ՙՀՀԿ-Ի ՀԱՄԱՐ ԿՈԱԼԻՑԻԱ ԿԱԶՄԵԼԸ ԻՆՔՆԱՆՊԱՏԱԿ ՉԻ ԵՂԵԼ՚

ՙՀՀԿ-Ի ՀԱՄԱՐ ԿՈԱԼԻՑԻԱ ԿԱԶՄԵԼԸ ԻՆՔՆԱՆՊԱՏԱԿ ՉԻ ԵՂԵԼ՚

Շարունակում ենք ներկայացնել կարծիքներն այն մասին, թե արդյոք կոալիցիա անհրաժե±շտ է, թե± ոչ նորընտիր Ազգային ժողովում:
ԱԺ պատգամավոր ԱՐՏԱՇԵՍ ԳԵՂԱՄՅԱՆ. ՙՀՀ-ի համար ներկայումս թիվ մեկ խնդիրը, ըստ իս, դա ազգի միաբանության ապահովումն է: Դրանից հետո, այո, անհրաժեշտ է, որ լինի կոալիցիա: Սակայն առանձին քաղաքական ուժեր, ոչ թե այդ գիտակցումով են ցանկանում կոալիցիա կազմել, այլ այն, որ այս կամ այն նախարարական պորտֆելին տիրեն: Եվ եթե նման կերպ են ցանկանում կոալիցիա ստեղծել, անշուշտ, դա պահանջված չէ: ՀՀԿ-ն ինչպես ամբողջ ընտրապայքարում, այնպես էլ հիմա իրեն դրսեւորում է խիստ պետականամետ ուժերի դիրքերից, եւ պետականամետ ուժերը 2013 թվականի փետրվարին կայանալիք նախագահական ընտրություններում սատարելու են գործող ՀՀ նախագահ Սերժ Սարգսյանին: Այդ պարագայում Հայաստանի եւ Արցախի նկատմամբ թշնամաբար տրամադրված բոլոր ուժերը կհասկանան, որ ՀՀ-ի քաղաքական ընտրանին միաձույլ եւ համախմբված է գերագույն գլխավոր հրամանատարի շուրջը, եւ արդեն զերծ կմնան Հայաստանը ներսից ՙնարնջագույններով՚ եւ ՙհինգերորդ շարասյուներով՚ քայքայելուց՚:
Ո±ւմ հետ եք կոալիցիա տեսնում հարցին ի պատասխան պարոն Գեղամյանը նկատեց. ՙԱյդ հարցը ճիշտ կլինի ուղղեք ՀՀԿ-ի ղեկավարությանը, քանի որ իրենք են լիարժեք տիրապետում այն տեղեկատվություններին, որն իմանալով միայն կկարողանաս ճիշտ պատասխանել այդ հարցին: Բացի այդ` իմ կողմից շատ անհամեստ կլինի, որ տվյալ պարագայում, բանակցային գործընթացներում ինչ-որ տեսակետ հայտնեմ: Կարեւորն այն է, որ ռազմավարական խնդիրները ճիշտ ներկայացվի հանրությանը եւ հանրությունը հասկանա, որ կոալիցիա կազմելը ՀՀԿ-ի համար երբեւէ ինքնանպատակ չի եղել, եւ կուսակցությունը հանդես գալով բացարձակ հաղթողի դիրքերից, էլի կարեւորում է ոչ թե սեփական իշխանավարության շարունակությունը, այլ ազգի կոնսոլիդացիայի խնդիրը, քանզի դա է պահանջված Հայաստանի պետականության պահպանման համար՚:
ԱԺ պատգամավոր ԽՈՍՐՈՎ ՀԱՐՈՒԹՅՈՒՆՅԱՆ. ՙԱյս ընտրություններում ՀՀԿ-ն ունի բացարձակ մեծամասնություն եւ ֆորմալ առումով կոալիցիայի անհրաժեշտություն չկա: Մինչդեռ այս ընտրությունների ամբողջ ընտրապայքարի մրցապայքարը փաստեց մի կարեւոր իրողություն: Դա այն է, որ հանրությունը սպասում էր շատ լուրջ եւ էական փոփոխությունների: Լուրջ փոփոխություն ասելով կարելի է հասկանալ ոչ միայն սոցիալական իրավիճակի բարելավում, թոշակի կամ աշխատավարձի բարձրացում, որոնց մասին հատկապես շատ են խոսում ընդդիմադիր ուժերը, այլ, որ նախ եւ առաջ մեր իրականությանը որակական փոփոխություններ են հարկավոր: Այսինքն քայլեր, որ կնվազեցնեն կոռուպցիոն ռիսկերը, հովանավորչությունը, անարդարությունը, որից հանրային օրգանիզմը բարոյապես