ՙՀԱՍՆԵԼ ԵՎ ԱՆՑՆԵԼ ՙԲԱՐՍԱՅԻՆ՚

ՀԱՍՆԵԼ ԵՎ ԱՆՑՆԵԼ ՙԲԱՐՍԱՅԻՆ՚

Ինչպես տեղյակ է ֆուտբոլասերը, ֆուտբոլի Հայաստանի այս տարվա առաջնությունը անցումային է, քանի որ եկող տարվանից անցնելու ենք եվրոպական աշուն-գարուն մրցակարգին, ինչին, համոզված ենք, պատրաստ չեն ո°չ մեր խաղադաշտերը, ո°չ էլ ֆուտբոլիստները:
Եվ հենց այդպես էլ եղավ. հետաձգվեց առաջնության առաջին տուրը, ու առաջնությունը մեկնարկեց երկրորդ տուրից: Ինչպես ասում են ռուսները, դրանք դեռ ծաղիկներն են:
Եվ այսպես, ներկայացնենք երկրորդ տուրի, այսինքն` առաջնության մեկնարկային հանդիպումների արդյունքները. ՙԻմպուլս՚-ՙՄիկա՚` 1:2, ՙԱրարատ՚-ՙՇիրակ՚` 1:2, ՙՈւլիս՚-ՙԳանձասար՚` 0:0 եւ ՙԲանանց՚-ՙՓյունիկ՚` 1:1:
Երրորդ տուրի հանդիպումները նման ելք ունեցան.
ՙՇիրակ՚-ՙՈւլիս՚` 1:0, ՙՓյունիկ՚-ՙԻմպուլս՚` 1:3, ՙՄիկա՚-ՙԱրարատ՚` 3:0, ՙԳանձասար՚-ՙԲանանց՚` 3:0:
Կարծես թե սովորական են դարձել ժամանակին հայկական ֆուտբոլի լեգենդ Երեւանի ՙԱրարատի՚ անհաջող ելույթները: Չնայած թիմի գլխավոր մարզիչ ԱԼԲԵՐՏ ՍԱՖԱՐՅԱՆԸ 3-րդ տուրի ՙՄիկայի՚ հետ հանդիպումից հետո վստահեցրեց, որ կոլեկտիվը կաշխատի իր սխալների վրա եւ հետագայում կշտկի դրանք, սակայն դժվար է դրան հավատալ: Դժվար է հավատալ, քանզի ակումբի տերերը ակումբին, կարելի է  ասել, տիրություն չեն անում:  
Սակայն լսենք մարզչին. ՙՙԱրարատի՚ ֆուտբոլիստները հոգեբանական խնդիրներ ունեն, եւ եթե ուշադրություն դարձնեք, ապա կնկատեք, որ մենք երկու խաղակեսերի վերջնամասերում գոլեր ընդունեցինք: Բայց դա լուծելի խնդիր է, որի համար պետք է աշխատի ողջ կոլեկտիվը: Մենք 2-3 ամսում չենք կարող թիմ հավաքել: Չեմ կարող մրցակցին գնահատական տալ, բայց եթե հաղթեցին, ապա միայն գովասանքի են արժանի՚:
Իսկ ՙՄիկայի՚ գլխավոր մարզիչ ԺՈԼՏ ՀՈՌՆՅԱԿԸ   հանդիպումից հետո գոհունակություն հայտնեց իր թիմի կատարած աշխատանքից: ՙԱռաջին տնային հանդիպումն էր, եւ թիմը համառ բնավորություն ցուցաբերեց: Առաջին 20 րոպեներում շատ էր խոտանը, մինչ գոլը մենք 4-5 գոլային հնարավորություն կորցրինք: Կասեմ, որ ամեն տեսանկյունից մի գլուխ բարձր էինք ՙԱրարատից՚: Գովելի է այն, որ տղաները միշտ առաջ էին գնում եւ փոձում էին մեծացնել թիմի առավելությունը, որի համար նրանց շնորհակալություն կհայտնեմ: Չիրացրած պահերի հետ կապված կասեմ, որ թիմը դեռ 2 ամիս է, ինչ մարզվում է միասին, եւ ես դա նորմալ եմ համարում: Բացի այդ, խոտան կա ամեն թիմի խաղում, նույնիսկ` ՙՌեալի՚ եւ ՙԲարսայի՚՚,- կարծում է սլովակ մասնագետը:
Այո°, շուտով ՙԲարսային՚ ու ՙՌեալին՚ էլ կհասնենք:

Պատրաստեց Ռ. ԹԱԹՈՅԱՆԸ