Մաշտոցի պուրակում արդեն մեկ շաբաթ է...

Մաշտոցի պուրակում արդեն մեկ շաբաթ է, ինչ ՙքաղաքացիական ապամոնտաժողներ՚ կան` հռչակավոր ռեժիսոր ՏԻԳՐԱՆ ԽԶՄԱԼՅԱՆԻ գլխավորությամբ: Ապամոնտաժումը նշանակված էր դեռ մարտի 31-ին, սակայն զարմանալիորեն ո°չ ապամոնտաժումն էր տեղի ունեցել, ո°չ էլ ապամոնտաժողները բավարար վճռականություն են դրսեւորել եւ ձերբակալվել: Հիմա էլ մի նոր զարմանալի բան են մոգոնել` հռչակել են քաղաքացիական անհնազանդության շարժում, դրա հռչակման երկար-բարակ տեքստ են գրել: Զարմանալի է, թե ինչպես ոմանք անհասկանալի շոու կազմակերպելու համար կարող են ֆարսի վերածել պուրակը ՙբուծիկներից՚ ազատելու միանգամայն անհրաժեշտ եւ օգտակար գործը: Դե ինչ, երեւի թե այդ ՙապամոնտաժողների՚ ՙքաղաքացիական անհնազանդությունը՚ տեսնելով, ոչ բռնի դիմադրության մեթոդի հիմնադիր Մահաթմա Գանդին հասցրել է դագաղում շրջվել... Չնայած` դա էլ չի կարող, քանզի Հնդկաստանում հանգուցյալներին ոչ թե թաղում են, այլ դիակիզում:
Զարմանալի բան է խոստովանել ռուս պոռնոաստղ ԵԼԵՆԱ ԲԵՐԿՈՎԱՆ` որ վերջերս վիրահատական ճանապարհով վերականգնել է կուսությունը, քանի որ ցանկանում է նորից վերապրել կուսազրկման երկյուղը: Ինչեւէ, զարմանալով հանդերձ, պետք է խոստովանել, որ այդ պոռնոաստղը հաստատ շատ ավելի մաքուր ու բարոյական է, քան իրենց կույսի տեղ դնող մեր շատ ու շատ քաղաքական գործիչներ: Զորօրինակ` ինչպե±ս է ազնվությունից, օրինականությունից, պատիվ ու արժանապատվությունից բարբաջում Գագիկ Ջհանգիրյանի պես մեկը, որը միայնակ երեւի թե ավելի շատ մեղքեր շալակած ունի, քան երկրագնդի բոլոր պոռնոաստղերը միասին վերցված:
Անշուշտ, նորություն չէ Ադրբեջանում տիրող հայատյացությունը, սակայն այն, ինչ պատմում են ՙԵվրանեստի՚ Բաքու մեկնած պատգամավորները, ստիպում է զարմանալ կրկին ու կրկին: Այսպես, ըստ ՆԱԻՐԱ ԶՈՀՐԱԲՅԱՆԻ, ՙհյուրանոցից ու նիստի շենքերից հեռու գնալ մենք պարզապես չենք կարող: Անգամ մեկ սենյակից մյուսը գալու ընթացքում մեզ ուղեկցում են: Եվ դա կարելի է հասկանալ, քանզի զգացվում է, որ Ադրբեջանցիները հատուկ ատելությամբ են լցված ընդդեմ հայկական կողմի բոլոր ներկայացուցիչների՚: Այդ լսելով ակամա վերհիշում եմ ադրբեջանցի լրագրողների այցերը Երեւան` հանգիստ կարողանում էին շրջել փողոցներով, մտնել ռեստորաններ` ուտել-խմելու, հանդիպել հայ քաղաքական գործիչներին, թե չէ ի±նչ է նշանակում, որ հյուրանոցի մի սենյակից մյուսը առանց թիկնապահի չկարողանաս տեղաշարժվել...
Վարդան Օսկանյանն այնքան է խոսել, որ ԲՀԿ-ն կոալիցիայի մեջ ձեւական է եղել միշտ ու ոչ մի բանի համար պատասխանատու չէ, որ ԲՀԿ-ի ներսում ոմանք զարմանալիորեն սկսել են դրան հավատալ: Դե, եթե նույն սուտը հազար անգամ կրկնես, ապա ինչպես ուսուցանում էր Գեբելսը, ինչքան ավելի մեծ լինի այդ սուտը, այնքան հեշտ դրան կհավատան: Ու ահա արդյունքը` ՏԻԳՐԱՆ ՈՒՐԻԽԱՆՅԱՆԸ հայտարարում է. ՙՄենք կցանկանայինք, որ ԲՀԿ-ն հստակ պատասխանատվություն ունենար եւ կրեր այդ պատասխանատվությունը՚: Դե ինչ, զարմանալով հանդերձ, պատգամավորության թեկնածուին հուշենք, որ իր երազանքը կատարված է վաղուց, դեռ մինչեւ իր` ԲՀԿ անդամագրվելը, ուստի ընդամենը պետք է տեսնել այդ պատասխանատվությունը եւ կրել այն:

Զարմացած է  ՀՈՎՀԱՆՆԵՍ ԳԱԼԱՋՅԱՆԸ