ԵՂԱՎ ԱՅՆՊԵՍ, ԻՆՉՊԵՍ ՄԻՇՏ

ԵՂԱՎ ԱՅՆՊԵՍ, ԻՆՉՊԵՍ ՄԻՇՏ

Շաբաթ օրը կայացավ ՙArmenia Music awards՚ մրցանակաբաշխությունը, որը շատերի հիշողության մեջ կմնա Ալեն Դելոնի ներկայությամբ եւ վեց ժամ տեւող ձանձրույթով: Իհարկե, կային հայտնի երգիչ-երգչուհիներ, եղան լավ կատարումներ, բայց ընդհանուր առմամբ այն նախորդներից քիչ բանով էր տարբերվում: Հաղորդավարների, հաղորդավարուհիների տափակ հումորները, Հայկոյի ու Մկոյի կարճ ժամանակով հայտնվելն ու գրեթե ոչինչ չասող տեքստերը...
Մեկ անգամ եւս հաճույքով հնչեցնենք աշխարհահռչակ Ալեն Դելոնի անունը, ում տրվեց ՙԼեգենդ՚ մրցանակ: Կինոաստղը բարձրացավ բեմ, ստացավ իր մրցանակը եւ հումորախառը շեշտեց, որ բեմում շատ հետաքրքիր ելույթներ եղան, սակայն հանդիսատեսը չէր ծափահարում, մինչդեռ ինքը ոչինչ չի անում, բայց բուռն ծափահարում են: Իհարկե, նրան ծափահարում էին իր դերերի, համաշխարհային հռչակի, հմայքի համար, եւ նա դա լավ գիտեր, սակայն իսկապես զարմացնում էր դահլիճի անտարբերությունը, երբեմն պարզապես քար լռությունը: Նաեւ նշենք, որ Ալեն Դելոնը վատ էր զգացել, եւ ստիպված էին եղել շտապօգնություն կանչել. ՙՍակայն հետո դերասանի ինքնազգացողությունը լավացել է, նա ստացել է իր մրցանակը եւ միայն դրանից հետո գնացել հյուրանոց՚,- տեղեկացրել են մրցանակաբաշխության լրատվական ծառայությունից:
Հավելենք, որ շատ էր ֆանագրաման, իսկ, օրինակ, Անուշ եւ Ինգա Արշակյանների ելույթին ուղեկցող պարային խմբի կատարումը, մեղմ ասած, հարազատ չէր հայկական երգին, ոգուն...  

ՊԱՍՏԵՐՆԱԿԻՑ ՀՈՎՀԱՆՆԵՍ ԻՇԽԱՆՅԱՆ ՄԵԿ ՔԱՅԼ Է

Ինչպես տեղեկացնում է zham.am-ը, ՙՀովհաննես Իշխանյանի դեմ իր ՙՈւվալնյատի օրը՚ գրքի համար ուժային կառույցները գործ սարքելու հետ մեկտեղ մամուլ են նետում գիրքը դատապարտող ՙնամակներ՚, ինչպես ՙԲանակում ծառայած երիտասարդների նախաձեռնություն՚ անհայտ ՙխմբի՚ հայտարարությունը: Այժմ փորձ է արվում ստորագրություններով նամակ նետել մամուլ, եւ zham.am-ին հայտնի դարձավ, որ իշխանական մի լրատվամիջոց ստորագրություններով նման մի նամակ է պատրաստում՚:
Այդ գրքի մասին մենք էլ ենք գրել եւ չենք ուզում կրկնվել ու մեր խոսքն ավարտում ենք մեջբերումով` մեկնաբանությունը թողնելով ընթերցողին. ՙԻշխանությունները ճգնում են Հայաստանում վերադարձնել սովետական ժամանակաշրջանը, երբ պետությունը աշխատավորներից ստորագրություններ էր հավաքում Բորիս Պաստերնակի դեմ իր ՙԴոկտոր ժիվագո՚ վեպի համար՚:    

Կույտը մշակեց ՌՈՒՍԼԱՆ ԹԱԹՈՅԱՆԸ