ՙՈՎ Է ՍՏԱԽՈՍԸ

ՈՎ Է ՍՏԱԽՈՍԸ

ՀԱԿ-ի պատգամավորական յոթնյակի մանդատ վերցնել-չվերցնելու հարցը ստանում է նորանոր զարգացումներ: Ինչպես հայտնի է, Պետրոս Մակեյանը հայտարարել էր, որ, ըստ քաղխորհրդի նախապես ընդունած որոշման, ընտրություններից հետո ՀԱԿ-ի քաղխորհուրդը պետք է քննարկեր ընտրությունների արդյունքները եւ մանդատների վերաբերյալ հարցը:
Դրան ի պատասխան Լեւոն Տեր-Պետրոսյանը հայտարարեց. ՙԽորհրդարանական ընտրություններին մասնակցելու որոշումը կայացել է ՀԱԿ ընտրական դաշինքին մաս կազմող բոլոր կուսակցությունների եւ հասարակական կազմակերպությունների միահամուռ համաձայնությամբ: Որեւէ այլ որոշում կապված ընտրությունների արդյունքներից, կամ Կոնգրեսի պատգամավորական խմբակցության թվաքանակից բխող գործողությունների վերաբերյալ, չի ընդունվել: Առավել եւս, երբեւէ չի դրվել, որեւէ պարագայում, պատգամավորական մանդատից հրաժարվելու հարցը՚: Այսպիսով, ըստ Լեւոն Տեր-Պետրոսյանի` Մակեյանը պարզապես սուտ է խոսում:
Սակայն իր հերթին Լեւոն Տեր-Պետրոսյանին ՙսուտ է հանում՚ ՀԱԿ-ի անդամ Հայաստանի Ազատական առաջադիմական կուսակցության նախագահ Հովհաննես Հովհաննիսյանը, որը խոսելով ՀԱԿ-ի խորհրդարան մտնել-չմտնելու հարցի շուրջ, տեղեկացնում է, որ որեւէ նման քննարկման չի մասնակցել եւ ԱԺ մտնելու մասին որոշումը լսել է ՀԱԿ-ի վերջին հանրահավաքում: ՙԻնձ նման քննարկման չեն հրավիրել: Ինչ վերաբերում  է հետագայում պարզաբանումներ ինձ տվել են, թե ոչ` չէ°, չեն տվել՚: Այսինքն, Հ. Հովհաննիսյանը ոչ միայն ակնկալում էր, որ պետք է լինի ՀԱԿ-ի քաղխորհրդի նիստ խնդրո առարկա հարցի շուրջ, այլ նաեւ ակնկալում էր պարզաբանումներ, թե ինչու է Լեւոն Տեր-Պետրոսյանը հանրահավաքում հայտնել, որ ՀԱԿ-ը գնալու է խորհրդարան: Այսպիսով, այն հարցը, թե ով է ստախոսը Լեւոն Տեր-Պետրոսյանը թե Պետրոս Մակեյանն ու Հովհաննես Հովհաննիսյանը, առայժմ մնում է բաց:

Ա. Օ.