ԻՄ ՎԵՐԱՀՍԿՈՂՈՒԹՅՈՒՆԸ ՔՈ ՎԵՐԱՀՍԿՈՂՈՒԹՅԱՆԸ ՎՆԱՍ ՉԻ...

ԻՄ ՎԵՐԱՀՍԿՈՂՈՒԹՅՈՒՆԸ ՔՈ ՎԵՐԱՀՍԿՈՂՈՒԹՅԱՆԸ ՎՆԱՍ ՉԻ...

Օրերս ՀՀ ԱԺ պետաիրավական հանձնաժողովի նախագահ Դավիթ Հարությունյանը առաջարկել է քաղաքական կուսակցություններին եւ մեծամասնական ընտրակարգով ընտրվողներին ստորագրել քաղաքակիրթ  մրցակցության կանոնների տակ: Խորհրդարանական վերահսկողական մեխանիզմի առաջարկով հանդես է եկել նաեւ ՀՀ ԱԺ նախագահ Սամվել Նիկոյանը, ստեղծել Ազգային ժողովում խումբ` ընտրությունների արդար անցկացման համար: Այս նախաձեռնությունների մասին ՀԱԿ-ը հանդես է եկել հայտարարությամբ եւ ասել, որ դա արվում է այն բանի համար, որպեսզի խոչընդոտեն վերջերս ստեղծված քառակողմ ՙմիասնական շտաբի՚ գործունեությանը: Իսկ թե ինչ արձագանքներ կան այս առաջարկների հետ կապված զրուցեցինք դրանց հեղինակների, ինչպես նաեւ այլ գործիչների հետ:
Այս կապակցությամբ ԱԺ խոսնակ Սամվել Նիկոյանն ասաց. ՙԱյս առաջարկը ես կատարել եմ դեռեւս փետրվար ամսին, եւ առաջին նիստին մասնակցել են բոլոր կուսակցությունները` բացի ՀԱԿ-ից, մասնակցել են ամբողջ հասարակական սեկտորի ներկայացուցիչները, միջազգային կազմակերպությունների ներկայացուցիչները: Ինչ վերաբերվում է նրան, որ չորս կուսակցություններ միացան եւ շտաբ ստեղծեցին, ապա նշեմ, որ մեկը մյուսին չի խանգարում: Իսկ իմ մտադրությունների մասին ես հայտնել եմ դեռեւս փետրվար ամսին, եւ պարբերաբար այդ հարցը քննարկել եմ ԱԺ խմբակցությունների ղեկավարների հետ, նաեւ մարտի 23-ին` կոնֆերանսի ժամանակ, որը կազմակերպել էր դատախազությունը, հասարակական սեկտորը, ԱՄՆ դեսպանատունը: Իսկ ՀԱԿ-ի հայտարարության մասին կասեմ այն, որ խորհուրդ եմ տալիս լսել հանրային լսումների ժամանակ իմ ասած խոսքերը, որտեղ ես դեռեւս փետրվարի 15-ին եւ մարտի 23-ին ենթադրություն էլ չեմ ունեցել, որ ՀԱԿ-ը նման առաջարկությամբ հանդես կգա, եւ եթե ուզում են աշխատել այդ ուղղությամբ, ես միայն ողջունում եմ եւ թող աշխատեն, քանի որ մեկը մյուսին չի խանգարում, այլ մեկը մյուսին լրացնող բաներ են: Եվ առհասարակ, եթե ինչ-որ մեկը ցանկանում է օգտակար լինել այդ հարցերում, այլ ոչ միայն հայտարարություններ կատարեն, ես ողջունում եմ՚:
Իսկ Դավիթ Հարությունյանը մեզ փոխանցեց հետեւյալը. ՙԻմ առաջարկի հետ կապված արդեն կան դրական արձագանքներ, եւ որոշ կուսակցություններ պատրաստ են միանալու դրան, բայց այդ մասին թող իրենք խոսեն: Իսկ ՀԱԿ-ի կողմից կատարված հայտարարության հետ բացարձակ համաձայն չեմ՚:
ՙՄիացել է արդյոք ՙԲարգավաճ Հայաստան՚ կուսակցությունը վերը նշված առաջարկներին ու նախաձեռնություններին՚,- հարցին պատասխանեց ԲՀԿ մամուլի պատասխանատու Բաղդասար Մհերյանը. ՙԴավիթ Հարությունյանը արդեն պաշտոնապես դիմել է ՙԲարգավաճ Հայաստանին՚ եւ մենք միացել ենք այդ նախաձեռնությանը ու պատրաստ ենք բոլոր տեղերում էլ գործակցել եւ այդպես էլ անում են, այդ թվում նաեւ ԱԺ-ում՚:
Այս հարցով երբ դիմեցինք Դաշնակցություն կուսակցության ներկայացուցիչներին` հարցը լսելուն պես խնդրում էին զանգել իրենց կուսակցության մեկ այլ անդամի, քանի որ վերջիններս խիստ զբաղված էին: Իսկ ՀԿԿ առաջին քարտուղար Ռուբեն Թովմասյանը նշեց, որ նրանք միացել են Դավիթ Հարությունյանի առաջարկին:

ԱՐՄԵՆՈՒՀԻ ՀԱԿՈԲՅԱՆ