ԱՇՈՏ ՎԱՐԴԱՊԵՏՅԱՆԸ ԱՆԱՆԴ-ԳԵԼՖԱՆԴ ՄՐՑԱԽԱՂԻ ԳԼԽԱՎՈՐ ՄՐՑԱՎԱՐՆ Է

ԱՇՈՏ ՎԱՐԴԱՊԵՏՅԱՆԸ ԱՆԱՆԴ-ԳԵԼՖԱՆԴ ՄՐՑԱԽԱՂԻ ԳԼԽԱՎՈՐ ՄՐՑԱՎԱՐՆ Է

Մայիսի 11-28-ը Ռուսաստանի Դաշնության մայրաքաղաք Մոսկվայում` Տրետյակովյան պատկերասրահի Ինժեներական սրահում, կանցկացվի շախմատի աշխարհի թագի համար մրցամարտը, որում աշխարհի գործող չեմպիոն Վիշվանաթան Անանդը (Հնդկաստան) չեմպիոնի տիտղոսը պետք է պաշտպանի հավակնորդ, իսրայելցի գրոսմայստեր Բորիս Գելֆանդի հետ պայքարում:
Այս մասին տեղեկացնում է armchess.am-ը, ապա հավելում, որ աշխարհի առաջնության մրցախաղի գլխավոր մրցավարն է միջազգային կարգի մրցավար Աշոտ Վարդապետյանը (Հայաստան): Շախմատային աշխարհի այս ամենաբարձրակարգ մրցաշարի գլխավոր մրցավար լինելը, իհարկե, մեծ պատիվ է ինչպես անձամբ մրցավարի, այնպես էլ մեր երկրի համար: Աշխարհում միջազգային մրցավարները քիչ չեն, սակայն ամեն մեկին չի վստահվում այդ պատվաբեր պարտականությունը: Դրա համար պետք է բավարարել մի ամբողջ շարք պարտադիր պայմաններ, որոնցից ամենագլխավորը երկուսն են: Նախ` ՖԻԴԵ-ն պետք է տա իր համաձայնությունը, ապա, եւ սա, թերեւս, ավելի առաջնային է, չեմպիոնն ու հավակնորդը պետք է վստահեն նրան:
Եվ դեռ անցյալ տարի հայկական մամուլը, մասնավորապես` ՙԱռավոտը՚, տեղեկացրել էր, որ թե° Անանդը, թե° Գելֆանդը միջազգային ֆեդերացիային դիմել էին` իրենց դիմակայության սպասարկումը հանձնարարել հայ մասնագետին:
Հիշեցնենք, որ, ըստ կանոնակարգի, չեմպիոնն ու հավակնորդը խաղալու են 12 պարտիա: Ոչ-ոքի` 6:6 հաշվի դեպքում մրցակիցները պետք է անցկացնեն 25 րոպեանոց չորս պարտիա: Եթե դա էլ ի հայտ չի բերում հաղթողին, մրցակիցները կմրցեն 5 րոպեանոց եւս երկու պարտիայում: Կրկին հավասարության դեպքում կազմակերպվելու է, այսպես կոչված, ՙՀանկարծակի մահվան՚ մրցամարտ, որտեղ սպիտակներին տրվելու է` 5, սեւերին` 4 րոպե: Եվ եթե դա էլ ավարտվի ոչ-ոքի, սեւերով խաղացող գրոսմայստերը կհռչակվի աշխարհի չեմպիոն:
Շախմատասերներին հիշեցնենք, որ գրոսմայստերները մրցելու են մայիսի 11-ին, 12-ին, 14-ին, 15-ին, 17-ին, 18-ին, 20-ին, 21-ին, 23-ին, 24-ին, 26-ին եւ 28-ին: Պարտիաները սկսվելու են Երեւանի ժամանակով ժամը 15-ին, իսկ դրանց ընթացքին անմիջականորեն կարող եք հետեւել armchess.am կայքում:

Պատրաստեց Ռ. ԹԱԹՈՅԱՆԸ