ԻՆՉՆ Է ՊԵՏՔ ՓՈԽԵԼ ՄԵՐ ԵՐԿՐՈՒՄ ԱՌԱՋԻՆ ՀԵՐԹԻՆ ԵՎ ԻՆՉՊԵՍ

ԻՆՉՆ Է ՊԵՏՔ ՓՈԽԵԼ ՄԵՐ ԵՐԿՐՈՒՄ ԱՌԱՋԻՆ ՀԵՐԹԻՆ ԵՎ ԻՆՉՊԵՍ

Մարտի 10-ին տեղի ունեցավ ՀՀԿ 13-րդ համագումարը, որտեղ ՀՀ նախագահ եւ կուսակցության նախագահ Սերժ Սարգսյանը իր ելույթի ժամանակ առաջ քաշեց փոխվելու անհրաժեշտության թեզը: ՙԻսկ թե ինչն է պետք փոխել առաջին հերթին եւ ինչպես՚,- հարցով Z-S սոցհարցման կենտրոնն անց է կացրել սոցհարցում Երեւան քաղաքում` 100 հոգու շրջանակում: Այս կապակցությամբ մենք լսեցինք նաեւ մի քանի քաղաքական եւ հասարակական գործիչների կարծիքները, որից հետո կներկայացնենք հարցման արդյունքները:
ԱԺ ՀՀԿ խմբակցության անդամ ԱՐՏԱԿ ԶԱՔԱՐՅԱՆ. ՙԻմ կարծիքով, առաջինը պետք է փոխել բոլոր այն բացասական երեւույթները, որոնք, ցավոք, տեղ են գտել մեր հանրային կյանքում: Պետք է փոխել մտածելակերպը, եւ այն ավելի շատ դարձնել պետականակենտրոն ու մարդակենտրոն, եւ սա ուղղված է ողջ հանրությանը, որի համար պետք է քաղաքական համակարգը, կուսակցությունները, իշխանությունը եւ ընդդիմությունը իրենց ծրագրերը կառուցեն այդ ուղղությամբ, հավատան ու փոխեն այդ սկզբունքը ու հավատան, որ կունենան բավարար կամք, ցանկություն, հետեւողականություն նպատակներն իրականացնելու համար: Պետք է փոխել այն ամենը մեր կյանքում, ինչի անհրաժեշտությունը կա, եւ դարձնել ավելի բարեկեցիկ, ավելի առաջատար մեր Հայաստանը: Պետք է վերացնել եւ փոխել այն ամենը, ինչը խանգարում է քաղաքացու սոցիալիզացիային, անձի դերի բարձրացմանը հանրային կյանքում, այն բոլոր մոտեցումներն ու մտածելակերպը, որոնք կարծրացած են, եւ որոնք մենք ժառանգել ենք հնուց: Իսկ ազգային պահպանողական ավանդույթները, հոգեւոր, մշակութային արժեքային համակարգը, իհարկե, փոփոխության ենթակա չեն՚:
Քրիստոնեա-դեմոկրատական կուսակցության նախագահ ԽՈՍՐՈՎ ՀԱՐՈՒԹՅՈՒՆՅԱՆ. ՙՀՀ նախագահի ելույթը, հանրային կյանքի կազմակերպման եւ մեր իրականությունը բարեփոխելու առումով, առաջ քաշեց մի քանի հիմնարար դրույթներ: Առաջինն ու ամենաէականը այն է, որ արձանագրվեց պարզ ու հստակ, որ իշխանություն եւ իշխող կուսակցության անդամ լինելը դա, նախեւառաջ, նշանակում է պատասխանատվություն, որը ամենահիմնարար թեզն էր: Երկրորդը, որը նույնպես էական եմ համարում, այսօրվա մեր իրականությունը առաջ տանելու եւ զարգացնելու առումով, ժամանակն է գիտակցել, որ ոչ թե մարդն է պետության համար, այլ պետությունն է մարդու համար: Իշխանության թիվ 1 պատասխանատվությունը քաղաքացին է իր ամենօրյա հոգսերով, եւ որեւէ տնտեսական ու քաղաքական լավագույն չափանիշը դա, նախեւառաջ, շարքային քաղաքացու, մեր հայրենակիցների առօրյա կյանքը փոխելն է: Դա էր պատճառը, որ ՀՀ նախագահն առաջ քաշեց ոչ թե տնտեսական աճը, այլ համընդհանուր տնտեսական զարգացումը` յուրաքանչյուրի