ՙՄՇԱԿՈՒՅԹԸ ՆԱԽԸՆՏՐԱԿԱՆ ԾՐԱԳՐԵՐՈՒՄ

ՄՇԱԿՈՒՅԹԸ ՆԱԽԸՆՏՐԱԿԱՆ ԾՐԱԳՐԵՐՈՒՄ

Ընտրություններին մասնակցող ուժերից յուրաքանչյուրը փորձում է ժողովրդին ցույց տալ, թե ինչին է անդրադառնալու, ինչն է փոխելու: Եվ դա հիմնականում ներկայացվում է նախընտրական ծրագրի միջոցով, որտեղ ներառված են մեր կյանքի բոլոր բնագավառները: Այսօր կփորձենք ներկայացնել երեք կոալիցիոն կուսակցությունների` մշակույթին վերաբերող ծրագրերը:
ՀՀԿ-ի ծրագրում մասնավորապես ասված է, որ ստեղծելու են նպաստավոր պայմաններ հայ հոգեւոր ու մշակութային ժառանգության պահպանման, ազգային արժեքների եւ ավանդույթների վերարտադրության ու զարգացման համար: Նաեւ համոզված են, որ պետպատվերի տեղադրումը նպաստելու է երաժշտության, ֆիլմերի, հեռուստահաղորդումների, գրքերի միջոցով ազգային եւ  համամարդկային արժեքների տարածմանը: ՀՀԿ-ն ծրագրում է ազգային երգ ու պարի դասավանդում դպրոցում, ինչպես նաեւ ազգային մշակույթի տարրերի ավելացում կրթական ծրագրերում:

Նրանք պատրաստվում են ապահովել մշակութային ծառայությունների մատչելիությունը, հասանելիությունը, բազմազանությունը, համաչափությունը հանրապետության ամբողջ տարածքում: ՀՀԿ-ն խոստանում է ստեղծել լրացուցիչ հնարավորություններ ազգային փոքրամասնությունների ամբողջական մշակութային դրսեւորման համար: Նրանք ակտիվորեն համագործակցելու են Հայ Առաքելական եկեղեցու հետ` հայ ընտանիքի բարոյական նորմերի պահպանման, մատաղ սերնդին անցանկալի ազդեցություններից զերծ պահելու եւ հայեցի դաստիարակություն տալու նպատակով: Նաեւ ամրապնդելու են մշակույթի ոլորտի աշխատողների սոցիալական պաշտպանվածությունը: Մշակույթի ոլորտում ներդնելու են տեղեկատվական հեռահաղորդակցական նոր տեխնոլոգիաներ եւ զարգացնելու են մշակութային ժամանակակից ենթակառույցները` հայ արվեստի համար ստեղծելով միջազգային ասպարեզում ըստ արժանվույն գնահատվելու հնարավորություն եւ համաշխարհային մշակութային գործընթացներին ակտիվ մասնակցություն...
ԲՀԿ-ն կարեւորում է հանրապետության յուրաքանչյուր քաղաքացու ազգային ինքնության եւ մշակութային ժառանգության պահպանումը, ինչպես նաեւ հոգեւոր զարգացման ոլորտում նրանց իրավունքների պաշտպանությունը: Պետական քաղաքականության կարեւորագույն խնդիրներ պետք է դիտարկվեն ՙՄշակույթի զարգացման հայեցակարգի՚ մշակումը եւ բնակչության հոգեւոր, կրթական ու բարոյական դաստիարակության բնագավառում պետական ծրագրային քաղաքականության իրականացումը, հոգեւոր-մշակութային ժառանգության, ազգային ավանդույթների, համամարդկային արժեքների եւ նորմերի պահպանման, ինչպես նաեւ մշակութային կազմակերպությունների գործունեության եւ ստեղծագործ աշխատանքի իրականացման համար անհրաժեշտ պայմանների ապահովումը, հայոց լեզվի եւ  խոսքի ճիշտ գործածման դերի բարձրացումը: Կարեւորվում է նաեւ պատմամշակութային ժառանգության պահպանումը, միջազգային իրավունքի սկզբունքներին եւ նորմերին համապատասխան` այլ պետությունների տարածքներում գտնվող հայկական պատմական եւ մշակութային արժեքների պահպանությունը, ինչպես նաեւ հայ կրթական ու մշակութային կյանքի զարգացմանն աջակցությունը: Խոստանում են պետական ծրագրերի իրականացմամբ Հայաստանում բնակվող ազգային փոքրամասնությունների ազգային, մշակութային եւ մյուս իրավունքների պաշտպանություն, նրանց մայրենի լեզվի, կրոնի եւ մշակույթի պահպանմանն ու հետագա զարգացմանն աջակցությունը, այդ թվում` հեռուստատեսությամբ եւ  ռադիոյով հաղորդակցման հնարավորությունների ընդլայնումը:
Պատրաստվում են իրականացնել պատմության եւ  մշակույթի հուշարձանների, թանգարանային եւ  գրադարանային ֆոնդի պահպանության ծրագրեր... Մարզերում կփորձեն վերածնել թատրոնների, թանգարանների, արվեստների, ազգային արհեստների եւ ստեղծագործական ինքնագործունեության մյուս ձեւերը...   
ԲՀԿ-ն համոզված է, որ հայ ժողովրդի հոգեւոր կյանքում եւ  ազգային մշակույթի զարգացման ու ազգային ինքնության պահպանման գործում բացառիկ դեր ունեցող Հայաստանյաց առաքելական եկեղեցու եւ պետության փոխհարաբերությունները պետք է կարգավորվեն օրենքով: Նա պետք է ունենա ՀՀ ամբողջ տարածքում քրիստոնեական արժեքները եւ ուսմունքն ազատորեն քարոզելու, ինչպես նաեւ վտանգավոր ու ծայրահեղական աղանդների դեմ հակաքարոզչություն իրականացնելու, դպրոցներում եկեղեցու պատմության եւ բուհերում կրոնագիտական առարկաների դասավանդմանն աջակցելու լիարժեք հնարավորություններ:
ՕԵԿ-ի ծրագրով մշակույթը երկրի այցեքարտն է, եւ պետության պարտքն է ազգային մշակույթի պահպանումն ապագա սերունդների համար: ՕԵԿ-ն անհրաժեշտ է համարում պատմամշակութային ժառանգության պահպանմանը պետական աջակցության ցուցաբերումը, ժամանակակից, ժողովրդական եւ կիրառական արվեստների ներդաշնակ զարգացման ապահովումը: Նաեւ կարեւորում է մշակութային ու արվեստի նշանակալի նվաճումների հեղինակների խրախուսումը եւ մեծարումը, պատմամշակութային ժառանգության դեմ ոտնձգությունների հանդեպ օրենսդրական կոշտ միջոցների կիրառումը: Նրանք մեծ դեր են հատկացնում մշակութալուսավորչական հաստատությունների, մանկապատանեկան գեղարվեստական դպրոցների, ինքնագործ խմբակների եւ  երեխաների ստեղծագործական ակտիվության զարգացման համար նպաստավոր պայմանների ստեղծմանը:
ՕԵԿ-ը դեմ է հեռուստատեսությամբ քարոզվող կրիմինալին, բռնությանն ու գռեհկությանը, պատրաստվում է զարգացնել Սփյուռքի եւ արտերկրի հետ մշակութային համագործակցության, տարածաշրջանային եւ միջազգային ծրագրերին մասնակցության ապահովումը, արտասահմանում հայկական մշակույթի համակարգված ու արժանավայել ներկայացումը:
Եվ ի վերջո, ՕԵԿ-ն անհրաժեշտ է համարում մտավորականության` որպես ազգային ոգու կրողի, պետական կառավարման գործընթացներին ներգրավումը, նրանց ներուժը համազգային խնդիրների լուծման մեջ առավել արդյունավետ օգտագործումը...
Կփորձենք ներկայացնել նաեւ մյուս կուսակցությունների մշակութային ծրագրերը, ապա համեմատել դրանք:

ԼԱՈՒՐԱ ԲԱԼԱՅԱՆ
Հայ-ռուսական (սլավոնական)
համալսարանի ժուռնալիստիկայի
ֆակուլտետ, 2-րդ կուրս