ԻՆՉՈՒ ԳՈՐԻՍԻ ԹԱՏՐՈՆԸ ՉՄԱՍՆԱԿՑԵՑ

ԻՆՉՈՒ ԳՈՐԻՍԻ ԹԱՏՐՈՆԸ ՉՄԱՍՆԱԿՑԵՑ

Երեկ մեկնարկեց ՙԹատրոն X՚ 5-րդ թատերական փառատոնը: Ապրիլի 2-ից մայիսի 3-ն անցկացվող մեկամսյա փառատոնի շրջանակներում շուրջ 30 թատրոն եւ թատերախումբ հանդես կգան անցյալ տարվա ընթացքում բեմադրած ներկայացումներով:
Ինչպես մամուլի ասուլիսում նշեց Տիկնիկային թատրոնի գեղարվեստական ղեկավար ՌՈՒԲԵՆ ԲԱԲԱՅԱՆԸ. ՙԱյս փառատոնն իր բնույթով եւ իր քննարկումներով առաջին հերթին ուղղված է նրան, որ փորձենք հասկանալ մշակույթի պարագայում թատրոնի ազդեցությունը հասարակության վրա: Ուրախ եմ, որ քննարկումները գնալով դառնում են, չէի ասի` ավելի մասնագիտական, այլ ավելի հետաքրքիր, ավելի բարդ ու ավելի լայն ասպարեզ են ընդգրկում քննարկողները: Իսկապես ընդգրկում են տարբեր ոլորտների մարդկանց եւ այն հասարակական, երիտասարդական լավ խոստումները, որ տեսնում ենք վերջին տարիներին, գուցե նաեւ այս քննարկումների ու փառատոնի ազդեցությունն է: Բոլոր դեպքերում մի լավ արտահայտություն կա: Եթե չեմ սխալվում, Չերչիլն է ասել. ՙՔաղաքական գործիչը մտածում է ապագա ընտրությունների մասին, իսկ պետական գործիչըª ապագա սերնդի՚: Այս տեսակետից կուզենայի, որ մենք դեպի երկրորդն ավելի շատ շեղվենք՚:
Փառատոնի նախագահ ԱՐԱ ԽԶՄԱԼՅԱՆՆ էլ հավելեց, որ արդեն հինգերորդ տարին է, եւ պետք է մեծացնել մայրաքաղաքի եւ մարզերի բանավոր շփման համատեքստը, այսինքնª չբավարարվել միայն վիզուալ ակցիաներով, ներկայացումներով ու համերգներով. ՙՇատ կարեւոր է, որ կազմակերպենք կլոր սեղաններ, բանավեճեր, ստեղծագործական հանդիպումներ՚:
Փառատոնի կազմակերպիչների համոզմամբ, այս հինգ տարիների ընթացքում ՙԹատրոն X՚-ի սկզբունքն է` յուրաքանչյուր տարի ամփոփել նախորդ տարվա լավագույն ներկայացումները: Իսկ այս տարի, ըստ նրանց,16 պետական թատրոններից մասնակցում է միայն 13-ը: Իսկ Գորիսի թատրոնի` փառատոնին չմասնակցելն անակնկալ էր ՀՀ մշակույթի փոխնախարար Արթուր Պողոսյանի համար, քանի որ, ըստ փոխնախարարի, այն պետականորեն որոշակի պարտավորություն ունի: ՙՀավանաբար նոր ներկայացում չեն ունեցել, դրա համար չեն մասնակցել՚,- գուցե ինքն իրեն համոզելու համար ասաց փոխնախարարը:

ԼԻԼԻԹ ԵՂԻԱԶԱՐՅԱՆ
ՙ