Մշտապես ժողովրդական ՏԻԳՐԱՆ ԿԱՐԱՊԵՏԻՉԸ...

Մշտապես ժողովրդական ՏԻԳՐԱՆ ԿԱՐԱՊԵՏԻՉԸ հայտարարել է. ՙԻշխանությունը փողը դեռ չի բաժանել: Սակայն ես վստահ եմ, որ կարելի է ազնիվ ընտրել` առանց փողի՚: Անշուշտ, կարելի է, բայց ո±վ է խոսում դրա մասին` այն Կարապետիչը, որ նախորդ ընտրություններին հեռուստացույցեր էր բաժանում, տանում Սեւան, զանգվածային կնունքներ կազմակերպում եւ այլն, եւ այլն: Լավ, ի±նչ տարբերություն` փո±ղ, թե± փողով ձեռքբերված ապրանքներ ու ծառայություններ, եթե փողով հեռուստացույց է գնվել ու նոր բաժանվել, դա դադարո±ւմ է լինել ընտրակաշառք... Չնայած` Կարապետիչի տառապանքը փորձ ունի` այդքան բաժանվեց, բայց չընտրվեց:
Ընտրակաշառքի յուրահատուկ կարոտ զարմանալիորեն դրսեւորել է  եւ ՍՏԵՓԱՆ ԴԵՄԻՐՃՅԱՆԸ. ՙԻ±նչ փոփոխությունների մասին է խոսքը, սա ի±նչ վիճակ է: Մի հատ ասֆալտ գոնե արեք էս քաղաքում: Մենք կարող ենք եւ պետք է փոխենք իրավիճակը՚: Զարմանալի է` մի±թե Ս. Դեմիրճյանը չգիտի, որ իր զինակից ՀԱԿ-իստները հաճախ քննադատում են այս կամ այն իշխանավորին կամ պատգամավորի թեկնածուին ՙնախընտրական ասֆալտ՚ անելու համար: Հիմա ի±նչ` ընտրաասֆալտի մասին բարի հուշե±ր են արթնացել:
Պատկերացնո±ւմ եք` ԼԵՎՈՆ ՏԵՐ-ՊԵՏՐՈՍՅԱՆԸ Արարատի մարզում քարոզում էր, որ պետք է վերականգնել այն կյանքը, որ եղել էր մինչեւ 1998-ը. ՙԱյդ կյանքը վերականգնելու համար ենք մենք կոչ անում, որ մեզ ձայն տաք... Իշխանությունը գող, ավազակ կլինի, եթե նրանից պահանջող չկա, ընտրեք մեզ, մենք սխալ կանենք, մեր վզից կբռնեք եւ կվռնդեք՚: Զարմանալի է` մի±թե ԼՏՊ-ն կարծում է, որ այդքան շատ խելապակասներ կգտնվեն, որ կցանկանան հետ բերել ցրտի, մթի, համատարած սպանությունների ու օրը ցերեկով այլանդակ թալանի տարիները: Դե, ԼՏՊ-ի շրջապատից մի հազար հոգի հին թալանչիներ, անշուշտ, կերազեին կրկին թալանի հնարավորություն ստանային, բա մնացա±ծը:
Ի դեպ, նույն Արտաշատում ի հայտ եկավ եւ մի վաղուց մոռացված ՀՀՇ-ական` ՙՆաիրիտի՚ փակման համար ամեն ինչ արած ԳԱԳԻԿ ՆԵՐՍԻՍՅԱՆԸ. ՙՄեր ժողովրդին փորձում են վախեցնել: Ես, իհարկե, վախ չափող չեմ, բայց խոստանում եմ բոլորի վախը չափել՚: Զարմանալի է, որ երկրի արդյունաբերության հերն անիծածը դեռ համարձակվում է բան խոստանալ, չնայած, խոշոր հաշվով, նրան կարելի է վախ չափողի հաստիք հատկացնել, բայց ոչ թե Արտաշատում, այլ  հարեւան երկրներից որեւէ մեկում: Հատկապես` ԼՏՊ-ի կողմից շատ սիրված երկու այդպիսի երկիր կա:
Բավականին հետաքրքիր հայտարարություն է արել Մաշտոցի պուրակում տեղի ունեցած կիրակնօրյա միջադեպի վերաբերյալ, երբ ՙապամոնտաժողները՚ ՙմեծ հաղթանակ՚ տոնեցին` հանելով մի քանի պտուտակ կրպակներից: Ահա ինչ մեկնաբանություն տվեց Երեւանի փոխոստիկանապետ, տարատեսակ ակցիաների վրա մասնագիտացած ՌՈԲԵՐՏ ՄԵԼՔՈՆՅԱՆԸ. ՙԵս իրենց առաջարկեցի 1 կիլոգրամ այդ պտուտակից ուղարկեմ: Եվ ինձ զարմացնում է, որ ուղիղ կապով ամբողջ աշխարհը տեսավ, որ 50-60 մտավորականներ կռիվ-կռիվ խաղի նման, Տիգրան Խզմալյանի ռեաբիլիտացիան արեցին իր կնոջ դեպքից հետո, եւ փորձեցին ներկայացնել` իբր Բաստիլն են գրավել: Չէ, ընդամենը մանկական խաղ էր դա, շոու էր, Խզմալյանի հերթական սցենարն էր` քանդող բրիգադը եւ նրա հետեւանքները՚: Այն, որ Խզմալյանի ՙքանդող բրիգադների՚ բեմադրությունը զարմանալի էր ու ծիծաղելի: Ինչեւէ, բայց պետք է մի բան ասենք փոխոստիկանապետին. պարոն Մելքոնյան, չեղավ, Դուք ինչո±ւ եք զարմանում` մի±թե չգիտեք, որ Հայաստան երկրում զարմանալու մենաշնորհը մեկ մարդու է պատկանում, եւ այդ մեկ մարդը ես եմ: Հետո ինչ, որ պետական մակարդակով մենաշնորհների դեմ պայքար է մղվում:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