Իմ կարծիքով մենք այդ օրինագիծը ուշացնում ենք

ԻՄ ԿԱՐԾԻՔՈՎ, ՄԵՆՔ ԱՅԴ ՕՐԻՆԱԳԻԾԸ ՈՒՇԱՑՆՈՒՄ ԵՆՔ՚

ՙԿյանքի խոսք՚ աղանդի կողմից հիմնադրված ՙԿյանքի խոսք՚ հանրակրթական դպրոցի ստեղծման մասին որոշեցինք կարծիքներ վերցնել ՀՀ ԱԺ կրթության հանձնաժողովից: Մի քանի օր շարունակ, փորձում էինք կապ հաստատել հանձնաժողովի նախագահ ՀՀԿ-ական պատգամավոր ԱՐՏԱԿ ԴԱՎԹՅԱՆԻ հետ, սակայն ապարդյուն, քանի որ պարոն Դավթյանը կամ ժամեր շարունակ գտնվում էր նիստերի դահլիճում կամ հյուրեր էր ընդունում իր աշխատասենյակում եւ այդպես էլ ժամանակ չգտավ մեր հարցերին պատասխանելու համար` նույնիսկ այն դեպքում, երբ մենք փոխանցել էինք, թե ինչ հարցով ենք զանգահարում: 
Իսկ նույն հանձնաժողովի կրկին ՀՀԿ-ական անդամ ԿԱՐԻՆԵ ԱՃԵՄՅԱՆԸ նույնիսկ տեղյակ չէր, որ Երեւան քաղաքում գործում է նմանատիպ հանրակրթական դպրոց` նշելով հետեւյալը. ՙԵս տեղյակ եմ այդ ուղղության մասին, բայց առաջին անգամ եմ լսում, որ մեզ մոտ գոյություն ունի աղանդավորական դպրոց, հնարավոր է, որ ես լավ տեղեկացված չեմ: Ես հետեւում եմ լրատվամիջոցների հրապարակումներին, բայց քանի որ այս քանի օրը նիստերի օրեր են, շատ չեմ հետեւել: Կծանոթանամ այդ ամենի հետ եւ հետո կասեմ իմ կարծիքը, իսկ ընդհանուր առմամբ վատ եմ վերաբերվում նմանատիպ երեւույթներին եւ ինձ թվում է, որ մենք այդ օրինագիծը ուշացնում ենք, որովհետեւ աղանդները արդեն շատ են ակտիվանում, եւ շատ լուրջ ուշադրության պետք է արժանացնի ե°ւ կառավարությունը, ե°ւ Ազգային ժողովը: Պետք չէ այդ հարցը բարձիթողի անել, քանի որ այն շատ վտանգավոր է մեր երկրի համար, ես անպայման կդիմեմ կառավարությանը, մեր հանձնաժողովին: Դրա մասին մենք նամակներ չենք ստացել, բայց այդ հարցերով ես կդիմեմ նաեւ ԿԳ նախարարին՚: 
ԱԺ-ում ընդդիմություն ներկայացնող ՙԺառանգություն՚ կուսակցության վերը նշված հանձնաժողովի անդամ ԱՆԱՀԻՏ ԲԱԽՇՅԱՆԸ մեզ հետ զրույցում ասաց հետեւյալը. ՙԱյդ դպրոցի հետ կապված բավականին գործ է արվել, բայց թե ինչու է շարունակում այդ դպրոցը իր գործունեությունը` հարցրեք ԿԳ նախարարությանը: Ծնողները բողոքեցին այդ դպրոցի համար, բայց արմատական լուծում չի իրականացվել եւ դժվարանում եմ ասել, թե ինչպես պիտի տրվի: Ես առաջիկայում նախապատրաստում եմ կլոր սեղան քրիստոնեական դաստիարակության կենտրոնի հետ, որտեղ անպայման կբարձրացնեմ այդ հարցը՚: Կդիմե±ք այդ հարցով ՀՀ կառավարությանը` հարցին տիկին Բախշյանը տարակուսեց եւ ասաց. ՙՉեմ մտածել, չգիտեմ: Այդ դպրոցի հետ կապված ԳԹԿ-ի կողմից անցկացված արտաքին գնահատման արդյունքները բացարձակ վատն են եղել եւ այդ դպրոցի քննությունների որակի համար գրավոր հարցում է արվել՚: Երբ մենք տիկին Բախշյանին ասացինք, որ ՙԿյանքի խոսք՚ հանրակրթական դպրոցի տնօրենը բացարձակ սուտ է համարել ԳԹԿ-ի արդյունքները, վերջինս զարմացած նշեց. ՙՈ±նց թե սուտ են ասում, այդ տվյալները ինձ մոտ կան եւ շատ հավաստի են, որոնք բավականին մտահոգիչ են եւ, անշուշտ, պետք է ինչ-որ բան մտածի ԿԳ նախարարությունը, քայլեր անի եւ անում է, բայց առայժմ Հայաստանում գործում է խղճի ազատության մասին օրենքը՚: Իսկ չե±ք կարծում, որ այդ խղճի ազատության օրենքի տակ, այդ երեխաներն են փչանում` հարցին ի պատասխան Ա. Բախշանը ասաց. ՙԱյո, մեր երկրի շատ օրենքների տակ շատ մարդիկ են փչանում, որոնցից մեկն էլ հենց դա է, որին պետք է արմատական լուծում, իսկ թե որն է դա այս պահին ես էլ չգիտեմ՚:

ԱՐՄԵՆՈՒՀԻ ՀԱԿՈԲՅԱՆ