ՉԵՆՔ ԿԱՐՈՂԱՆՈՒՄ ՄԵՐ ԱՐՎԵՍՏԸ ՆԵՐԿԱՅԱՑՆԵԼ...

ՉԵՆՔ ԿԱՐՈՂԱՆՈՒՄ ՄԵՐ ԱՐՎԵՍՏԸ ՆԵՐԿԱՅԱՑՆԵԼ...

Արամ Խաչատրյանի անվան դաշնամուրային տրիոն մտադիր է հաջորդ տարի հատուկ ծրագիր պատրաստել մեծն կոմպոզիտորի 110-ամյակի առթիվ: Այս մասին լրագրողներին տեղեկացրեց տրիոյի ջութակահար ԿԱՐԵՆ ՇԱՀԳԱԼԴՅԱՆԸ.
ՙԱրամ Իլյիչի 110-ամյակին մենք ծրագրում ենք ժողովրդայնացնել նրա կամերային երաժշտությունը, քանի որ նրա կամերային ստեղծագործությունը, ցավոք, հայտնի չէ՚: Ընդհանրապես խոսելով տրիոյի գործունեության եւ, մասնավորապես, հունիսի 6-ին Արամ Խաչատրյանի ծննդյանն ընդառաջ կազմակերպվելիք միջոցառումների մասին, տրիոյի մենակատար, դաշնակահարուհի, Ա. Խաչատրյանի անվան տուն-թանգարանի տնօրեն ԱՐՄԻՆԵ ԳՐԻԳՈՐՅԱՆԸ հավելեց, որ իրենց բոլոր ծրագրերը կապված են Ա. Խաչատրյանի ստեղծագործությունները հնչեցնելու, գովազդելու, ավելի հայտնի դարձնելու հետ, նույնիսկ կատարում են այնպիսի ստեղծագործություններ, որոնք ավելի քիչ են հայտնի: Դաշնակահարուհին նշեց, որ իրենք համագործակցում են նաեւ կոմպոզիտորների հետ` Ա. Խաչատրյանի մեծակտավ ստեղծագործությունները դաշնամուրային տրիոյին հարմարեցնելու համար: Այս տարի լրանում է նաեւ ՙԳայանե՚ բալետի 70-ամյակը, ինչի առթիվ տրիոն կատարում է նաեւ բալետից հատվածներ` հարմարեցված տրիոյին: Ա. Գրիգորյանի փոխանցմամբ. ՙՀունիսի 6-ից մեկնելու ենք մարզեր, որը նույնպես Ա. Խաչատրյանի տոնի շարունակությունն է: Հունիսի10-13-ը համերգային ծրագրով եւ վարպետության դասերով հանդես կգանք Կապանում, Քաջարանում: Մարզերում մեզ ընդունում են լեփ-լեցուն դահլիճներով ու անհամբեր սպասում հաջորդ գալստյանը՚: Ապա հավելեց, որ չկա այն մտավախությունը, թե մարզերում դասական երաժշտություն չեն սիրում. ՙՄարզերում սիրում եւ լսում են դասական երաժշտություն, եւ թյուր կարծիք է, որ դա այդպես չէ՚:
Տրիոյի ջութակահար Կարեն Շահգալդյանն էլ դասական երաժշտությունը համեմատեց տիեզերանավի հետ. ՙԱյն սիրում են, բայց չեն տեսել, որովհետեւ մարզերում պարզապես շատ քիչ են լինում դասական համերգներ, այնինչ, լսել ցանկացողներ շատ կան: Տրիոյի ջանքերով Վանաձորում բացվեց թավջութակի դասարան, որն արդեն մեկ տարի է` գործում է, եւ կա երկու աշակերտ: Իսկ ՙԴասական երաժշտության աջակցման ֆոնդը՚ կրթաթոշակներ է տրամադրում շնորհալի երեխաներին, նաեւ մուծում է նրանց ուսման վարձը՚:
Իսկ լրագրողների հնչեցրած այն հարցին, թե որքանով են Հայաստանում ճանաչում մեծն կոմպոզիտորին, բանախոսները պատասխանեցին, որ Արամ Խաչատրյանին աշխարհի տարբեր երկրներում հիմնականում ճանաչում են ՙՍպարտակ՚ բալետով, ջութակի կոնցերտով: Կան շատ այլ հետաքրքիր գործեր, որոնք կարիք ունեն ներկայացման ու հանրահռչակման: Ա. Գրիգորյանի փոխանցմամբ, Ա. Խաչատրյանի 110-ամյակի առիթով տրիոն ոչ շատ հայտնի ստեղծագործությունները ներկայացնելու է հանրությանը: Իսկ ջութակահար Կ.Շահգալդյանն էլ ասաց. ՙԻնչպես աշխարհում, այնպես էլ Հայաստանում ոչ այնպիսի ծավալով ճանաչում ունի տաղանդավոր կոմպոզիտորը, որքանով որ անհրաժեշտ էր: Պետք է ավելի շատ ճանաչում: Բայց դա նաեւ մեր մեղքն է, քանի որ չենք կարողանում մեր արվեստը ներկայացնել այնպես, ինչպես որ հարկն է: Դա պետք է արվի պետական մակարդակով՚:
Բանախոսների տեղեկացմամբ, թանգարանի միջոցներով մինչեւ տարեվերջ լույս է տեսնելու նաեւ Արամ Խաչատրյանին նվիրված ալբոմը, թողարկվելու է մեծանուն կոմպոզիտորի քիչ հայտնի ստեղծագործությունների ձայնագրություններով ձայնասկավառակը` վերնագրված ՙԱրամ Խաչատրյան. անհայտ էջեր՚, որը լույս կտեսնի կոմպոզիտորի 110-ամյակին ընդառաջ:
Բացի այդ, տրիոն կթողարկի նաեւ Ալեքսանդր Հարությունյանի ստեղծագործությունների սկավառակը:

ԼԻԼԻԹ ԵՂԻԱԶԱՐՅԱՆ