ԵՎՍ 4 ՕԼԻՄՊԻԱԿԱՆ ՈՒՂԵԳԻՐ

ԵՎՍ 4 ՕԼԻՄՊԻԱԿԱՆ ՈՒՂԵԳԻՐ

Սոֆիայում ավարտվեց ազատ ոճի ըմբշամարտի օլիմպիական վարկանիշային մրցաշարը, որտեղ ոսկե ու արծաթե մեդալակիրներն արժանացան Լոնդոն-2012-ի ուղեգրերի:
66 կգ քաշային կարգում Դավիթ Սաֆարյանը 1/8-րդ եզրափակիչում 1:0, 3:0 հաշվով պարտության մատնեց Սթիվեն Գրաֆին (Շվեյցարիա), ապա հաջող հանդես եկավ նաեւ քառորդ եզրափակիչում ու կիսաեզրափակիչում` դուրս գալով եզրափակիչ, որտեղ նրա մրցակիցն էր Բելառուսը ներկայացնող Ալի Շաբանաուն: Սաֆարյանը զիջեց մրցակցին, բայց ապահովեց իր տեղը Լոնդոնի ամառային օլիմպիական խաղերում: 84 կգ քաշային կարգում Հայաստանը ներկայացնող Մաջիմուրադ Նուրմագոմեդովը 1/8-րդ եզրափակիչում հաղթեց ալբանացի Էգցոն Շալային, իսկ քառորդ եզրափակիչում` մոլդովացի Բորիս Անդոնովին: Կիսաեզրափակիչում նա հաղթեց շվեյցարացի Մարկոս Ռիսենին ու դուրս եկավ եզրափակիչ, որտեղ հաղթեց թուրք Իբրահիմ Բոլուկբասիին: Նուրմագոմեդովը եւս նվաճեց օլիմպիական ուղեգիր:
Սոֆիայում ավարտվել է նաեւ հունահռոմեական ոճի մրցաշարը, որտեղ նույնպես խաղարկվում էին օլիմպիական ուղեգրեր: Լոնդոնում կայանալիք օլիմպիական խաղերին մասնակցելու իրավունք էին ստանում միայն մրցաշարի եզրափակչի մասնակիցները:
96 կգ քաշային կարգում Հայաստանը ներկայացնող Արթուր Ալեքսանյանը դուրս եկավ կիսաեզրափակիչ, որտեղ հաղթեց Ադրբեջանը ներկայացնող Շալվու Գադաբաձեին եւ նվաճեց օլիմպիական ուղեգիր: Նա չբավարարվեց դրանով եւ, եզրափակիչում հաղթելով նաեւ էստոնացի Արդո Արուսաարին, դարձավ մրցաշարի հաղթող: Ծանր քաշայինների կարգում մեր երկիրը ներկայացնող Յուրի Պատրիկեեւը կիսաեզրափակիչում հաղթեց Սերգո Գոգիսվանիձեին, նվաճեց օլիմպիական ուղեգիր եւ արդեն այդ կարգավիճակում եզրափակիչում հաղթեց Եվգենի Օռլովին ու դարձավ մրցաշարի հաղթող:  
Ուրախալի է, որ մեր ըմբիշները կարողացան երկու ոճից չորս օլիմպիական ուղեգիր նվաճել` ուղեգրերի թիվը հասցնելով հինգի:
Եվ այս ֆոնին կրկին ցավով հիշեցինք բռնցքամարտիկների անհաջողությունը: Երեւի բռնցքամարտի սիրահարները լավ գիտեն, որ մեր երկիրը բռնցքամարտում լավ ավանդույթներ ունի, սակայն ծանր քաշերում միշտ էլ կադրերի պակաս է զգացվել: Ու, կարծես թե, այդ խնդիրը ինչ-որ չափով լուծվեց 2008թ. Եվրոպայի առաջնությունում, երբ 91կգ քաշային կարգում արծաթե մեդալ նվաճեց ՑՈԼԱԿ ԱՆԱՆԻԿՅԱՆԸ:
Սակայն, ինչպես տեղեկացնում է Armsport.am-ը, ընդամենը 24 տարեկան Ցոլակն արդեն տեւական ժամանակ է` թողել է սիրողական բռնցքամարտը ու վերադարձել Ջավախք: Իսկ դրա պատճառը, ըստ բռնցքամարտիկի, հետեւյալն է. ՙՀայկական բռնցքամարտը ղեկավարող անձինք ամեն ինչ արեցին, որ ես թողնեմ սիրողական բռնցքամարտը: Չկային պայմաններ, չկար մթնոլորտ, որը թույլ կտար շարունակել ելույթներս: Ես անիմաստ գտա մնալ Հայաստանում: Առավել եւս, որ առաջարկ ունեի ԱՄՆ-ից` մասնակցելու պրոֆեսիոնալ բռնցքամարտի հանդիպումների: Միայն նվերներով չես կարող բարեկեցիկ կյանքով ապրել՚:
Սակայն հետաքրքիրը դեռ առջեւում է. պարզվում է, որ նվերն էլ կարող են ետ վերցնել: Ահավասիկ. ՙԻնձ ուշադրություն դարձրին, սակայն ավելի քիչ, քան մյուսներին: Ինձ տվել էին մի սենյականոց բնակարան, ասում էին, որ դա իմն է, բայց երբ իմացան, որ հեռանում եմ Հայաստանից, եկան-ասացին` ազատի տունը… Փաստորեն, թանկարժեք նվերը քոնն է, քանի դեռ Հայաստանն ես ներկայացնում: Եթե ես իմանայի, որ դա ժամանակավոր տուն է, չէի վերցնի բանալիները: Ինձ հավաստիացրել էին, որ փաստաթղթերով էլ այն իմ անունով է, բայց պարզվեց` այդպես չէ: Հավաքականի նախկին գլխավոր մարզիչ Ռաֆայել Մեհրաբյանն էլ շատ վատ էր վերաբերվում ինձ, ու ես հոգնել էի նրա պահվածքից: Ես միշտ անորոշ վիճակում էի՚:
Հարցազրույցից պարզվում է նաեւ, որ, երբ եկել է Հայաստան, նրան անձնագիր են տվել, իսկ երբ իմացել են, որ ուզում է տեղափոխվել պրոֆեսիոնալ բռնցքամարտ, անձնագիրը ետ են վերցրել: Այսինքն` կարելի է ետ վերցնել ե°ւ նվերը, ե°ւ անձնագիրը:
Իսկ 2008թ. օլիմպիական խաղերի բրոնզե մեդալակիր Հրաչյա Ջավախյանի կարծիքը մեր հավաքականի ելույթների եւ իր ճակատագրի մասին կներկայացնենք վաղվա ՙՀետաքննություն՚ հավելվածում:

Պատրաստեց Ռ. ԹԱԹՈՅԱՆԸ