Թրամփը Նոր Զելանդիայում կորոնավիրուսի նոր 9 դեպքը «սարսափելի» աճ է որակել. երկրի վարչապետն արձագանքել է

Միացյալ Նահանգների նախագահ Դոնալդ Թրամփն անդրադարձել է Նոր Զելանդիայում կորոնավիրուսային վարակի նոր օջախի հայտնաբերմանը՝ հայտարարելով, որ նախկինում վարակի նկատմամբ հաղթանակ հայտարարած երկրում այժմ դեպքերի «կտրուկ, սարսափելի աճ է», գրում է The Guardian-ը:

«Տեսնո՞ւմ եք՝ ինչ է կատարվում Նոր Զելանդիայում: Նրանք հաղթահարել էին, այդ լուրը թերթերի առաջին էջերին էր, քանի որ ցանկանում էին ինձ ինչ-որ բան ցույց տալ: Բայց հիմա Նոր Զելանդիայում դեպքերի շատ մեծ աճ է և գիտեք՝ դա սարսափելի է: Մենք դա չենք ցանկանում, սակայն դա անտեսանելի թշնամին է, որին Չինաստանը չպետք է թույլ տար Եվրոպա և աշխարհի մյուս մասերը հասնել»,-Մինեսոտայում կայացած հանրահավաքի ժամանակ հայտարարել է Թրամփը:

Հատկանշական է, որ Թրամփի հայտարարության օրը Նոր Զելանդիայում գրանցվել է վարակման ընդամենը ինը դեպք, մինչդեռ ԱՄՆ-նում նույն օրը գրանցվել է մոտ 42 000 դեպք: Նոր Զելանդիայի վարչապետ Ջասինդա Արդերնը, արձագանքելով Թրամփի ասածին, նշել է, որ ԱՄՆ-ում և Նոր Զելանդիայում համաճարակային իրավիճակներն «անհամեմատելի» են:

Ինչ վերաբերում է զոհերին, ապա ամբողջ համավարակի ընթացքում երկրում գրանցվել է մահվան ընդամենը 22 դեպք, մինչդեռ ԱՄՆ-ում ցուցանիշը գերազանցել է 170 000-ը, ինչի հետևանքով ԱՄՆ-ին բաժին է հասնում ամբողջ աշխարհում կորոնավիրուսային մահացության ցուցանիշի 22%-ը:

Հայտնի է, որ հունիսին Նոր Զելանդիայի իշխանությունները հայտարարել էին վարակի նկատմամբ հաղթանակ տանելու մասին. երկրում 102 օր շարունակ վարակման որևէ դեպք չէր գրանցվել: Սակայն նախորդ շաբաթ չորս մարդու մոտ կորոնավիրուս է ախտորոշվել, ինչից հետո ի հայտ են եկել տասնյակ վարակակիրներ: Բռնկման նոր օջախն Օքլենդ քաղաքում է, սակայն իրավիճակը վերահսկելի է:
 

Այս թեմայով ՇՏԱՊ. 36-ամյա գործարարին մահացած են գտել. Հրապարակ Մոսկվայում բենզինի վաճառքի նոր սահմանափակում է մտցվել Ռուսաստանի արտաքին քաղաքականության մեջ նոր, եզակի փորձ է սկսում ի հայտ գալ. Փորձագետ Նավթի համաշխարհային գների նոր թռիչքը դարձավ անխուսափելի. հնարավոր է 150 դոլարից անցումը Թրամփը ստորագրեց «դժոխային պատժամիջոցների» օրենքը Ռուսաստանի դեմ