ԱԴՐԲԵՋԱՆԸ ԴՈՎԵՂ ԳՅՈՒՂՈՒՄ ՓՈՐՁԱՐԿԵՑ ՍԱԴՐԱՆՔԻ ԱՎԵԼԻ ՀՆՉԵՂ ՏԱՐԲԵՐԱԿԸ

ԱԴՐԲԵՋԱՆԸ ԴՈՎԵՂ ԳՅՈՒՂՈՒՄ ՓՈՐՁԱՐԿԵՑ ՍԱԴՐԱՆՔԻ ԱՎԵԼԻ ՀՆՉԵՂ ՏԱՐԲԵՐԱԿԸ

Ադրբեջանը կրկին ուզում է միջազգային հանրության ուշադրությունը սեւեռել իր կեղտոտ քայլերի վրա եւ այդ ամենից չոր դուրս գալու հույսեր է փափագում: Ինչպես նշված է ՊՆ հաղորդագրության մեջ. ՙԱպրիլի 25-ին հայ-ադրբեջանական սահմանագոտու հյուսիս-արեւելյան հատվածում արձանագրվել է հրադադարի ռեժիմի խախտման դեպք՚: Բայց ի տարբերություն թշնամու մնացյալ հրադադարի խախտման դեպքերից, Տավուշի մարզի Դովեղ գյուղի դեպքերն առանձնացան նրանով, որ ոչ միայն տարբեր տրամաչափի հրազենային զենքերից գնդակոծվել են պաշտպանական դիրքերը, այլեւ կրակոցներ են արձակվել գյուղի ուղղությամբ` վնասվել է գյուղի մանկապարտեզը եւ  ՙԳազ 53՚ մակնիշի ավտոմեքենան: Կարծես թե 1996 թվականից հետո նման դեպքեր չեն գրանցվել, եւ սա քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆԸ համարում է նոր վտանգավոր տենդենցի սկիզբ. ՙԱկնհայտ է, որ Ադրբեջանում որոշել են, որ պարզապես սահմանին սադրիչ գործողություններ իրականացնելը սովորական է դարձել եւ արժանի հնչեղություն չի ստանում: Գլխավոր նպատակն այն է, որ իրենք հնարավորություն ունենան անընդհատ նշելու, որ կոնֆլիկտը շարունակվում է եւ գտնվում է թեժ փուլում: Կարծում եմ, այդ է պատճառը, որ նրանք փորձում են ճանապարհներ գտնել ավելի մեծ հնչեղություն ստանալու համար, որպեսզի միջազգային հանրությունը արցախյան հակամարտության մասին այլեւս չխոսի որպես սառեցված հակամարտության, այլ ավելի մեծ ուշադրություն դարձնեն ստեղծված ստատուս քվոն փոփոխելու համար՚: Իսկ թե ի±նչ նպատակ կարող էր ունենալ Ցեղասպանության զոհերի հիշատակման օրերին նման գործողություններ իրականացնելը, վերջինս ավելացրեց. ՙԿոնկրետ չգիտեմ, թե  ադրբեջանական կողմի խնդիրը որն էր, բայց գտնում եմ, որ կարելի է նաեւ միտում տեսնել: Համենայն դեպս, եթե խնդիր կա մեծ հնչեղություն տալ այդպիսի գործողություններին, ապա, սովորաբար, դա արվում է նման օրերի, ինչը կարող է գրավել բոլորի ուշադրությունը՚:

ՀՐԱՆՏ ՍԱՐԱՖՅԱՆ