ՙԱԶՆԱՎՈՒՐ. ՙՀԱՅԵՐԸ ՁԵՌՔՆԵՐԸ ԳՐՊԱՆԸ ՉԵՆ ՏԱՆՈՒՄ՚

ԱԶՆԱՎՈՒՐ. ՙՀԱՅԵՐԸ ՁԵՌՔՆԵՐԸ ԳՐՊԱՆԸ ՉԵՆ ՏԱՆՈՒՄ՚

Չնայած պատկառելի տարիքին, մեր հայրենակից, աշխարհահռչակ շանսոնյե ՇԱՌԼ ԱԶՆԱՎՈՒՐԸ շարունակում է շրջագայել աշխարհով մեկ եւ օրերս էլ գտնվում էր ԱՄՆ-ում` Լոս Անջելեսում:
ARTN-SHANT հեռուստաընկերության Corner հաղորդման հարցազրույցում նա, մասնավորապես, հիշեցրել է, որ դեռ ժամանակին Քենեդին հետեւյալ միտքն է արտահայտել. ՙՄի° հարցրեք, թե ինչ կարող է անել երկիրը Ձեզ համար, ավելի լավ է հարցրեք, թե ինքներդ ինչ եք արել երկրի համար՚: Ապա նա հավելել է, որ հենց սա պետք է այսօր հասկանան հայերը: Շվեյցարիայում Հայաստանի դեսպանը հանդես է եկել նաեւ կոնկրետ առաջարկով. ՙԹող յուրաքանչյուր հայ ամեն ամիս տա այնքան, որքան կարող է: Թող տա 5 դոլար: Մենք այստեղ 2 միլիոն հայ ունենք, ինչքան կստացվի, եթե ամեն մեկը 5 դոլար տա: Քանի± դպրոց կարող ենք նորոգել՚:  Նա նաեւ շեշտել է. ՙՍփյուռքի հարցը շատ լուրջ է: Հայերը ձեռքները գրպանը չեն տանում: Ես չեմ կարող ողջ կյանքս աշխատել ու փողերը տալ: Երբ ես մեռնեմ, ո±վ է փող տալու: Ո±վ է տներ, դպրոցներ կառուցելու: Դա շատ դժվար է: Հայերը պետք է ամեն տարի, ամեն ամիս գումար հատկացնեն: Նրանք դա չեն անում: Նրանք ժլատ են: Ուրիշներն անում են, իսկ իրենք ուրախանում են: Դա սխալ է: Մենք պետք է աշխատենք հայերի ու Հայաստանի համար՚:

Լոս Անջելեսի Beverly Hilton հյուրանոցում տեղի ունեցած հարցազրույցի ժամանակ Ազնավուրը նաեւ որոշ մանրամասներ է ներկայացրել իր ընտանիքի, իր երազանքների մասին եւ նշել, որ ինքն ավելի լավ երգում է ֆրանսերեն եւ որ հայերենով միայն մեկ երգ ունի:
Աշխարհում, երեւի թե, շատ քիչ հայ կա, ով իրավունք ունի հանդես գալ նման հայտարարություններով, հարցազրույցներով: Հիշենք թեկուզ Սպիտակի ահավոր երկրաշարժից հետո մեր երկրի քարուքանդ վիճակը, երբ հենց Ազնավուրը թե° ֆինանսական, թե° բարոյական մեծ աջակցություն ցուցաբերեց հայրենիքին: Նույնիսկ Հայաստանում համապատասխան հիմնադրամ բացվեց... Իհարկե, հետո խոսակցություններ տարածվեցին, որ Ազնավուրի ուղարկած գումարը նպատակին չի ծառայում...
Բայց Ազնավուրը շարունակում է իր երկրի նվիրյալն ու երկրի ցավով ապրողը մնալ եւ երբ բարձրաձայնում է անարդարությունների մասին, ոմանք պարզապես շահագործում են նրա ասածները` դրանք ծառայեցնելով իրենց նպատակին: Ազնավուրը ե°ւ քննադատելու, ե°ւ խորհուրդներ տալու իրավունք ունի:

