ՙՙՙՙՈՎՔԵՐ ԵՆ ՓԱՅՓԱՅՈՒՄ ԲՈՑԱՎՏԱՆԳ ԿԱՅԾԸ

ՈՎՔԵՐ ԵՆ ՓԱՅՓԱՅՈՒՄ ԲՈՑԱՎՏԱՆԳ ԿԱՅԾԸ

Ապրիլի 29-ին Մաշտոցի պուրակում տեղի ունեցած իրադարձությունների կապակցությամբ մայիսի 1-ի ոստիկանության հայտարարությունը, առաջին հերթին, ուշացած է, երկրորդ` սադրիչ է: Անշուշտ, սա ծայրահեղ սուբյեկտիվ գնահատական է, սակայն եւ կյանքի փորձը ցույց է տալիս, որ մեկ-մեկ նման գնահատականները նպաստում են հասունացող այլ ծայրահեղությունների վնասազերծմանը…
Փաստ է, որ մայրաքաղաքի կենտրոնական փոքր մի տարածքում առկա է մեծ խնդիր: ՙՄեծ՚` որովհետեւ այդ խնդիրը առաջացրել է, մեղմ ասած, ոչ փոքր հետաքրքրություն անգամ բնակչության այն մասի մոտ, որը պատկերացում չունի ու չի էլ ուզում իմանալ, թե ինչում է հարցի էությունը: Իսկ նրանք, ովքեր անցնում են այդ տարածքի կողքով, ականատես են դառնում այն տեսարանին, երբ կոկիկ հագնված երիտասարդները բարեհամբույր զրույցներ են տանում ոստիկանության գնդապետների եւ վերջիններիս ստորադրյալների հետ…
Եվ ՙհանկարծ՚` ընդհարում, որի ՙամենադրական՚ գնահատականն այն է, որ միջադեպը ավարտվել էր ՙոստիկանության աշխատակիցների կողմից առանց հատուկ հնարքների կամ միջոցների գործադրման՚:
Նպատակ չունեմ նսեմացնելու Մաշտոցի պուրակում հավաքվող երիտասարդների եւ իրավապահ մարմինների ՙառաքելությունը՚, սակայն ինձ անձամբ հետաքրքրում են ոչ այնքան ծագած խնդիրները, որքան դրանք չլուծելու դիտավորությունը: Այն տպավորությունն է, որ ինչ-որ մեկը, երկուսը կամ… մտադրություն ունեն հանգուցալուծել այն` այլ ՙխնդիրների՚ հետ համակցված` մայիսի 6-ից հետո…



ՓՈՂԱՄՈԼ ԳԱԶԱՆԻ ՀԵՐԹԱԿԱՆ ԶՈՀԸ

Մայրաքաղաքում արձանագրվել է եւս մի դեպք, երբ արյունոտ, ՙհեշտ՚ վաստակ որոնողի կամ որոնողների ձեռքից սպսնվել է զառամյալ ու, հավանաբար, միակ անձը:
Ապրիլի 28-ին, ժամը 22:15-ին, ոստիկանության Երեւան քաղաքի վարչության հերթապահ մասից Մալաթիայի բաժնում հաղորդում է ստացվել, որ իրենց է զանգահարել Բաբաջանյան փողոցի 3/1 շենքի բնակչուհիներից մեկն ու հայտնել, որ  իր հարեւանուհի տատիկը նույն շենքի թիվ 21 բնակարանում կապկպված ընկած է գետնին, իսկ տունը տակնուվրա է արված: Դեպքի վայր ժամանած ոստիկանների աչքերին ՙներկայացել՚ է 1934թ. ծնված Սիրուշ Պետրոսյանի դիակը` բռնության հետքերով, բերանը, ձեռքերն ու  ոտքերը կտորներով կապված:
Հարուցված քրեական գործից (104 հոդվածի 2-րդ մասի 8-րդ կետ) պարզ է դառնում, որ հանցագործության հիմնական վարկածն է` սպանություն` շահադիտական դրդապատճառներով:
Այնուամենայնիվ, կարծում ենք, որ իրավապահները կհամաձայնեն այն կարծիքին, որ չարագործի (չարագործների) գործողությունները հանգուցյալ 78-ամյա տատիկի նկատմամբ եղել են դաժան, եւ ըստ այդմ ՙկհարստացնեն՚ քրեական գործ հարուցելու մասին որոշումը:  

Ա. ԱԲԳԱՐՅԱՆ