կարողություններն օգտագործելու ճանապարհով: Չի կարող հաջողություն լինել վաղը առանց առողջ եւ ազնիվ մրցակցության, յուրաքանչյուրը պետք է ազատ լինի ցանկացած նպատակ հետապնդելու տնտեսական ոլորտում, բայց ամենաէականը, այս ամենին հասնելու համար պետք է վաղվա Հայաստանի տեսլականը յուրաքանչյուրը իր աչքի առջեւ ունենա: Դա այն Հայաստանն է, որը վերադառնում է իր բնական պատմական արժեհամակարգային բնօրրանը, եւ որի ժողովուրդը եվրոպական քաղաքակրթության անբաժանելի մասնիկն է: Եվ այդ Հայաստանը ունենալու համար պետք է մեր մտածողության մեջ լուրջ տեղաշարժեր կատարենք, ու, քանի դեռ մեր յուրաքանչյուրիս ուղեղում այդ փոփոխությունները տեղի չեն ունենում, ապա մեր իրականությունը եւս չի փոխվի: Իսկ որ այն պետք է փոխել, դրանում կասկած չկա, որի համար պետք է վստահենք սեփական ուժերին եւ հավատանք այն տեսլականին, որին մենք ձգտում ենք, եվրոպական արժեհամակարգի ձեւավորված Հայաստան է սպասում եվրոպական ընտանիքը: ՀՀ նախագահի այս ելույթը մեզ նոր մշակույթ է բերում գաղափարական հայեցակարգային առումով: Կուսակցության հնգամյա գործունեության հանրագումարը ներկայացնելիս նա փորձում էր ներկայացնել սեփական արածը եւ կուսակցության քաղաքական պատասխանատու դերակատարումը փորձում էր ընդգծել ոչ թե ի հաշիվ մնացյալի սեւացման կամ նսեմացման, որը շատ էական է: Մեծ իմաստով ՀՀ նախագահի ելույթը, իմ կարծիքով, կարելի է ընկալել որպես սեփական պատմական պատասխանատվությունը խորապես գիտակցող ղեկավարի անկեղծ զրույց ոչ միայն իր կուսակիցների հետ, այլ նրա զրույցի հասցեատերը յուրաքանչյուր հայաստանցին էր՚:
Հանրային խորհրդի նախագահ ՎԱԶԳԵՆ ՄԱՆՈՒԿՅԱՆ. ՙԵս կարծում եմ` ճիշտ կլիներ այդ հարցը ուղղեիք ՀՀ նախագահին, այլ ոչ թե ինձ, որովհետեւ իմ ենթադրությունները եւ նրա ասածները կարող է իրար չհամընկնեն, բայց բնական է, որ նախագահը ցույց տվեց թերությունները, կոռուպցիան, քննադատեց ներկա իրավիճակը, ու բնական է, որ այդ ամենը պետք է փոխել: Հավանաբար նկատի ունի ե°ւ կառուցվածքային, ե°ւ կադրային փոփոխությունները, ինչպես նաեւ մտածելակերպի փոփոխությունները, իսկ ավելի մանրամասն հարցրեք իրեն կամ իր կուսակիցներին՚:

Մեր համաքաղաքացիները տվել են հետեւյալ պատասխանները.
1. Ձերբազատվել կոռումպացված լկտի չինովնիկներից, նախեւառաջ` դատարաններում, հարկայինում, տեղական մարմիններում-35%:
2. ԱԺ-ն ու կառավարությունը համալրել կիրթ, զարգացած, բանիմաց մարդկանցով-21%:
3. Պետք է փոխել բոլորիս մտածողությունը, այդ ժամանակ կփոխվի կյանքը-13%:
4. Մեզ պետք է երկիրը կարգի բերող ազգային դիկտատուրա-17%:
5. Միայն իշխանափոխությունը բան կփոխի-5%:
6. Երկիրը երկիր չի, ոչինչ հնարավոր չի-7%
7. Դժվարացել են պատասխանել-2%:

ԱՐՄԵՆՈՒՀԻ ՀԱԿՈԲՅԱՆ