ՙՄԵՐ ՈԽԵՐԻՄ ՀԱՐԵՎԱՆՆԵՐԸ ՄԵԶՆԻՑ ԼԱՎ ԵՆ ԳԻՏԱԿՑՈՒՄ

ՄԵՐ ՈԽԵՐԻՄ ՀԱՐԵՎԱՆՆԵՐԸ ՄԵԶՆԻՑ ԼԱՎ ԵՆ ԳԻՏԱԿՑՈՒՄ

Կիրակի օրը Թուրքիայում ավարտվեց Եվրոպայի ծանրամարտի առաջնությունը, որտեղ մեր երկիրը ներկայացնում էին երեք ծանրամարտիկներ:
Վերջին օրը 105+ քաշային կարգում ասպարեզ դուրս եկավ ՀԱՅԿ ՀԱԿՈԲՅԱՆԸ: Պոկում վարժությունում մեր մարզիկը բարձրացրեց 195կգ եւ արժանացավ փոքր արծաթե մեդալի:
Իսկ հրում վարժությունում նա բավարարվեց 220 կգ արդյունքով` զգալիորեն զիջելով իր գլխավոր մրցակիցներին: Երկամարտի 415 կգ արդյունքով նա զբաղեցրեց 6-րդ հորիզոնականը: Այս քաշային կարգում հաղթող ճանաչվեց ռուսաստանցի Ռուսլան Ալբեգովը, ում  երկամարտի արդյունքը 429 կգ էր:
Հիշեցնենք, որ ավելի վաղ 69 կգ քաշային կարգում Վանիկ Ավետիսյանը եւ Սամվել Գրիգորյանը երկամարտում զբաղեցրել էին համապատասխանաբար 5-րդ եւ 10-րդ հորիզոնականները:
Մարզաձեւի պատասխանատուները Եվրոպայի առաջնությանը նման թույլ եւ թերի կազմով մեկնելը բացատրեցին այն հանգամանքով, որ առաջնությունում օլիմպիական ուղեգիր չի խաղարկվելու, ուստի չարժե ուժեղագույններին նոր փորձության ենթարկել: Սակայն չպետք է մոռանալ, որ Եվրոպայի առաջնությունում հաջողությունները բարձրացնում են երկրի անունը: Եվ, որքան էլ ցավալի է խոստովանելը, մեր ոխերիմ հարեւանները դա մեզնից լավ են գիտակցում:
Առավել մանրամասն հայկական ծանրամարտի վերաբերյալ որոշ նկատառումներ կներկայացնենք վաղվա ՙՀետաքննություն՚ հավելվածում:

Պատրաստեց Ռ. ԹԱԹՈՅԱՆԸ