ՙԱՌՆԵՏԻ ԿՐԾԵԼՈՒՑ ՀԻՆԳ ԺԱՄ ՀԵՏՈ ԴԻՄԵԼ ԷՐ ՀԻՎԱՆԴԱՆՈՑ...՚

ՙԱՌՆԵՏԻ ԿՐԾԵԼՈՒՑ ՀԻՆԳ ԺԱՄ ՀԵՏՈ ԴԻՄԵԼ ԷՐ ՀԻՎԱՆԴԱՆՈՑ...՚

Օրեր առաջ մամուլում հրապարակումներ եղան այն մասին, որ Արտաշատի Շահումյան գյուղում 8 ամսական տղա երեխա է մահացել, ով տառապել է, թե° ինֆեկցիոն հիվանդությամբ, թե° թոքաբորբով, թե° առնետներն են մահվանից առաջ կրծոտել երեխայի քիթը, ականջը, մատները եւ գլխի մի հատվածը:

Այդ սահմռկեցուցիչ դեպքի վերաբերյալ հնչում էին տարբեր կարծիքներ. ոմանք երեխայի մահը կապում էին առնետի կրծելու հետ, ոմանք էլ` քրոնիկական հիվանդության: Մենք անցկացրեցինք սեփական հետաքննություն` պարզելու համար մանկան մահվան բուն պատճառը:
Մեր առաջին զրուցակիցն է Շահումյանի բուժամբուլատորիայի` երեխային բուժող բժշկուհի ԱՆՆԱ ԲԵԳԻՋԱՆՅԱՆԸ.
- Բարդացած հիվանդությամբ անամեզիայով տառապող երեխա էր` բազմիցս բուժված ստացիոնար ամբուլատոր պայմաններում: Մենակ չորս անգամ պառկել էր Երեւանի Նորքի ինֆեկցիոն հիվանդանոցում, բայց դեռ չբուժված` մայրը բերում էր տուն: Մի քսան օր առաջ երեխան նորից Արտաշատի շրջանային շտապօգնության մեքենայով տեղափոխվել էր Երեւան, որտեղ ախտորոշվել էր թոքաբորբ եւ աղիքային ինֆեկցիա: Առանց բուժումը ստանալու, նորից վերադարձել էր տուն: Առնետի կրծելուց հինգ ժամ հետո դիմել էր հիվանդանոց, երբ երեխան տաքության մեջ այրվում էր: Ուշացած ուղարկել ենք Արտաշատի շրջանային հիվանդանոց, բայց ճանապարհին երեխան մահացել է: Կարող եմ ասել, որ կար խեղաթյուրված առողջական վիճակ` գումարած դրան առնետի կծածը, որը համարվում է երկրորդային ինֆեկցիա: Երեխային  դեղ էինք նշանակում, մայրը տանում էր, գցում էր տուն ու գնում իր հաց հավաքելու ՙգործին՚:
Իսկ ահա Շահումյանի գյուղապետ ՍԵՐԺԻԿ ԲԱԲԱՅԱՆԸ մեզ տեղեկացրեց` արդեն հաստատվել է, որ երեխան թոքաբորբից է մահացել: Գյուղապետի փոխանցմամբ, իրականում երեխան ծնվել է անհաջող ընտանիքում, որտեղ նրա վրա ուշադրություն չեն դարձրել:
Ավելորդ չհամարեցինք զրուցել նաեւ հարեւանների հետ եւ իմանալ նրանց կարծիքն այդ ընտանիքի մասին: Հարեւաններից մեկն ասաց.
- Սարսափելի վիճակ է, դա ընտանիք չեմ էլ համարում. ո°չ աշխատում են, ո°չ հարեւանների հետ են շփվում, ամիսը 4-5 անգամ գնում են գյուղապետարան, փող ուզում, անբան մարդիկ են, փնթի` վերին աստիճանի:
Իսկ մեկ ուրիշն այսպես արտահայտվեց.
- Էդ ընտանիք չի, դա պարզապես հավաքածու ա, էդ կին կոչեցյալն ամբողջ օրը փողոցներում է. մի օր` էս գյուղը, մի օր` էն գյուղը, փայ ա հավաքում-բերում, օրը մեռցնում են: Ու այսպես` ամեն օր:
Մեկ այլ հարեւան էլ հավելեց, որ սա երեխայի մոր երկրորդ թե երրորդ ամուսնությունն է գյուղում, ուրիշ տեղ էլ երեխաներ ունի.
- Նա մտածում է` մենակ կերակրի երեխաներին, գնա, հաց հավաքի, մեկը պահածո տա, մեկը` մի ուրիշ բան, գրել-կարդալ էլ չգիտի: Մի խոսքով` կարելի է ասել, որ նա թերի, ծնողական խնամքից լրիվ հեռու կին է:

ԻԼՈՆԱ ԱԶԱՐՅԱՆ