ՀԱՄՈ ԲԵԿՆԱԶԱՐՅԱՆԻ ԱՆՎԱՆ «ՀԱՅՖԻԼՄ» ԿԻՆՈՍՏՈՒԴԻԱՆ ԱՅՍՕՐ ՉՈՒՆԻ ՀՆԱՐԱՎՈՐՈՒԹՅՈՒՆ` ՖԻԼՄ ԱՐՏԱԴՐԵԼՈՒ

Ժամանակին Համո Բեկնազարյանի անվան «Հայֆիլմ» կինոստուդիան մեզ էր պարգեւում գեղարվեստական ճաշակով ֆիլմեր: Այսօր մեր մշակույթի այրերին չի հետաքրքրում ոչ կինոն, ոչ էլ թատրոնը: Այլապես այդպես տխուր չէր լինի նրանց վիճակը: Լինելով անտեսված` նրանք փորձում են քայլեր անել, որպեսզի որոշ չափով վերականգնեն այն, ինչ կործանված է: Բայց այդ ճանապարհին ստանում են մերժում: Հարգելի՛ պարոնայք, մեկ-մեկ էլ ձեր աշխատասենյակի պատուհաններից փորձեք նայել արվեստագետի եւ մշակույթի գործչի խնդիրներին: Այդքան անհաղորդ մի եղեք: Ինչպես ասում են` կյանքն աստիճան է: Միգուցե, իջնելուց երես առ երես հանդիպեք նրանց, որոնց ժամանակին անտեսել եք: Այսօր մեր զրուցակիցն է Համո Բեկնազարյանի անվան «Հայֆիլմ» կինոստուդիայի տնօրեն ԴԱՎԻԹ ԿԱՐԱՊԵՏՅԱՆԸ, որի հետ խոսելու ենք «Հայֆիլմ» կինոստուդիայի գործունեությունից եւ խնդիրներից:

ՉՈՒՆԵՆՔ ՀՆԱՐԱՎՈՐՈՒԹՅՈՒՆ` ՀԱՆԴԵՍ ԳԱԼՈՒ ՈՐՊԵՍ ԱՌԱՆՁԻՆ ԿԻՆՈԱՐՏԱԴՐՈՂ

– «Հայֆիլմ» կինոստուդիան այսօր կինոարտադրությամբ զբաղվո՞ւմ է:

– Մենք առանձին կինո չենք արտադրում: Հնարավորության դեպքում գործընկերների հետ հանդես ենք գալիս որպես համարտադրող: Քանի որ տեխնիկական խնդիրները, ֆինանսական միջոցները թույլ չեն տալիս, որպեսզի ունենանք հնարավորություն` հանդես գալու որպես առանձին կինոարտադրող:

– Այդ խնդրով դիմե՞լ եք համապատասխան կառույցների:

– Այդ հարցով զբաղվում է Ազգային կինոկենտրոնը:Գումարները, որոնք տրվում են անհատույց, տրամադրում են Ազգային կինոկենտրոնին, որտեղ ձեւավորվում է համապատասխան հանձնաժողովը, որոնք էլ ուսումնասիրում են բոլոր հայտերը: Մենք ՓԲԸ ենք եւ ենթարկվում ենք պետական գույքի կառավարման վարչությանը: Դիմել ենք ֆիլմ արտադրելու համար եւ ստացել ենք մերժում:

– Ո՞րն է եղել մերժելու պատճառը:

– Դիտողություներ եղան` ֆիլմի սցենարի հետ կապված: Մենք հիմա մտածում ենք այդ ուղղությամբ, որպեսզի կատարենք փոփոխություններ: Քանի որ սցենարը մերը չէր, սցենարը փոփոխելու մասով արդեն իրավունք ենք ստացել: Փոփոխելուց հետո հերթական անգամ հայտ կներկայացնենք, չգիտեմ, թե որքանով դա կստացվի:

– Փորձե՞լ եք հովանավորներ գտնել:

– Եղան շատ լուրջ հովանավորներ, որոնք պատրաստ էին աջակցելու: Բայց քանի որ մեզ մերժեցին, բնականաբար, այդ հովանավորների ակնկալվող գումարները չկիրառվեցին: Եթե չկա պետական աջակցություն, չի կարող լինել հովանավորչություն:

– Բացի ֆիլմից, այսօր ի՞նչ գործունեությամբ եք զբաղվում:

– Կինոարտադրողները հաճախակի օգտվում են մեր տարատեսակ վարձակալություններից: Դա կարող է լինել տաղավարների վարձակալություն, դեկորացիաների պատրաստում: Մենք պատրաստ ենք մատուցել ցանկացած տեսակի ծառայություններ: Այդ առումով խնդիրներ չունենք:

ՉԿԱ ՇԱՀՈՒՅԹ, ՉԿԱ ՊԱՀԱՆՋԱՐԿ

– Մոտավորապես որքա՞ն գումար է հարկավոր երեքժամանոց գեղարվեստական ֆիլմ նկարահանելու համար:

– Կարող է լինել երկու հարյուր միլիոնից մինչեւ երկու միլիարդ: Այն կախված է սցենարից եւ սյուժետային բարդություններից:

– Պանդեմիան ինչպե՞ս անդրադարձավ Ձեր գործունեության վրա:

– Բնականաբար` շատ վատ, որովհետեւ մեզ մոտ շատ նկարահանումներ պիտի ընթանային, բայց քանի որ պետությունից ոչ մի լումա չենք ստանում, դա միակ աղբյուրն էր, որի միջոցով գոյատեւում էինք: Քանի որ չեն աշխատում մասնավոր կառույցները, նշանակում է` չունենք շահույթ, չի առաջանում գովազդի պահանջարկ:

– «Հայֆիլմն» աշխատո՞ւմ է:

– Կինոարտադրությունը բաց է: Բայց փաստը մնում է փաստ, որ ընկերությունը, որը ֆինանսավորում է, պետք է համագործակցի մեզ հետ, տարածքից օգտվի եւ էլի շատ ծառայություններից: Նույն գովազդատուն, որպեսզի նկարահանի իր ապրանքանիշը, ֆինանսական խնդիրների պատճառով այսօր հրաժարվել է աշխատել մեզ հետ: Տեսահոլովակներ նկարահանելու համար պետք է մեկնեին արտասահման, բայց ստեղծված իրավիճակից ելնելով` իրենք չեն կարող տեսահոլովակը կյանքի կոչել: Բնականաբար, չկան միջոցները, չկա եւ տեսահոլովակի նկարահանում:

ՆՈՒՆԵ ԶԱՔԱՐՅԱՆ

Այս թեմայով «Հայֆիլմ» կինոստուդիայի կառավարումը կփոխանցվի ԿԳՄՍՆ-ին Արարատի մարզպետը հունից դուրս եկավ Տիգրանաշենի մասին հարցից.Ոնց որ կինո նկարեք, արա, գործիդ նայի, ընգեր ջան Ապրիլի 16-ը Հայ կինոյի օրն է. ինչ միջոցառումներ են նախատեսված Հայաստանում ռուսական կինոն է հյուրընկալում Իսկ Դուք հիշեցի՞ք, թե ո՞ր հայտնի ֆիլմից է այս դրվագը