ԷԼԻ ՄԵԶ ՙՉՀԱՇՎԵՑԻՆ՚

Ապրիլի 22-ին Երեւանի Ազատության հրապարակում  կայացավ աշխարհահռչակ տենոր ԱՆԴՐԵԱ ԲՈՉԵԼԻԻ համերգը: Երգչին նվագակցում էր Հայաստանի ֆիլհարմոնիկ նվագախումբը եւ ՙՀովեր՚ երգչախումբը: Հանրահայտ երգիչը  կատարեց հայտնի արիաներ իտալական օպերաներից: Համերգին ներկա էին ՀՀ նախագահ Սերժ Սարգսյանը, հայ գրատպության 500-ամյակի եւ ՙԵրեւանը 2012թ. գրքի համաշխարհային մայրաքաղաք՚ ծրագրի մեկնարկի կապակցությամբ Հայաստան ժամանած օտարերկրյա պատվիրակությունների ղեկավարները, բարձրաստիճան պաշտոնատար անձինք:
ՙԻրավունքի՚ երեկվա համարում անդրադարձել էինք այդ համերգին, իսկ այսօր ուզում ենք խոսել արդեն, կարծես, տխուր ավանդույթ դարձած մի երեւույթի մասին: Նկատի ունենք կազմակերպիչների, կարելի է ասել, արհամարհական վերաբերմունքը լրատվամիջոցների նկատմամբ: Բանն այն է, որ նույնիսկ հավատարմագրված լրագրողները, ում տրվել է համապատասխան ՙբեյջը՚, չեն կարողացել մուտք գործել այդ օրվա համար նախատեսված, այսպես ասենք, դահլիճ, որտեղ դրված էին աթոռներ:
Եվ մի ուրիշ տհաճ բան էլ է նկատվել. Մոսկովյան փողոց-Մաշտոցի պողոտա խաչմերուկում չէին դադարում անցումների ասֆալտը շերտաձեւ ներկելու աշխատանքները: Կարծես հենց կիրակի օրով, հենց այդ պահին պետք է իրականացվեին այդ աշխատանքները:
Բայց այդ ամենը, իհարկե, չխանգարեց ունկնդրել աշխարհահռչակ երգչի բարձրարվեստ ու բարձրաճաշակ կատարումները:

ՍՏԱՄՈՔՍՈՎ ՄՏԱԾՈՂՆԵՐՆ ՈՒ ԱՐՁԱՆԻ ԳԼՈՒԽԸ

Մենք եւ այլ լրատվամիջոցներ, հասարակական նախաձեռնություններ բազմիցս անդրադարձել ենք, այսպես կոչված, հուշարձանաքանդության տխուր երեւույթին: Սակայն, ամենայն հավանականությամբ, զգալով, որ կարողանում են անկաշկանդ ու անպատիժ իրականացնել իրենց գործունեությունը, բարբարոսները օրեցօր նոր ՙռազմավար՚ են հայտնաբերում:
Իհարկե, տվյալ դեպքում այդ ՙռազմավարը՚ նոր չէ: Երկու օր առաջ Երեւան-Չարենցավան մայրուղու վրա ֆոտոլրագրող Գագիկ Շամշյանը նկատել է, որ ՙՏՂԱՄԱՐԴՈՒ ԵՎ ԿՆՈՋ՚ հայտնի արձանը կրկին թալանվել է: Մոտ մեկ տարի առաջ երկաթից պատրաստված հուշարձանի` Տղամարդու ոտքերի հատվածը գողացվել էր: Իսկ այս պահին ֆոտոխցիկը ֆիքսել է, որ չկա նաեւ Տղամարդու գլուխը: Իհարկե, կարելի է այս հարցում մեղավորներ փնտրել ու գտնել, այսինքն` նրանց, ովքեր պատասխանատու են հուշարձանների պահպանության հարցում, բայց... Ինչպես մի անգամ նման առիթով նշել էր հայտնի մտավորականներից մեկը, հարկավոր է վերահսկողություն սահմանել մետաղի ջարդոն ընդունող զանազան կազմակերպությունների ու անհատների գործունեության վրա: Չէ± որ, ի վերջո, այդ ամենը հայտնվում է նրանց մոտ: Եվ արդեն պարզից էլ պարզ է, որ բարոյախրատական ճառերով պարզապես անհնար է խելքի բերել ոտք ու գլուխ գողացողներին: Ինչպես ասել է մեծերից մեկը. ՙՍտամոքսը խրատներ չի սիրում՚: Իսկ որ նման քայլի դիմողները մտածում են զուտ ստամոքսով, արդեն շատերին է հայտնի: Իսկ գուցե արձանի գլուխը տարել են, որ մի քիչ էլ գլխո±վ մտածեն: Տա Աստված:

Կույտը մշակեց ՌՈՒՍԼԱՆ ԹԱԹՈՅԱՆԸ