ՙՙՙՙՙՀԱՄԱԼՍԱՐԱՆՈՒՄ` ՕՐԸ ՑԵՐԵԿՈՎ

ՙՀԱՄԱԼՍԱՐԱՆՈՒՄ` ՕՐԸ ՑԵՐԵԿՈՎ

1990թ. ծնված  Սարգիս Նազարեթյանը եւ 1992թ. ծնված Գոռ Խաչատրյանը հայտնվել էին հիվանդանոցում նույն օրը` ապրիլի 3-ին, 80 րոպե տարբերությամբ: Ժամանակային նույն տարբերությամբ ոստիկանության Մարաշի բաժանմունքում  ստացվել էր 2 ահազանգ այդ երիտասարդներին հիվանդանոց ընդունելու վերաբերյալ: Ոստիկանության աշխատակիցները պարզել էին, որ այդ օրը, ժամը 13:30-ի սահմաններում, Երեւանի պետական համալսարանի կենտրոնական մասնաշենքի 1-ին հարկում անհայտ անձը սուր կտրող գործիքով մարմնական վնասվածքներ է պատճառել Ս. Նազարեթյանին եւ Գ. Խաչատրյանին. երկուսն էլ դանակահարվել էին որովայնի շրջանում:
Հավանաբար, թերթի սույն համարը լույս տեսնելու պահին ոստիկաններին, հետեւաբարեւ` հանրությանը, հայտնի կդառնան կրկնակի դանակահարողը, նույնանման հաշվեհարդարի դրդապատճառները եւ այլ մանրամասներ հանդուգն այդ հանցագործության վերաբերյալ: Նման ՙլավատեսությունը՚ հիմնավորված է մի շարք հանգամանքներով, որոնց առկայությունը զարմանք է առաջացնում այն առումով, որ…
Սակայն, դեդեկտիվ եզրակացությունները թողնենք ընթերցողին, միայն հավելենք, որ նշանակվել է դատաբժշկական փորձաքննություն, հանգամանքները` պարզվում են: Այսինքն` կատարվում է քննություն:

ԼՐԱՑՈՒՑԻՉ ՀԱՍՑԵԱԳՐՎԱԾ ՊԱՐԶԱԲԱՆՈՒՄ

Հմայակ Հովհաննիսյանի` ՙԱռավոտ՚ օրաթերթի ապրիլի 3-ի համարում հրապարակված ՙՄուկուչյանը` մեռած հոգիներով ընտրացուցակների մասին՚ հոդվածին ՀՀ ոստիկանությունը  արձագանքել է նույն օրը, հետեւյալ պարզաբանումով. ՙՀոդվածում հայտարարություն է տարածել, թե մահացած քաղաքացիներից բացի, ընտրացուցակներում ընդգրկված են նաեւ դպրոցահասակներ:
Տարաբնույթ մեկնաբանությունները բացառելու համար պարզաբանում ենք.
Ընտրողների ռեգիստրը ձեւավորվում է ՀՀ բնակչության պետական ռեգիստրի տվյալների հիման վրա` ավտոմատացված եղանակով` ապահովելով քվեարկության օրվա դրությամբ 18 տարին լրացող անձանց ընտրելու իրավունքի իրացումը:
2012 թվականի մայիսի 6-ի, ՀՀ Ազգային ժողովի ընտրությունների ընտրացուցակներում ընդգրկված են ընտրության օրվա դրությամբ 18 տարին լրացող եւ բարձր տարիք ունեցող ՀՀ քաղաքացիները: Հետեւաբար` 2012 թվականի մայիսի 6-ի դրությամբ 18 տարին լրացող քաղաքացիներին ընտրացուցակներում ընդգրկելն իրավաչափ է:
Ինչ վերաբերում է ընտրացուցակներում  մահացած անձանց ընդգրկված լինելու վերաբերյալ հայտարարությանը, ապա նշված հարցի կապակցությամբ ՀՀ ոստիկանության կողմից բազմիցս տրվել են գրավոր եւ բանավոր պարզաբանումներ՚:
Կարծում ենք, որ պատասխան ՙպարզաբանումները՚ իրենց սպասել չեն տա:

Ա. ԱԲԳԱՐՅԱՆ