ՙՕՏԱՐԵՐԿՐՅԱ ԳՈՐԾԱՏՈՒՆԵՐԸ ՕԳՏՎՈՒՄ ԵՆ ԱՌԻԹԻՑ...՚

ՙՙՕՏԱՐԵՐԿՐՅԱ ԳՈՐԾԱՏՈՒՆԵՐԸ ՕԳՏՎՈՒՄ ԵՆ ԱՌԻԹԻՑ...՚

Վերջերս ՙԻրավունք՚ թերթն անդրադարձել էր Երեւանի Ալյումինի գործարանի` ՙԱրմենալի՚ մի խումբ աշխատակիցներին (շուրջ 100 հոգու) վնասակարության դիմաց տրվող լրավճարը չվճարելու թեմային: Հիշեցնենք, որ գործարանի սեփականատերերը ՌԴ-ից են, եւ այս խնդիրը այստեղ նոր չէ. բանվորների մեկ այլ խմբի (117 հոգի) հայցով ՙԱրմենալի՚ ղեկավարությունը դեռեւս անցյալ տարի գտնվում էր դատական գործընթացի մեջ նույն հարցի վերաբերյալ: Չնայած, որ հայցը բավարարվեց ի օգուտ բանվորների, գործարանի տնօրինությունը շարունակում է իր, մեղմ ասած, տարօրինակ աշխատաոճը: Այս կապակցությամբ գործարանի մի խումբ ներկայացուցիչներ դիմել են ՙԼեւ գրուպ՚ իրավաբանական գրասենյակին, ինչպես նաեւ ՍԻՄ կուսակցությանը, որպեսզի այս կերպ եւս պաշտպանվի նրանց սահմանադրական իրավունքը:
Այս կապակցությամբ դիմեցինք ՙՍահմանադրական Իրավունք միություն՚ կուսակցության նախագահ ՀԱՅԿ ԲԱԲՈՒԽԱՆՅԱՆԻՆ, որպեսզի ճշտենք, թե ինչ կարծիք ունի ստեղծված իրավիճակի մասին, եւ ինչ է ձեռնարկվելու այդ ուղղությամբ. ՙՆշեմ, որ այո, ՍԻՄ կուսակցությանն են դիմել Ալյումինի գործարանի աշխատավորական կոլեկտիվի մի խումբ անդամներ, գտնելով, որ խախտվել է իրենց սահմանադրական իրավունքը, եւ այդ կապակցությամբ մենք ուսումնասիրում ենք հարցը եւ աջակցում ենք կոլեկտիվին իրենց իրավունքները վերականգնելու առումով: Նշեմ, որ մեր կուսակցությունը դեռ 2000-2001 թթ.-ին ՀՀ օրենսդրության մեջ հստակեցրել է աշխատանքային իրավունքների բազմաթիվ դրույթներ եւ միշտ պայքարել է աշխատանքային իրավունքի իրականացման համար: Գտնում ենք, որ աշխատանքային իրավունքը մարդու այն հիմնարար իրավունքներից է, որը նա պետք է կարողանա ամբողջ ծավալով իրացնել կյանքում: Երբեմն, հատկապես օտարերկրյա գործատուները օգտվելով նրանից, որ ՀՀ-ում ստեղծվել է ծանր իրավիճակ` կապված աշխատանքային շուկայի հետ, փորձում են խախտել մեր աշխատավորների իրավունքները, այնինչ այդ նույն օտարերկրյա գործատուներն իրենց երկրում երբեք չէին համարձակվի գնալ նմանատիպ խախտումների: Այս փաստը մեզ շատ է մտահոգում, եւ այս առումով մենք աջակցում ենք այդ կոլեկտիվին, գտնում ենք, որ նրանց պահանջները արդարացի են, բխում են ՀՀ օրենսդրությունից: Մենք կհետեւենք ողջ դատական գործընթացին եւ հետեւողական կլինենք, որպեսզի ՀՀ-ում նմանատիպ դեպքերի ժամանակ սատարենք մեր աշխատավորներին՚:

ԱՐՄԵՆՈՒՀԻ ՀԱԿՈԲՅԱՆ