ՙՙԳյումրիի քաղաքապետ Վարդան Ղուկասյանի...

ԲԱՄԲԱՍԱՆՔ
ԽՄԲԱԳՐՈՒԹՅՈՒՆԸ ԶԳՈՒՇԱՑՆՈՒՄ Է.
ԱՅՍ ԽՈՐԱԳՐԻ ՆԵՐՔՈ ՀՐԱՊԱՐԱԿՎԱԾԻ ՀԱՄԱՊԱՏԱՍԽԱՆՈՒԹՅՈՒՆՆ ԻՐԱԿԱՆՈՒԹՅԱՆԸ ՉԻ ԵՐԱՇԽԱՎՈՐՎՈՒՄ

Գյումրիի քաղաքապետ Վարդան Ղուկասյանի դստեր նշանածի` Կարեն Եսայանի սպանությունը թեեւ առաջին պահին ռումբի պայթյունի տպավորություն ունեցավ, սակայն դրանից հետո ոչ այդ պատմության մեջ ներառված կողմերից, եւ ոչ էլ իրավապահներից, ձայն ու ծպտուն չկա:

Միայն գյումրեցի ՙբարգավաճած՚ ԱԺ պատգամավոր ու տեղի ԲՀԿ-ի նախընտրական կոմպանիան ղեկավարող Մարտուն Գրիգորյանն էր, որ սպանությունից հետո մի երկու արդարացում, մի երկու հատ էլ Վ. Ղուկասյանին հասցեագրված մեղադրանք հնչեցրեց ու ինքն էլ լռեց: Այդ լռության հետ կապված առիթ ունեցել ենք տեղեկացնել, որ կա հանձնարարական` այս պահին նախընտրական կրքերն այդ թեմայով չշիկացնել: Բայց նաեւ կան խոսակցություններ, որ սպանության հիմնական կասկածյալը` Անիի տարածաշրջանի նախկին ոստիկանապետ Սամվել Սարգսյանի որդին` Հարությունը, ում անունը քավոր-սանիկային թելերով կապում էին Մ. Գրիգորյանի հետ, կալանավորումից հետո այնպիսի ուշագրավ մանրամասներ է պատմել ոստիկաններին, որ ընտրություններից հետո հավանաբար նա մենակ չի մնալու վանդակաճաղերի ետեւում: Գյումրիում շարունակվում են խոսակցությունները, որ այդ պատմությունների մեջ հիշատակվում է նաեւ Մ. Գրիգորյանի անունը: Հավանական է, այս ընտրություններից հետո նա կորցնելու է պատգամավորի մանդատը, դրանից բխող անձեռնմխելիությամբ հանդերձ: Եվ եթե չհաջողացնի վերընտրվել, ապա, ըստ նույն աղբյուրների, ամենեւին էլ չպետք է բացառել, որ պրն Գրիգորյանը կարող է լուրջ խնդիրների առաջ կանգնել: Իսկ վերընտրվելու հարցն այս պահին, մեղմ ասած, երաշխավորված չէ, քանի որ նրա հիմնական հակառակորդ Արման Սահակյանի թիկունքին կանգնած է ոչ միայն ՀՀԿ-ն ու քաղաքապետ Վ. Ղուկասյանը, այլ բավականին զորեղ մի շարք այլ հեղինակավոր ուժեր եւս, այդ թվում` դրսից: Իսկ Մ. Գրիգորյանի թիկունքը այս պատմության պատճառով բավականին դատարկվել է, քանի որ ոմանք գերադասել են ՙշառից ու փորձանքից՚ հեռու մնալ: Այնպես որ, Գյումրիի հիշատակված կրակոցի ձայնը առաջիկայում դեռ լսվելու է: