ՙԲԱՎԱՐԱՐՎԵՔ ՀԱՅՏԱՐԱՐՈՒԹՅԱՆ ՄԵՋ ԳՐՎԱԾՈՎ՚

ՙԲԱՎԱՐԱՐՎԵՔ ՀԱՅՏԱՐԱՐՈՒԹՅԱՆ ՄԵՋ ԳՐՎԱԾՈՎ՚

Ինչպես արդեն նշել էինք, մի քանի կուսակցություններ, որոնք մասնակցել եւ հաղթահարել են 7 տոկոսանոց շեմը, երեկ պետք է կատարեին իրենց հայտարարությունները ընտրությունների արդյունքների մասին: Եվ այսպես` ՀՅԴ-ն, որն այս ընտրություններում հավաքել է 86,3, իսկ նախորդին 177,9 ձայն, իր հայտարարության մեջ ասում է. ՙԸնտրությունները չարձանագրեցին ժողովրդի կամքը եւ քաղաքական ուժերի իրական հարաբերակցությունը: Սա նաեւ նշանակում է, որ քաղաքական ուժերը, այդ թվում ՀՅ Դաշնակցությունը, դեռ չեն կարողացել մեր հասարակության մեջ ազատ քաղաքացու, արժանապատվորեն ընտրություն կատարողի գիտակցություն արմատավորել՚: Այնուամենայնիվ, ի±նչ կերպ կմեկնաբանեն ընկեր դաշնակները ձայների կրկնակի գամ պակասելը` հարցով երբ դիմեցինք ՀՅԴ մամուլի պատասխանատու Սպարտակ Սեյրանյանին, վերջինս շարունակ մեզ փորձում էր համոզել, որ իրենց հայտարարության մեջ ամեն ինչ ասված է. ՙԱյդ հայտարարության մեջ ինչ որ գրված է բավարարվեք դրանով, որեւէ լրացուցիչ բան մեկնաբանելու եւ ավելացնելու եթե ունենայինք, կգրեինք: Մեր հայտարարության մեջ նշված է, թե ինչու են մեր ձայները պակասել, հարկավոր է այն ուշադիր կարդալ՚: Հավանաբար ընկեր դաշնակները իրենք հենց ուշադիր չեն կարդացել, թե ինչ են գրել, քանի որ ձայների գրեթե երեք անգամ պակասելու մասին ոչինչ չկար գրված:


ԹԵՄԱՆ ՓԱԿԵՑԻՆՔ, ՖՍՅՈ՚

ՙԺառանգություն՚ կուսակցությունում կռիվ է ընկել: Կուսակցության անդամ, թիվ 1 ընտրատարածքում պարտություն կրած անգլիասեր Ստյոպիկ Սաֆարյանը հայտարարել է, որ նա չէր էլ սպասում, որ պարտություն է կրելու, եւ որ այդ հարցում դեռ մտորումներ է ունենալու: Դե ինչ, որքան էլ պարոն Սաֆարյանը մտորումներ անի, միեւնույն է դժվար թե ինչ-որ բան փոխվի, բայց կուսակցության ներսում առաջացած խմորումների մասին Ս. Սաֆարյանը եւ կուսակցության մյուս անդամները լուրջ փաստի առաջ են կանգնել եւ կարծես ինչ-որ բան չեն կարողանում իրար հետ կիսել: Եթե ամփոփելու լինենք այս կուսակցության հավաքած ձայների տվյալները, ապա կտեսնենք, որ ՀՀ տարածքում նրանք հավաքել են 87700 ձայն, իսկ եթե դրանք բաշխվում է թեկնածուների կողմից հավաքած մեծամասնական եւ համամասնական ձայների, ապա ստացվում է.
Ստյոպա Սաֆարյան` 9300 մեծամասնական եւ 3800 համամասնական,
Զարուհի Փոստանջյան` 6800 եւ 4100,
Անահիտ Բախշյան` 5300 եւ 3100,
Արմեն Մարտիրոսյան` 4700 եւ 3500,
Ռուբիկ Հակոբյան` 4200 եւ 3400,
Գառնիկ Սահակյան` 2400 եւ 2300:
Ակնհայտ երեւում է, որ  Ս. Սաֆարյանը ունի 13100 ձայն, Զարուհի Փոստանջյանը 10900 ձայն, Ա. Մարտիրոսյանը 8200, իսկ Ռուբիկ Հակոբյանը, ով մեծամասնականով եւ համամասնականով հավաքել է ընդամենը 7600 ձայն, այսինքն` ԱԺ-ի ամբիոններից բազում անգամներ ելույթ ունեցած եւ հարցեր բարձրացած անգլիասեր պարոն Սաֆարյանի ձայների կեսը, կհայտնվի խորհրդարանում տիկին Փոստանջյանի հետ միասին: Դե արի ու մի սիրտդ տրաքացրու, ով աշխատի, ով գնա ՙսանատորիա՚:
Այս կապակցությամբ ՙԺառանգության՚ ներսում կա տրամադրվածություն այն մասին, թե ինչու պետք է առավել քիչ ձայն հավաքողները, հանձինս` Ռուբիկ Հակոբյանի եւ Զարուհի Փոստանջյանի, փոխարինեն շատ ձայն հավաքողներին նոր ԱԺ-ում: Կուսակցության ներսում առաջացած լարվածության մասին լուրերը Ստյոպա Սաֆարյանը մեզ հետ զրույցում չհերքեց, սակայն հրաժարվեց հարցազրույց տալուց` ասելով. ՙԵս հարցազրույց չեմ տալիս, փակեցինք թեման, ֆսյո՚:

ԱՐՄԵՆՈՒՀԻ ՀԱԿՈԲՅԱՆ