ՀԱՎԱՔԱԿԱՆԻ ԿԱԶՄԸ ՀԱՅՏՆԻ Է

ՀԱՎԱՔԱԿԱՆԻ ԿԱԶՄԸ ՀԱՅՏՆԻ Է

Մայիսի 26-ին Հայաստանի ազգային հավաքականը սկսում է ուսումնամարզական հավաքը` նախապատրաստվելով մայիսի 31-ին Ավստրիայի Կուֆշտայն քաղաքի ՙԳրենցլանդշտադիոն՚ մարզադաշտում կայանալիք` Հունաստան-Հայաստան, եւ հունիսի 5-ին` Վազգեն Սարգսյանի անվան ՙՀանրապետական՚ մարզադաշտում կայանալիք Հայաստան-Ղազախստան ընկերական հանդիպումներին: Ինչպես տեղեկացնում է ՀՖՖ մամուլի քարտուղարությունը, մայիսի 26-ից ազգային հավաքականը կհանգրվանի ՀՖՖ տեխնիկական կենտրոն Ֆուտբոլի ակադեմիայում: Հավաքականի մարզչական շտաբը` Վարդան Մինասյանի գլխավորությամբ, հավաքական է հրավիրել հետեւյալ ֆուտբոլիստներին:
Դարպասապահներ` Ռոման Բերեզովսկի` ՙԴինամո՚, Ռուսաստան, Գեւորգ Կասպարով` ՙՄիկա՚: Պաշտպաններ` Սարգիս Հովսեփյան` ՙՓյունիկ՚, Ռոբերտ Արզումանյան` ՙՅագելոնիա՚` Լեհաստան, Լեւոն Հայրապետյան` ՙԼեխիա Գդանսկ՚, Լեհաստան, Հրայր Մկոյան` ՙՍպարտակ՚, Նալչիկ, Ռուսաստան Վալերի Ալեքսանյան` ՙՍանաթ Նաֆթ՚, Իրան, Արտակ Եդիգարյան` ՙՓյունիկ՚, Վարազդատ Հարոյան` ՙՓյունիկ՚: Կիսապաշտպաններ` Կառլեն Մկրտչյան` ՙՄետալուրգ՚, Դոնեցկ, Ուկրաինա, Արթուր Եդիգարյան` ՙԽիմկի՚, Ռուսաստան, Հենրիխ Մխիթարյան` ՙՇախտյոր՚, Դոնեցկ, Ուկրաինա, Գեւորգ Ղազարյան` ՙՄետալուրգ՚, Դոնեցկ, Ուկրաինա, Դավիթ Մանոյան` ՙՓյունիկ՚, Զավեն Բադոյան` ՙԲԱՏԵ՚` Բելառուս, Արթուր Յուսպաշյան` ՙՓյունիկ՚, Կամո Հովհաննիսյան` ՙՓյունիկ՚: Հարձակվողներ` Արթուր Սարկիսով` ՙՇիննիկ՚, Ռուսաստան, Մարկոս Պիզելի` ՙԿուբան՚, Ռուսաստան, Յուրա Մովսիսյան` ՙԿրասնոդար՚, Ռուսաստան:
Ֆուտբոլասերները նկատեցին, որ այդ կազմում բացակայում էր Հայաստանի հավաքականի ու Եկատերինբուրգի ՙՈւրալի՚ հարձակվող ԷԴԳԱՐ ՄԱՆՈՒՉԱՐՅԱՆԻ անունը:
Պարզվում է, որ նա պատրաստվում է վիրահատության ենթարկվել, ինչի պատճառով էլ չի մասնակցի հավաքականի առաջիկա հավաքին: Ի դեպ, բոլորն էլ նկատած կլինեն, որ հայ ֆուտբոլիստը բազմիցս վնասվածքներ է ստացել, որն էլ, բնական է, խանգարում է նրա կայանալուն, կայուն ելույթներին: Նախկին վնասվածքը կրկին զգացնել է տվել, ու այժմ նա պատրաստվում է մեկնել Ամստերդամ, որտեղ կենթարկվի վիրահատության:
Նման վիրահատությունից հետո 8-12 շաբաթ են վերականգնվում, բայց Էդգարը հույս ունի, որ 8 շաբաթից կկարողանա դուրս գալ խաղադաշտ. ՙՑանկանում եմ հնարավորինս արագ վերադառնալ մարզումներին, կրկին հրավեր ստանալ Հայաստանի հավաքականից ու մասնակցել սեպտեմբերին կայանալիք ընտրական խաղերին: Հույս ունեմ, որ 100 տոկոսով կկարողանամ պատրաստ լինել աշնանը կայանալիք հանդիպումներին՚:

