ՇՏԻԳԼԻՑ-ԱԲՐԱՀԱՄ` ՕԳՈՍՏՈՍԻ 25-ԻՆ

ՇՏԻԳԼԻՑ-ԱԲՐԱՀԱՄ` ՕԳՈՍՏՈՍԻ 25-ԻՆ

Պրոֆեսիոնալ բռնցքամարտի երկրորդ միջին քաշային կարգում WBO վարկածով աշխարհի չեմպիոն Ռոբերտ Շտիգլիցն օրերս միավորներով վստահ հաղթանակ է տարել տիտղոսի հավակնորդ ավստրալացի Նադեր Համդանի նկատմամբ:
Գերմանիայի Էրֆրուտ քաղաքում կայացած մենամարտում Շտիգլիցը գերիշխել է բոլոր 12 ռաունդների ընթացքում, սակայն չի կարողացել մրցակցին նոկաուտի ենթարկել: Մրցակիցն ամուր կամք է դրսեւորել եւ, չնայած դեմքի պատռվածքին, դիմացել է մինչեւ վերջ: Մրցավարները 117:111, 117:111, 120:108 հաշվով հաղթանակը շնորհել են Կրասնոդարի Եյսկ քաղաքում ծնված Ռոբերտ Շտիգլիցին, որը 42-րդ հաղթանակը տարավ պրոֆեսիոնալ ռինգում:
Այժմ Շտիգլիցը պետք է անցկացնի տիտղոսի պարտադիր պաշտպանություն: Պաշտոնական հավակնորդը աշխարհի նախկին չեմպիոն Արթուր Աբրահամն է: Մենամարտը նախատեսվում է անցկացնել օգոստոսի 25-ին:
Ինչպես գիտեք, հայ պրոֆեսիոնալ բռնցքամարտիկ ԱՐԹՈՒՐ  ԱԲՐԱՀԱՄԸ վերջերս մամուլի ասուլիս էր տվել, որի ժամանակ մասնավորապես նշելէր. ՙԻնձ համար հաճելի է, որ գրեթե ամեն մենամարտից հետո հնարավորություն է լինում գալ հայրենիք ու ոգեշնչվել՚:
Նա խոսել է հիմնականում վերջին հաղթանակների մասին.
ՙՖարիասի դեմ մենամարտը համեմատաբար հեշտ անցավ, իսկ վերջին մենամարտը լեհ մարզիկի հետ ավելի բարդ ստացվեց. շատ չարչարվեցի, բայց կարեւորը, որ հաղթեցի: Այս հաղթանակը թույլ տվեց ինձ որակավորվել՚:
Իսկ ահա Աբրահամից կրած պարտությունից հետո Պյոտր Վիլշեւսկին հայտարարել էր, թե Աբրահամն անազնիվ մենամարտ անցկացրեց` հարվածներ հասցնելով մարմնի արգելված մասերին:
Դրան այսպես է պատասխանել մեր հայրեմակիցը. ՙՊատահում է: Նա էլ մեջքիս էր հարվածում, բայց ես չեմ բողոքում: Սա բռնցքամարտ է, ու չես կարող միշտ ուղիղ հարվածել: Դա նորմալ է, քանի որ սպորտում ամեն ինչ կարող է պատահել՚:
Վերջին մրցամարտը 12 ռաունդ տեւեց, թեեւ շատերը, ինչպես Շտիգլից-Համդան մենամարտից էին ակնկալում, այս դեպքում էլ Արթուրը պետք է նոկաուտի ենթարկեր մրակցին: Մեր հայրենակիցը դրա պատասխանն էլ ունի. ՙԱմեն մարզիկի չես կարող նոկաուտի ենթարկել: Ի վերջո,  դիմացինդ ՙտանձիկ՚ չէ, նա էլ ցանկանում լավ կարիերա ստեղծել՚:
Ի դեպ, Արթուր Աբրահամը միայն բռնցքամարտով չէ տարված ու այլ ծրագրեր էլ ունի. ՙՀայաստանի հետ կապված մեծ ծրագիր ունեմ, Ներքին Չարբախում մշակութային կենտրոն ենք բացելու: Դա տեւական ժամանակ է պահանջում: Հատուկ ՙՆերքին Չարբախ՚ հիմնադրամ ենք բացել ու աշխատում ենք Գերմանիայի հետ: Այժմ միայն բռնցքամարտի մասին եմ մտածում, իսկ դա կանենք մի քանի տարի հետո՚:
Հայտնի դարձավ նաեւ, որ ամեն անգամ Արթուրն իր հաղթանակած ձեռնոցները նվիրում է հիմնադրամի, որն այդ ձեռնոցներից ստացված եկամուտով օգնում է հիվանդ երեխաներին:
Աբրահամին հարց ուղղվեց նաեւ անձնական կյանքի վերաբերյալ, որին նա այսպես արձագանքեց. ՙԱնձնական կյանքում անակնկալ կա, որի մասին շուտով կասեմ՚:
Երկար տարիներ Գերմանիայում բնակվող մեր հայրենակցին դուր չի գալիս փողոցների վիճակը. ՙԵթե կեղտոտողներին 5 կամ 10 հազար դրամ տուգանեն, ապա նրանք հաջորդ անգամ չեն կրկնի՚:
Հույս ունենանք, որ Արթուր Աբրահամը հաջողությամբ կհաղթահարի Շտիգլիցի արգելքը (իսկ դա, խոստովանենք, անչափ դժվար է լինելու), իսկ շուտով էլ կիմանանք նրա անձնական կյանքի անականկալի մասին:

Պատրաստեց Ռ. ԹԱԹՈՅԱՆԸ