Երբեմն զարմանալի բաներ են հայտնաբերվում ...

Երբեմն զարմանալի բաներ են հայտնաբերվում կուսակցությունների համամասնական ցուցակների համեմատական ուսումնասիրության արդյունքում: Այսպես, պարզվում է, որ եթե ՀԱԿ-ին հաջողվի մուտք գործել խորհրդարան, ապա ամենատարեց պատգամավորը, ով, ըստ ԱԺ կանոնակարգի, պետք է վարի ԱԺ առաջին նիստը, լինելու է ոչ այլ ոք, քան... ԼԵՎՈՆ ՏԵՐ-ՊԵՏՐՈՍՅԱՆԸ, որը ծնվել է 1945թ. հունվարի 9-ին: Ճակատագրի ինչպիսի հեգնանք, ստացվում է, որ ինչ էլ անում ենք, այդ տհաճ կերպարից չենք պրծնում: Զարմանալով հանդերձ` մնում է հուսալ, որ կա°մ մեր ընտրողներն այնքան խելամիտ կլինեն, որ ՀԱԿ-ը 7 տոկոսի շեմը չկարողանա անցնել, կա°մ էլ ԼՏՊ-ի գոռոզամտությունը կբռնի, եւ նա կհրաժարվի մանդատից, քանի որ ՀՀ նախագահ լինելուց հետո իրեն պատգամավոր լինելը ՙպալոժ չի՚:
Բավականին զարմանալի ձեւով ՎԱՐԴԱՆ ՕՍԿԱՆՅԱՆԸ սահմանազատվում է Ռոբերտ Քոչարյանից. ՙՉեմ ուզում ես մեկնաբանել մի բան, որի մասին որեւէ հայտարարություն կոնկրետ այդ անձի կողմից չի արվել: Այսօր մենք գնում ենք խորհրդարանական ընտրությունների, ուզում ենք այդ ընտրությունների միջոցով Հայաստանում իրավիճակ փոխել՚: Դե, իհարկե, ինչ մեկնաբանություն տա Օսկանյանը Քոչարյանի մասին, եթե վերջինից չի ստացել համապատասխան հանձնարարություն` խոսելու Քոչարյանի դերի մասին, այլ առայժմ ունի հանձնարարություն` խառնել վիճակը ԲՀԿ-ում եւ հանրապետությունում: Ախր, հո չի կարող Օսկանյանը, նույնիսկ` եթե ոչ միայն սեփական, այլեւ` ամբողջ ՙՍիվիլիթասի՚ ուղեղը լարի, կռահել, թե իր շեֆը ինչ դիրքորոշում կունենա ընտրությունների վերաբերյալ:

Մեզ հույժ զարմացրեց Գյումրիի ՙԱսպարեզ՚ ակումբի ղեկավար ԼԵՎՈՆ ԲԱՐՍԵՂՅԱՆԸ: Քիչ էր, որ Վանյանի գարշելի ադրբեջանական փառատոնի համար տարածք տրամադրած ակումբը խայտառակ եղավ, քանի որ գյումրեցիները Վանյանին վռնդեցին իրենց քաղաքից, հիմա էլ մի բան էլ համարձակվում է ընդարձակ հայտարարություն տարածել ՙլավ եմ արել՚ ոճով, ու նաեւ դատապարտել գյումրեցիների բողոքի գործողությունները, որ ուղղված էին խայտառակության կանխմանը: Դե ինչ, մի Վանյան էլ հիմա դարձել է Լեւոն Բարսեղյանը, եւ մնում է հուսալ, որ գյումրեցիները բավականաչափ հետեւողական կլինեն ու կհասնեն ՙԱսպարեզ՚ ակումբի փակմանը, զի դա իրավունք չունի կոչվելու խոսքի ազատության ակումբ, դա այլեւս դավաճանության ակումբ է:
Զարմանալի բան է տեղի ունեցել նաեւ Ուկրաինայում: Ամենուրեք մերկանալով ցույցեր անցկացնող ՙՖԵՄԵՆ՚ շարժման ակտիվիստուհիները հենց որ Ուկրաինայի խորհրդարանը սկսեց քննարկել աբորտները արգելելու մասին օրենքի նախագիծը, ի նշան բողոքի` մերկ վիճակում հայտնվեցին Սուրբ Սոֆիայի տաճարի զանգակատանը: Ամենազարմանալին այն է, որ նրանց նույնիսկ չձերբակալեցին, այլ ընդամենը վարչական պատասխանատվության ենթարկեցին, նրանց արած սրբապղծությունը որակելով մանր խուլիգանություն: Զարմանալի է, թե դեպի ուր է տանում, այսպես կոչված, հանդուրժողականությունը: Բայց բոլոր դեպքերում, զարմանալով հանդերձ, հուսանք, որ այդ ՙֆեմենուհիներին՚ մեր արտգործնախարարությունը երբեք Հայաստան մուտքի թույլտվություն չի տա:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