կառողջանա: Այս բարեփոխումները շատ ժամանակ կարող են ընթանալ նաեւ ցավագին: Ինչպես, ասենք, երբ բժիշկը վիրահատական միջամտությամբ ցավ է պատճառում վիրահատվողին: Այսօր մենք կանգնած ենք նման վիրահատական միջամտության խնդրի առջեւ, որը կարող է լինել նաեւ շատ ցավոտ: Նման կարգի բարեփոխում իրականացնելու համար իշխող կուսակցությանն ու ղեկավարությանը հարկավոր է ունենալ ԱԺ-ում կայուն, մնայուն քաղաքական մեծամասնություն, իսկ երկու-երեք մանդատի գերակայությունը դեռեւս նման կայուն երաշխիքներ չի կարող ապահովել: Կոալիցիայի անհրաժեշտությունը բխում է հանրության շահերից, քաղաքական զարգացումների անհրաժեշտությունից՚:
Իսկ թե պարոն Հարությունյանն ո±ւմ հետ է տեսնում կոալիցիան, ապա. ՙՆախ եւ առաջ կոալիցիոն գործընկերներն իրար պետք է վստահեն: Բացի այդ, նրանց ընդհանուր տեսլականը պետք է համընկնի: Եվ եթե նայում ենք այս կոնտեքստում, ապա երկու առաջատար ուժերն էլ` ՀՀԿ-ն ու ԲՀԿ-ն, ի տարբերություն այլ քաղաքական ուժերի, մրցապայքարի ժամանակ խոսում էին հանրային կյանքի որակական փոփոխությունների մասին: Իմ գնահատականով այս երկու կուսակցությունների լիդերների ելույթները տարբերվում էին մնացածներից: Ապագա բարեփոխումների տեսլականից, այս կուսակցությունների ընկալումները բավականին մոտ են եւ դա պատահական չէ, քանի որ, ի վերջո, համատեղ լուրջ ճանապարհ են անցել: Ընդ որում` բավականին դժվար պայմաններում, մարտի մեկ, ֆինանսատնտեսական ճգնաժամ եւ այլն: Հանրությունը այս կուսակցություններին պատրաստ է վստահել: Այս պարագայում կարող է ակտիվ մասնակցություն ունենալ նաեւ ՕԵԿ-ը՚:
Քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆ. ՙԻմ կարծիքով, եթե կոալիցիան պետք է գործի եւ ամբողջությամբ պատասխանատվություն կրի բացթողումների համար, ապա նման կոալիցիան օգտակար կլինի եւ կապահովի կառավարության մեջ բազմակարծությունը: Սակայն դրանից բացի, անցած կոալիցիայի փորձը այդքան դրական չէր` հաշվի առնելով ԲՀԿ-ի դիրքորոշումը, որը ընտրություններում կարծես ընդունել էր ընդդիմադիր կեցվածք ու փորձում էր վաստակել ընդդիմադիր դաշտի քվեները: Այս պարագայում ինձ մի քիչ դժվար է հասկանալը, թե ԲՀԿ-ն, որը փաստացի ընտրությունների ժամանակ շահել է նաեւ ՀԱԿ-ի նախկին կողմնակիցների քվեները, ինչպե±ս կարող է համատեղվել նոր կոալիցիայում հայտնվելու հեռանկարի հետ: Եթե ԲՀԿ-ն կարողանա հասկանալ այդ դիլեման, ապա կարծում եմ, որ կոալիցիան բավական օգտակար կարող է լինել եւ նպաստել երկրի բնակայուն զարգացմանը: Ավելի խելամիտ կլինի, որ ՀՀԿ-ն համագործակցեր, թե° ԲՀԿ-ի, եւ թե° ՙԺառանգության՚ հետ: Իսկ ՕԵԿ-ը ՀՀԿ-ի համար բավական կանխատեսելի գործընկեր է, շատ հարցերում համագործակցել են, սակայն ներկայումս ՕԵԿ-ի ռեսուրսային պոտենցիալը, կարծում եմ, բավարար չէ իշխանական կոալիցիայում լինելու համար՚:

ԱՐՄԵՆՈՒՀԻ ՀԱԿՈԲՅԱՆ