ԻՆՉ ՄԱՅԻՍԻ 1, ՔՎԵ Է ՊԵՏՔ, ՔՎԵ...

ՙԻՆՉ ՄԱՅԻՍԻ 1, ՔՎԵ Է ՊԵՏՔ, ՔՎԵ...

Թե ինչպես կտոնի Մայիսի 1-ը ՙընկերվարական՚ ՀՅԴ-ն` բավական դժվար էր պարզել, քանի որ խմբակցության ղեկավար Վահան Հովհաննիսյանը չցանկացավ պատասխանել մեր հարցին` պատճառաբանելով, որ ցանկություն չունի:

Այդպես էլ չհասկացանք` պարոն Հովհաննիսյանը Մայիսի 1-ը տոնելո±ւ հավես չուներ, թե± քարոզարշավի գնալու: Բայց ավելի ուշ ՀՅԴ Գերագույն մարմնի մամլո խոսնակ ՍՊԱՐՏԱԿ ՍԵՅՐԱՆՅԱՆԻՑ պարզեցինք, որ տոնը չի խանգարի ընտրարշավին. ՙԱյսօր մայիսմեկյան շեշտադրումով ենք քարոզչությունը տանելու: Ընտրարշավում մեր բոլոր միջոցառումների թեման կլինի հենց Մայիսի 1-ը՚:
Դե ինչ, տոնը տոն, բայց ընտրությունները սարերի հետեւում չէ, ու փաստորեն թքած ՙսովետական՚ չարչարկված տոնի վրա, ձայն է պետք հավաքել:

ՀՐԱՆՏ ՍԱՐԱՖՅԱՆ

ՔԱՐՈԶԱՐՇԱՎԱՅԻՆ ՄԱՅԻՍՄԵԿԸ

Հայաստանի Կոմունիստական կուսակցությունը որոշել է մայիսմեկյան ավանդական տոնակատարությունները համեմել նախընտրական քարոզարշավով, ինչի մասին ՀԿԿ կենտկոմի առաջին քարտուղար ՌՈՒԲԵՆ ԹՈՎՄԱՍՅԱՆԸ տեղեկացրեց հետեւյալը. ՙԱյսօր ժամը 11:30-ին մեր շարասյուները հավաքվելու են Մարտիրոս Սարյանի արձանի մոտ, այնուհետեւ ժամը 12-ին նվագախմբի ուղեկցությամբ իջնելու ենք Մաշտոցի պողոտայով եւ անցնելու ենք Ամիրյան փողոցը: Վերջում Ստեփան Շահումյանի անվան հրապարակում տեղի կունենա հանրահավաք ինչպես Մայիսի 1-ի, այնպես էլ քարոզարշավի շրջանակներում՚:
Փաստորեն, այսօր ՀԿԿ-ն մի հարվածով երկու նապաստակ կկրակի: Ինչեւէ, շնորհավոր Աշխատավորության տոնը:

ՀՐԱՆՏ ՍԱՐԱՖՅԱՆ

ՙՀԱԼՎԱ՚ ԱՍԵԼՈՎ` ԱՐԱՄ ՄԱՆՈՒԿՅԱՆԻ ԲԵՐԱՆԸ
ՉԻ ՔԱՂՑՐԱՆԱ

ՀՀՇ վարչության նախագահ Արամ Մանուկյանը զգալով, որ ՀԱԿ-ին բոլորովին ձեռնտու չեն սոցիոլոգ Ահարոն Ադիբեկյանի սոցիոլոգիական հարցումները, սկսել է բավարարվել սեփական շահավետ հետազոտությամբ: Արդյունքում վերջինս գցել-բռնել ու որոշել է, որ ՀԱԿ-ը կլինի ընտրապայքարի առաջատարը, որի օգտին կքվեարկեն հասարակության 50 տոկոսից ավելին: Թե ինչպիսի± հոգեվիճակում է գտնվում նման հաշվարկներ անող Ա.Մանուկյանը, պարզեցինք հոգեբան ԿԱՐԻՆԵ ՆԱԼՉԱՋՅԱՆԻՑ. ՙԵթե մարդը ելույթ է ունենում ու ասում 50 տոկոսից ավելի ձայն  կհավաքենք, իհարկե, դա դեռ չի խոսում այն մասին, որ ինքն ունի այդ վստահությունը: Սա ներազդման բավականին էֆեկտիվ միջոց է, այսինքն` գոյություն ունի ինքնաներկայացման հոգեբանական երեւույթ: Օրինակ` դու կարող է շատ տխուր ես, բայց ներկայանում ես շատ ուրախ կամ փորձում ես ուրախ երեւալ եւ մարդիկ քեզ ընկալում են այդպիսին: Այսպիսով, կարողանում ես մարդկանց վրա որոշակի ազդեցություն գործել: Պարտադիր չէ խորանալ հարցերի մեջ, թե ի±նչ ընթացք ունի այս ընտրարշավը, բոլորը չէ, որ ունեն ճշմարտությանը մոտ ինֆորմացիա: Ռուսական ասացվածքն ասում է` լավ ժպիտ վատ խաղի ժամանակ: Փաստորեն, սա եւս ինչ-որ մի հնարք է, որը կարող է որոշակի տպավորություն թողնել: Բայց դա վիճակը չի փոխում, եւ ես համոզված եմ, որ իրենք շատ ճիշտ կարողանում են տեսնել ու սթափ գնահատել իրենց նկատմամբ ժողովրդի վերաբերմունքը՚:
Մեզ մնում է հուսալ, որ ՀԱԿ անդամի խաբկանքի նմանվող արտահայտությունները վարակիչ չի լինի ՀԱԿ մյուս անդամների համար:

ՀՐԱՆՏ ՍԱՐԱՖՅԱՆ