊԵՏՔ Է ՙԵՎՐԱՏԵՍԻԼԸ՚

ՙՄԵԶ ՊԵՏՔ Է ՙԵՎՐԱՏԵՍԻԼԸ՚

Բաքվում շաբաթ օրն ավարտվեց ՙԵվրատեսիլ 2012՚ մրցույթը: Եզրափակչում հաղթեց Շվեդիայի ներկայացուցիչ ԼՈՐԵՆԸ: Իսկ դա նշանակում է, որ ՙԵվրատեսիլ 2013՚-ը կկայանա Շվեդիայում: Երկրորդ տեղը զբաղեցրեցին Ռուսաստանը ներկայացնող ՙԲուրանովյան տատիկները՚, իսկ երրորդ տեղում է Սերբիան ներկայացնող Ժելկո Յոկսիմովիչը:
Տեղեկացնենք, որ Լորենը արաբ է, երգչուհու կարիերան սկսել է 2004թ.` Շվեդիայում մասնակցելով ՙIdol 2004՚ մրցույթին եւ զբաղեցնելով 4-րդ տեղը: 2005-ին ՙRob’n’Raz՚ խմբի հետ միասին թողարկել է դեբյուտային ՙThe Snake՚ երգը: 2012-ին հաղթել է Շվեդիայում մեծ լսարան ունեցող ՙMelodifestivalen՚ մրցույթում եւ իրավունք է ստացել Շվեդիան ներկայացնել ՙԵվրատեսիլ 2012՚-ում: Իսկ հայաստանյան մրցույթներում հաղթողն արդեն նախօրոք հայտնի է լինում: Իսկ ընդհանրապես դիտելով մրցույթը` եկանք այն եզրահանգմանը, որ Հայաստանում շատ քիչ երգիչներ կան, ովքեր նորմալ վոկալային տվյալներ ունեն եւ կարող են հաջողությամբ ներկայացնել երկիրը:
Անցնենք առաջ եւ հիշեցնենք, որ Հ1-ը ցուցադրեց ՙԵվրատեսիլը՚, չնայած մինչեւ եզրափակչի սկիզբը դեռ պարզ չէր` ցուցադրելո±ւ են, թե± ոչ: Այս կապակցությամբ Հ1-ի տարածած հայտարարությունում նշված է, որ չէին հաստատում ՙԵվրատեսիլի՚ ցուցադրությունը, քանի որ չկար վստահություն, որ այն կհամապատասխանի մրցույթի չափանիշներին` չի պարունակի բովանդակային շեղումներ: Խոսքը, մասնավորապես, Լեռնային Ղարաբաղի մասին է. ՙԿար մտավախություն, եւ այն հաստատվեց երեկ մեկնաբաններին ուղարկված նյութերով, որոնցից պարզ դարձավ, որ Ադրբեջանի տեսաբացիկը կոչվում է Ղարաբաղ: Ասվում էր` իբր Ղարաբաղը Ադրբեջանի մշակութային կենտրոններից է, նշված էր Շուշին եւ այլն: Հ1-ը բողոքարկեց բացիկի բովանդակությունը: ԵՀՄ-ն խոստացավ հյուրընկալող երկրի միջոցով փոխել այն: ԵՀՄ մեդիա-ղեկավար Անիկա Նայբերգ-Ֆրանկենհաուզերը նշել է, որ ընդունում են, որ Լեռնային Ղարաբաղի թեմայի արծարծումը առաջ կբերի քաղաքական քննարկումներ, ինչը հակասում է ՙԵվրատեսիլի՚ կանոններին: Այնուհետեւ ադրբեջանցիները եվրոպացիներին բացատրել էին, թե Ղարաբաղ ասելով նկատի չունեն Լեռնային Ղարաբաղը, այլ ավելի լայն տարածք: ԵՀՄ-ից ստացանք հավաստիացում, որ հոլովակը եթերում կլինի վերամոնտաժված, քաղաքական ակնարկները հեռացված՚: Իսկ ընդհանրապես ամբողջ հեռարձակումը Ադրբեջանի չունեցած մշակույթի, ավանդույթների գովքն էր, որին կանդրադառնանք ՙԻրավունքի՚ առաջիկա համարում:  
Մինչեւ այսօր էլ կարծիքներ են հնչում այն մասին, թե կարիք կա±ր բոյկոտել ՙԵվրատեսիլը՚, սակայն մենք եղել եւ մնում ենք այն տեսակետին, որ Բաքու չգնալու մասին պետք է հայտարարվեր հենց այն օրը, երբ պարզվեց, որ ՙհաղթել՚ են Ադրբեջանի ներկայացուցիչները: Ոչ միայն պետք է հայտարարվեր, այլեւ միջազգային հանրությանը տեղեկացվեր բոյկոտելու պատճառների մասին: Չարվեց, եւ հիմա պետք է մուծենք ոչ միայն մասնակցության համար, այլ նաեւ տուգանք` այդ վճարի 50 տոկոսի չափով, իսկ այդ գումարը, ըստ որոշ հրապարակումների, 120 հազար եվրո է: Եվ հերթական անգամ ուզում ենք հնչեցնել մեր ավանդական հարցը` մեզ պե±տք է ՙԵվրատեսիլը՚:

Կույտը մշակեց ՌՈՒՍԼԱՆ ԹԱԹՈՅԱՆԸ