ՙՀՀԿ-Ն ՈՒ ԲՀԿ-Ն ՑՈՒՅՑ ՏՎԵՑԻՆ ԼԱՎԱԳՈՒՅՆ, ԻՍԿ ՀՅԴ-Ն ՈՒ ՕԵԿ-Ը` ՎԱՏԱԳՈՒՅՆ ԱՐԴՅՈՒՆՔՆԵՐ

ՀՀԿ-Ն ՈՒ ԲՀԿ-Ն ՑՈՒՅՑ ՏՎԵՑԻՆ ԼԱՎԱԳՈՒՅՆ,
ԻՍԿ ՀՅԴ-Ն ՈՒ ՕԵԿ-Ը` ՎԱՏԱԳՈՒՅՆ ԱՐԴՅՈՒՆՔՆԵՐ

Եվ այսպես, Կենտրոնական ընտրական հանձնաժողովը հրապարակեց ԱԺ ընտրությունների վերջնական արդյունքները: Հանրապետական կուսակցությունը գրանցեց իր լավագույն արդյունքը, սկսած 1990 թվականից, ստանալով 44 տոկոս եւ ձեռք բերելով 69 մանդատ: Նշենք, որ առանձին ցուցակով ՀՀԿ-ն ընտրություններին մասնակցել է 2003 թվականից սկսած, երբ ստացել է ձայների 22,5 տոկոսը: Իսկ 2007 թվականին հասել է 34 տոկոսի սահմանին:
Երկրորդ տեղում է ԲՀԿ-ն, որը երկրորդ անգամ մասնակցելով խորհրդարանական ընտրություններին կրկնապատկել է 2007-ի իր ստացած տոկոսը գերազանցելով 30 տոկոսի սահմանագիծը: ՀԱԿ-ը թեեւ որպես դաշինք առաջին անգամ է մասնակացում ընտրություններին, սակայն ՀԱԿ-ի անդամ կուսակցությունները եւ 2007-ին, եւ 2003-ին, եւ 1999-ին ստանում էին շատ ցածր տոկոսներ: Այսպես, 2003-ին ՀՀՇ-ն ստացել էր 0,6 տոկոս: Այնպես որ, ՀԱԿ-ի ներկայիս 7 տոկոսը կարելի է իրենց համար հաջողություն համարել:
ՀՅԴ-ն ցույց տվեց իր պատմության մեջ ամենավատ արդյունքը: 1999-ին նա գրանցեց 7 տոկոս, 2003-ին` 11, 2007-ին` 13, իսկ այս անգամ հազիվ մի կերպ գերազանցեց 5 տոկոսի նվազագույն շեմը:
Նույնը վերաբերում է ՕԵԿ-ին, որի լավագույն  արդյունքը 2003-ին էր` 11,8 տոկոս, իսկ այնուհետեւ ընտրությունից ընտրություն ՕԵԿ-ի քվեները նվազեցին:
Ինչ վերաբերում է ՙԺառանգությանը՚, ապա այդ կուսակցությունը երկրորդ անգամ է մասնակցում ընտրություններին, հավաքելով մոտավորապես նույն տոկոսը, սակայն պետք է նշել, որ այս անգամ այդ արդյունքը նվաճվել է Ազատ դեմոկրատների հետ միասին: Հետեւաբար, կարելի է ասել, որ ՙԺառանգությունը՚ գրեթե կիսով չափ նվազեցրել է իր արդյունքները:
Պետք է նշել, որ տարբեր ցուցակների կազմում հանդես գալով մի շարք կուսակցություններ ունեցան իրենց ներկայությունը ԱԺ-ում ի դեմս իրենց ղեկավարների: Խոսքը գնում է ՀԺԿ-ի, ՙԱզգային միաբանության՚, ՍԻՄ-ի, ՄԱԿ-ի, ՀՔԴՄ-ի, ՄԻԱԿ-ի մասին: Այդ կուսակցությունների համար, որոնք բազմաթիվ անգամ մասնակցել են խորհրդարանական ընտրություններին, սա լավագույն արդյունքը չէ, սակայն նախորդ` 2007 թվականի ընտրությունների համեմատ նրանք բարելավել են իրենց դիրքերը քաղաքական դաշտում:

Ա. Օ.