ՄՐՑԱՆԱԿՆԵՐ` ՄԻՋԱԶԳԱՅԻՆՈՒՄ, ԲԱՅՑ...

ՄՐՑԱՆԱԿՆԵՐ` ՄԻՋԱԶԳԱՅԻՆՈՒՄ, ԲԱՅՑ...

Մոսկվայում ավարտված օլիմպիական չեմպիոն Վալերի Պոպենչենկոյի հիշատակը հավերժացնող բռնցքամարտի միջազգային ավանդական մրցաշարում ՀՀ վաստակավոր մարզիչ, հավաքականի երկրորդ մարզիչ Ֆեդյա Ալեքսանյանի ուղեկցությամբ ռինգ ելած Հայաստանի բոլոր հինգ պատվիրակները դարձան մրցանակակիր:
Արարատի մարզի ներկայացուցիչ Տիգրան Արմենակյանը (81 կգ) նախնական փուլերում հաղթանակներ տարավ եւ մտավ եզրափակիչ: Բայց վճռական մենամարտը նա տանուլ տվեց ու բավարարվեց երկրորդ տեղով:
Նրա թիմակիցներ, արարատցի Բարեղամ Հարությունյանը (52 կգ), վանաձորցի Գագիկ Գեւորգյանը, երեւանցի Կարեն Տոնականյանը (երկուսն էլ` 60 կգ) եւ էջմիածինցի գերծանրքաշային Հակոբ Մելքումյանը տեղ գտան պատվանդանի երրորդ աստիճանին:
Իսկ մայիսի 13-ին Հայաստանի հավաքականի վեց մարզիկներ, գլխավոր մարզիչ, վաստակավոր մարզիչ Կարեն Աղամալյանի ղեկավարությամբ մեկնեցին Մինսկ: Այնտեղ հայ բռնցքամարտիկները կմասնակցեն միջազգային խոշոր մրցաշարի, որտեղ ավանդաբար հանդես են գալիս կաշվե ձեռնոցի բազմաթիվ հեղինակավոր վարպետներ:
Նրանց հետ պայքարի կբռնվեն երեւանցիներ Կորյուն Սողոմոնյանը (52 կգ), Հրանտ Սարգսյանը (56 կգ), Արթուր Քիրաջյանը (64 կգ), Վլադիմիր Մարգարյանը (69 կգ), գյումրեցի Հովհաննես Բաչկովը (60 կգ) եւ Լոնդոնի օլիմպիական խաղերի, ցավոք, մեր միակ մասնակից, էջմիածինցի Անդրանիկ Հակոբյանը (75 կգ):
Հաղթողները հայտնի կդառնան մայիսի  20-ին:
Իհարկե, առջեւում միջազգային մրցաշարեր են, Եվրոպայի, աշխարհի առաջնություններ, սակայն ամեն դեպքում ցավալի է, որ Հայաստանից 2012 թվականի Լոնդոնի օլիմպիական խաղերին կմասնակցի միայն մեկ բռնցքամարտիկ: Եվ ստացվում է, որ չորսամյա փուլը ձախողվել է, եւ այսօրվանից արդեն սկսվել է 2016 թվականի օլիմպիական խաղերին նախապատրաստվելու փուլը:

Պատրաստեց Ռ. ԹԱԹՈՅԱՆԸ