ՙՄԱՐԳԱՐ ՕՀԱՆՅԱՆԻ ՄԵՂԱՎՈՐՈՒԹՅՈՒՆԸ ԱՊԱՑՈՒՑՎԱԾ ՉԷ...՚

ՙՄԱՐԳԱՐ ՕՀԱՆՅԱՆԻ ՄԵՂԱՎՈՐՈՒԹՅՈՒՆԸ ԱՊԱՑՈՒՑՎԱԾ ՉԷ...՚

Օրենքի եւ արդարության պահանջներին հակասող դատական ակտերը, որպես կանոն, կայացվում են դատավարական իրավունքի նորմերի խախտման արդյունքում: Օրենքը պահանջում է, որպեսզի քննությունը, լինի դա նախնական, թե դատական, իրականացվի բազմակողմանի, լրիվ ու օբյետիվ: Այս առումով` Ճանապարհային ոստիկանության նախկին պետ Մարգար Օհանյանի եւ այլոց գործով վարույթը իրականացվել է պատշաճ կարգով: Այդպիսին է ՙգլխավոր՚ մեղադրյալի պաշտպան, փաստաբան Մկրտիչ Վասակյանի կարծիքը: Միաժամանակ պաշտպանը համոզված է նրանում, որ բարձր մակարդակով անցկացված դատաքննության արդյունքում ապացուցված պետք է համարվի իր պաշտպանյալի անմեղությունը:
Մինչդեռ, Հայաստանի ոստիկանական համակարգում, ըստ մեղադրանքի, ամբաստանյալների հանցավոր գործունեությունը հանգեցրել էր, մեղմ ասած, ավելի քան կես միլիոն տոննա բենզինի,  կորստի…
Դատաքննության սկզբից Մարգար Օհանյանը ՙտեղեկացրել՚ էր հանրությանը, թե` ՙիր գլխին Ալիկ Սարգսյանն է սարքել՚:
Ի±նչ նկատի ուներ Մ. Օհանյանը, դեռ պարզ չէ: Սակայն պարզ է, որ 500 հազար տոննա բենզինը ՙջրելը՚ դյուրին խնդիր չէ, հետեւաբարեւ` պատշաճ հսկողության կամ պատշաճ հսկողություն իրականացնելու ցանկության դեպքում վառելանյութի ՙարտահոսքը՚ կբացահայտվեր առաջին իսկ 100 տոննայի պարագայում…
Սակայն սա այդքան էլ էական չի թվում ինձ համար:  
Մ. Օհանյանի համար մեղադրողը պահանջել է 8 տարվա ՙռեալ՚ ազատազրկում: Մյուս ամբաստանյալների համար դատախազը ՙբավարարվել՚ է պայմանական ազատազրկման պահանջով: Վերջիններիս թվում է նաեւ Ստեփան Կարախանյանը: Այս անձին հատուկ նշեցինք, քանի որ` հերքելով իր դեմ ուղղված մեղադրանքը, նախկին ոստիկանապետ Ալիկ Սարգսյանը ասել էր. ՙԻմ խոսքերը հավաստի են, ոչինչ չափազանցված չէ, համապատասխանում են իրականությանը եւ կարող եք ստուգել ոստիկանության կադրերի վարչությունում, ինչպես նաեւ, փառք Աստծո, Ստեփան Կարախանյանը դեռ ողջ է եւ ունի փաստաբան, ով ոչնչից չի վախենում, կարող եք դիմել իրեն՚:
Հենց վերը նշվածից ելնելով, լրագրողը հարցրեց պարոն Վասակյանին. ՙՊայմանական ազատազրկման պահանջը չի± բխում, արդյոք, այն նկատառումից, որ Ս. Կարախանյանի մոտ հանկարծ ցանկություն չառաջանա մոտակա տարիներին բացել իր սիրտը…՚:
Ի պատիվ փաստաբանի, նա սահմանափակվեց հետեւյալ պատասխանով. ՙՄեղադրողն օգտվել է իր իրավունքից՚:
Ով է վիճում…

Ա. ԱԲԳԱՐՅԱՆ