ԱՌԱՋԱՏԱՐԸ ՙՄԻԿԱՆ՚ Է

ԱՌԱՋԱՏԱՐԸ ՙՄԻԿԱՆ՚ Է

Կիրակի օրը կայացավ ֆուտբոլի Հայաստանի առաջնության 9-րդ տուրը: Այն անցավ դաշտի տերերի առավելությամբ, որոնք երեք խաղ շահեցին, մեկում պարտվեցին: Հյուրընկալվելիս հաջողությունն ուղեկցեց միայն ՙՈւլիսին՚:
9-րդ տուրում գրանցվեց ընթացիկ առաջնության ամենաբարձր արդյունավետությունը. 4 խաղում խփվեց 15 գոլ: Մինչ այդ ամենագոլառատը 1-ին եւ 4-րդ տուրերն էին, որոնցում խփվել էր 12-ական գնդակ: Առաջնության 36 հանդիպումներում գրանցվել է 91 գոլ: Միջին արդյունավետությունը բավական բարձր է` 2,52 գոլ:
Միանգամից 2 խաղում (ՙՓյունիկ՚-ՙԲանանց՚, ՙՇիրակ՚-ՙԱրարատ՚) գրանցվեց ընթացիկ առաջնության ամենախոշոր հաշիվը` 4:0: Մինչ այդ ամենախոշոր հաշվով հաղթանակը տոնել էր ՙԻմպուլսն՚ ՙԱրարատի՚ նկատմամբ` 4:1: ՙՄիկա՚-ՙԻմպուլս՚ խաղում կրկնվեց 1-ին տուրի ՙՓյունիկ՚-ՙՈւլիս՚ հանդիպման հաշիվը (4:2): Այդ հանդիպումներն առայժմ ամենագոլառատն են ընթացիկ առաջնությունում:
Երկրի չեմպիոն ՙՈւլիսին՚ վերջապես հաջողվեց առաջնությունում անդրանիկ հաղթանակը տոնել: Դա Կապանում անցկացրած 13 հանդիպումներում ուլիսցիների արդեն 8-րդ հաղթանակն էր:
ՙՓյունիկը՚ խոշոր հաշվով առաջին հաղթանակը տոնեց: 2-րդ անընդմեջ խաղում փյունիկցիները մրցակցի դարպասը 4 գոլ խփեցին: Նախորդ խաղում ՙՓյունիկը՚ 4:2 հաշվով հաղթել էր ՙՈւլիսին՚: Վերջին 6 հանդիպումներում ՙՓյունիկն՚ անպարտելի է եւ վաստակել է 14 միավոր:
Ռաֆայել Նազարյանի գլխավորությամբ ՙԲանանցն՚ առաջին անգամ պարտվեց ՙՓյունիկին՚, այն էլ` խոշոր հաշվով:
Ընթացիկ առաջնությունում ՙՇիրակն՚ առաջին անգամ խոշոր հաշվով հաղթեց: Շիրակցիները կրկնեցին արարատցիների հետ մրցախաղերում իրենց ամենախոշոր հաշվով հաղթանակի ռեկորդը:
ՙԱրարատը՚ 5-րդ անընդմեջ պարտությունը կրեց: Ընթացիկ առաջնությունում արարատցիներն արդեն խոշոր հաշվով 3-րդ պարտությունը կրեցին:
Արմեն Պետրոսյանը ՙՄիկայի՚ կազմում հոբելյանական` 100-րդ հանդիպումն անցկացրեց: Նա դարձավ թիմի կազմում 100 խաղի սահմանագիծը հատած 9-րդ ֆուտբոլիստը: Թիմի ներկայիս ֆուտբոլիստներից ՙՄիկայում՚ բոլորից շատ խաղ է անցկացրել բրազիլացի Ալեքսը` 148: Դա թիմում 2-րդ արդյունքն է, իսկ ռեկորդակիրը Հրաչյա Միքայելյանն է` 168 խաղ:
Իսկ այժմ ներկայացնում ենք 9-րդ տուրի արդյունքները եւ մրցաշարային աղյուսակը:  
ՙՓյունիկ՚-ՙԲանանց՚` 4:0, ՙՇիրակ՚-ՙԱրարատ՚` 4:0, ՙՄիկա՚-ՙԻմպուլս՚` 4:2, ՙԳանձասար՚-ՙՈւլիս՚` 0:1:
Առաջնությունն ունի նաեւ իր ռմբարկուները`6 գնդակ` Անդրանիկ Բարիկյան (Շիրակ), 5` Նորայր Գյոզալյան (Իմպուլս), 5` Ֆիլիպ Տիմով (Իմպուլս), 4` Սեմյոն Մուրադյան (Միկա), 4` Վիուլեն Այվազյան (Փյունիկ), 3` Հովհաննես Ս. Համբարձումյան (Բանանց), 3` Կամո Հովհաննիսյան (Փյունիկ), 3` Գեւորգ Պողոսյան (Միկա), 3` Դեյան Վուկոմանովիչ (Գանձասար), 3` Հովհաննես Հովհաննիսյան (Փյունիկ), 3` Աղվան Մկրտչյան (Միկա):

Պատրաստեց Ռ. ԹԱԹՈՅԱՆԸ