ՔՐԵԱԿԱՆ ԳՈՐԾ ԱՅՆՈՒԱՄԵՆԱՅՆԻՎ ՀԱՐՈՒՑՎԵԼ Է

ՙՙՔՐԵԱԿԱՆ ԳՈՐԾ ԱՅՆՈՒԱՄԵՆԱՅՆԻՎ ՀԱՐՈՒՑՎԵԼ Է

Օշական գյուղում 3 օր առաջ տեղի ունեցած ՙկրակոց-տրաքոցների՚ առնչությամբ տարածվող լուրերը այնքան հակասական եւ անտրամաբանական էին, որ մենք ձեռնպահ մնացինք դրանք մեր ընթերցողին ներկայացնելուց: Իսկապես, ըստ առաջին տեղեկատվության` ՙբնակիչներից մեկը կրակել է իր հարեւանի տան ուղղությամբ: Կրակոցների ձայնից նրանք դուրս են եկել փողոց ու համարձակը մի քանի կրակոց էլ է արձակել՚: Հաջորդ, ավելի ծավալուն լուրը տեղեկացնում էր, թե` ՙՀարեւանը կրակել է հարեւանի վրա` նրան պատճառելով մարմնական թեթեւ վնասվածքներ: Գյուղում շրջանառվող լուրերի համաձայն սակայն, ոչ մի կրակոց էլ չի եղել: Պարզապես տուժածը ձուկ էր բռնում եւ վնասվածք է ստացել արկի պայթյունից՚: Գյուղի բնակիչները լրագրողին տեղեկացրել էին, թե` ՙԻրանք պապենական թշնամի են, դրա համար մեղքը ուզում ա գցի մյուսի վրա, իբր նա ա իրեն կրակել՚ իսկ գյուղապետը` ՙԱռայժմ ոչինչ չեմ կարող ասել, միայն ասեմ, որ կրակոց գյուղում չի եղել: Տուժածը` Անդրանիկ Պողոսյանը մեր համայնքում հաշվառված չէ, ուղղակի տուն ունեն` ապրում է՚:
Դեպքը տեղի էր ունեցել ժամը 21-ից հետո` մութ ժամին: Հետեւաբար, ձկնորսության վարկածը միամիտների համար էր: Համարելով, որ ոստիկանությունում այդպիսիք չկան, դիմեցինք լրատվության ծառայությանը, որը եւ նեկայացրեց միջադեպի ոչ ամբողջական, սակայն իրական պատկերը. ՙԱպրիլի 8-ին հրազենային վնասվածքներով հիվանդանոց էր տեղափոխվել Օշական գյուղի բնակիչ` 1990թ. ծնված Ա. Պողոսյանը, ով հայտնել էր, թե Օշական գյուղի մանկական առողջարանի մոտ որսորդական հրացանից իր վրա էր կրակել համագյուղացին: Աշտարակի քննչական բաժնում հարուցվել է քրեական գործ ՀՀ քրեական օրենսգրքի 112-րդ` ՙԴիտավորությամբ առողջությանը ծանր վնաս պատճառելը՚ հոդվածի 1-ին մասի հատկանիշներով՚:

ՊԱՅԹՅՈՒՆ ԱՎՏՈՏՆԱԿՈՒՄ

Ապրիլի 10-ին, ժ. 17-ի սահմաններում պայթյուն էր տեղի ունեցել Մալաթիա-Սեբաստիա համայնքի Անդրանիկի փողոցում գտնվող 138 շենքի ավտոտնակներից մեկում: Պայթյունի հետեւանքով վիրավոր է մեկ մարդ:

Ա. ԱԲԳԱՐՅԱՆ