ՊԱՏԱՆԻՆԵՐԸ ԿՌԻՎ ԵՆ ՏԱԼՈՒ

Իսկ այժմ անդրադառնանք Հայաստանի մինչեւ 19 տարեկանների հավաքականի ելույթներին: Ինչպես արդեն տեղեկացրել էինք, հավաքականի գլխավոր մարզիչ Վարազդատ Ավետիսյանի գլխավորությամբ մեր հավաքականը գտնվում է Իտալիայում, ուր մասնակցում է ՙԷլիտ-ռաունդի՚ հանդիպումներին: Առաջին տուրում մեր պատանիները Իսպանիայից 1:2 հաշվով պարտություն կրեցին: armsport.am-ը հեռախոսազրույց է ունեցել ՎԱՐԱԶԴԱՏ ԱՎԵՏԻՍՅԱՆԻ հետ, որից մի հատված ներկայացնում ենք ֆուտբոլասերների ուշադրությանը: Ըստ գլխավոր մարզչի, առաջին խաղակեսում մեր հավաքականը լավ է խաղացել, բայց երկրորդ խաղակեսում զգացվել է, որ թիմը ֆիզիկական պատրաստվածության հետ խնդիր ունի, ինչն էլ վճռորոշ է եղել այդ մրցավեճում. ՙԿարող եմ նշել, որ տղաները առավելագույն հնարավորություններով հանդես եկան, ամեն ինչ արեցին դրական արդյունքի համար: Առաջին խաղակեսում գոլային պահեր եղան, որոնք չկարողացանք իրացնել: Երկրորդ խաղակեսում Ֆիզիկականը չբավականացրեց՚:
Առաջին գոլն ընդունելուց հետո մեր տղաները կարողացել են հավասարեցնել հաշիվը, ինչ հազվադեպ է լինում մեր հավաքականների հանդիպումներում: Մարզչի բացատրությունը հետեւյալն է. ՙԸնդունած գոլից հետո տղաները շարունակեցին խաղալ` գիտակցելով, որ պետք է գոլ խփել ու խփեցին: Դավիթ Հակոբյանն աջ եզրում խաբս տվեց մրցակցին, ապա տուգանային հրապարակից դուրս ձախ ոտքով հարվածեց` գրավելով դարպասը: Արդեն նշեցի, որ վերջնամասում ուժերը չբավականացրին` պահպանելու հավասար հաշիվը՚:
Ինչպես պարզվում է, մրցակցի հաղթական գոլը ծնվել է տուգանայինի խաղարկումից հետո. ՙՄրցավարի ավելացրած ժամանակն էլ արդեն սպառվել էր, երբ գնդակը հայտնվեց մեր դարպասում: Մրցավարը ցույց տվեց կենտրոն, ապա ավարտեց խաղը՚:
Իհարկե, Իսպանիայի հավաքականը հզոր է, ինչի մասին տեղյակ է եղել նաեւ մեր մարզչական կազմը, ընդ որում, ավելորդ չէ հիշեցնել, որ իսպանացիները երկրորդ խաղակեսում 10 հոգով էին խաղում, բայց, ինչպես նշում է մեր հավաքականի գլխավոր մարզիչը. ՙԿարող եմ ասել, որ առաջին խաղակեսում մենք ավելի լավ խաղացինք 11-ը 11-ի դեմ՚:
Մյուս խաղում Բելգիան 1:2 հաշվով զիջել է Իտալիային, եւ այսօր մեր տղաների մրցակիցը հենց Բելգիայի հավաքականն է, որի հետ խաղում, ինչպես նշել է գլխավոր մարզիչը. ՙԱնկախ ամեն ինչից, դուրս ենք գալու կռիվ տալու՚:

Ռ. Թ.