ՍԻՄ-Ը ԳԼՈՒԽ ԽՈՆԱՐՀԵՑ ՑԵՂԱՍՊԱՆՈՒԹՅԱՆ ԶՈՀԵՐԻ ՀԻՇԱՏԱԿԻ ԱՌՋԵՎ

ՍԻՄ-Ը ԳԼՈՒԽ ԽՈՆԱՐՀԵՑ ՑԵՂԱՍՊԱՆՈՒԹՅԱՆ ԶՈՀԵՐԻ ՀԻՇԱՏԱԿԻ ԱՌՋԵՎ

Ապրիլի 24-ի առավոտյան ՍԻՄ կուսակցության պատվիրակությունը` նախագահ Հայկ Բաբուխանյանի գլխավորությամբ, այցելեց Ծիծեռնակաբերդ եւ գլուխ խոնարհեց Հայոց ցեղասպանության զոհերի հիշատակի առջեւ: ՍԻՄ երիտասարդական կառույցի անդամների վերնաշապիկների վրա գրված էր ՙ1915. մենք հիշում ենք՚:

Հայտնի է, որ ՍԻՄ կուսակցությունը իր հիմնադրման օրվանից` 1988թ.-ից,  հանդես է գալիս Ցեղասպանության միջազգային ճանաչման եւ դատապարտման, դրա հետեւանքների վերացման, փոխհատուցման պահանջներով: Բացի այդ` ՍԻՄ կուսակցությունը պահանջում է Թուրքիայից հանել օկուպացիոն զորքերը Հայաստանի Հանրապետության օկուպացված տարածքներից:

ՙՕՍԿԱՆՅԱՆԸ ՉԻ ԿԱՐՈՂ ՎԱՐԿԱԲԵԿԵԼ ԲՀԿ-Ն՚

Կրկին անդրադառնալով ԲՀԿ առաջնորդ Գագիկ Ծառուկյանի պատմական ոսկեզօծ Vertu հեռախոսի եւ զենքի չարչրկված թեմային` փորձեցինք պարզել, թե արդյոք ԲՀԿ-ականները տեղյակ են, որ ՙՀավաքների ազատության մասին՚ օրենքն արգելում է հավաքներին ներկայանալ զենք-զինամթերքով: Չէ± որ Գ.Ծառուկյանը կարծես թե այլեւս չի հերքում այն, որ որոշ դեպքերում նախընտրական հանդիպումներին զենք է ունեցել: Սակայն ԲՀԿ նախագահի մամլո խոսնակ ԽԱՉԻԿ ԳԱԼՍՏՅԱՆԸ զենք կրելը որեւէ խախտում չի համարում. ՙՈչ, ամեն դեպքում արդեն դրա մասին չափից դուրս շատ է խոսվել, ուրիշ թեմաներ շոշափեք...՚:
Դե եթե ուրիշ թեմաներ, ապա անդրադարձանք ԲՀԿ ՙուրիշ՚ անդամ Վարդան Օսկանյանին եւ նրա արտահայտած` Եգիպտոսի, Լիբիայի, Թունիսի ու այլ արաբական երկրների հեղափոխությունը Հայաստանի համար լավագույն տարբերակ համարելու անհաջող տեսակետին: Մինչդեռ Խ.Գալստյանը չցանկացավ պատասխանել, թե ԲՀԿ-ն կիսո±ւմ է արդյոք Օսկանյանի արաբական հեղափոխության օրինակները Հայաստանի վզին փաթաթելու միտումը. ՙԴուք զանգահարեք եւ պարոն Օսկանյանից լրացուցիչ բացատրություններ ուզեք: Ես այժմ Մասիսում հանրահավաքի մեջ եմ՚:
Իսկ Գալուստ Սահակյանի ՙԱզատություն՚ ռադիոկայանով արտահայտած այն կարծիքին, որ Օսկանյանը վարկաբեկում է ԲՀԿ-ն, Գագիկ Ծառուկյանի մամլո խոսնակը միանշանակ հերքում է. ՙԻհարկե, Վարդան Օսկանյանը չի կարող վարկաբեկել ՙԲարգավաճ Հայաստան՚ կուսակցությունը: Իսկ թե ինչո±ւ է Գալուստ Սահակյանն այդպես կարծում, հարցրեք իրենից՚:
Եվ, իրոք, պարոն Օսկանյան, ինչքա±ն կարող է ԲՀԿ-ն պատասխան տալ Ձեր ասածների ու արածների համար:

ՀՐԱՆՏ ՍԱՐԱՖՅԱՆ