ՙՙՈՍՏԻԿԱՆՈՒԹՅՈՒՆԸ ՊԱՏՐԱՍՏՎՈՒՄ Է ԸՆՏՐՈՒԹՅՈՒՆՆԵՐԻՆ

ՙՈՍՏԻԿԱՆՈՒԹՅՈՒՆԸ ՊԱՏՐԱՍՏՎՈՒՄ Է ԸՆՏՐՈՒԹՅՈՒՆՆԵՐԻՆ

Երեկ, ապրիլի 3-ին, ՀՀ ոստիկանությունում տեղի ունեցավ Ազգային ժողովի ընտրությունների ընթացքում պատշաճ հասարակական կարգ ու կանոն հաստատելու, ընտրությունների բնականոն ընթացքն ապահովելու նպատակով ՀՀ ոստիկանության կենտրոնական ապարատում ստեղծված օպերատիվ շտաբի անդրանիկ նիստը, որի ժամանակ ոստիկանության պետ, գեներալ-լեյտենանտ Վլադիմիր Գասպարյանը ներկայացրեց օպերատիվ շտաբի ձեւավորման անհրաժեշտությունը, կառուցվածքը եւ խնդիրները:
Ոստիկանության պետն անդրադարձավ այս ժամանակահատվածում կատարված աշխատանքին եւ լրագրողներին կոչ արեց ակտիվ համագործակցել ոստիկանության հետ` ահազանգելով ցանկացած թերության եւ խախտման մասին, ինչը, ըստ նրա, կօգնի լիարժեք իրագործել ոստիկանության որդեգրած նպատակները: ՀՀ ոստիկանապետը, տեղեկացրեց նաեւ, որ առաջիկայում նախատեսվում է ընդլայնված նիստ` նախընտրական շտաբների բոլոր պետերի, դիտորդական առաքելությունների ներկայացուցիչների եւ ԶԼՄ-ների մասնակցությամբ: Վլադիմիր Գասպարյանը եւս մեկ անգամ ընդգծեց. ՙՄենք չենք զբաղվել ու չենք զբաղվում քաղաքականությամբ: Մենք լինելու ենք անաչառ , իսկ մեր մոտեցումները լինելու են վերկուսակցական եւ վերքաղաքական: ՀՀ ոստիկանության կենտրոնական ապարատում ստեղծված օպերատիվ շտաբի խնդիրը լինելու է քաղաքական ուժերի շտաբների անվտանգությունը ապահովելը, ինչպես նաեւ նախընտրական եւ հետընտրական գործընթացները վերահսկելը՚:
Միեւնույն ժամանակ, ՀՀ ոստիկանապետը լրագրողներին հորդորեց. ՙԽնդրում եմ, այս ընթացքում ոչինչ չուռճացնել: Ես` ինքս, անձնական պատասխանատվություն եմ կրում ընտրությունները խաղաղ անցկացնելու համար: Ոստիկանության համար գոյություն չունի իշխանություն, ընդդիմություն, գոյություն ունի միայն երկիր, պետություն՚:
ՀՀ ոստիկանության պետի տեղակալ Արթուր Օսիկյանն էլ օպերատիվ շտաբի անդրանիկ նիստի ժամանակ անդրադառնալով Հմայակ Հովհաննիսյանի այն հայտարարությանը, թե ընտրական ցուցակներում դեռահասների անուններ են գրանցված, նշեց. ՙՀամակարգը ավտոմատ է ձեւավորվում եւ տեխնիկապես էլ ուղղակի հնարավոր չէ, որ նման բան լինի եւ ցուցակում դեռահաս հայտնվի՚:
Նա նկատեց, թե հասկանում է, որ ՙբացարձակ ճշգրիտ՚ ցուցակներ չկան, բայց խոստացավ. ՙԱմեն ինչ անելու ենք, որ ցուցակները կատարյալ լինեն: Օպերատիվ շտաբին կից գործում է ենթահանձնաժողով, որի անդամները փորձում են ուսումնասիրել թեժ գծով ստացված ահազանգերը ու վերացնել անճշտությունները՚:
Հանդիպման վերջում էլ, ՀՀ ոստիկանության ՀԿԼ վարչության պետ Աշոտ Ահարոնյանն էլ, ում, բնականաբար, լրատվամիջոցների հետ ծանր աշխատանքի ՙառյուծի բաժինն՚ է հասնելու, նշեց. ՙՄենք ամեն ինչ անելու ենք հրապարակումներին հնարավորինս արագ արձագանքելու եւ բոլոր հրապարակումները արժեւորելու համար: Մեզ համար չեն լինելու կարեւոր եւ անկարեւոր հրապարակումներ: Ցանկացած հրապարակում մեզ համար կարեւոր նշանակություն է ունենալու`անկախ նրանից թե այն ինչ ուղղվածություն կամ ինչ կոնտեքստ կունենա՚:

ԳԱՅԱՆԵ ԶԱՐԳԱՐՅԱՆ