ԱՐԱԳԱԾՈՏՆԻ ՄԱՐԶՊԵՏԻ ՀԵՐԹԱԿԱՆ ՑԱՎԱԼԻ ՁԱԽՈՂՈՒՄՆԵՐԸ…

Արխիվ 16-20 24 Հուլիս, 2020 16:00

Մեր նախորդ՝ 20.08.2019թ https://iravunk.com/news/91616, Արագածոտնի մարզպետը իր լիազորությունների գերազանցումով տապալում է պետական կառավարման համակարգ, 19.12.2019թ https://iravunk.com/news/100918, Արագածոտնում անիշխանություն թե՞ օրենքների ու կարգերի խեղաթյուրում, իսկ գուցե՞ բոլորը միասին… հրապարակումներում անդրադարձել ենք Արագածոտնի մարզպետի սխալներին ու վրիպումներին: Նաև հույս ունենալով, որ մարզպետը կփորձի հետևություններ անել ու շտկել իրավիճակը առանձնապես հանրակրթության ոլորտում, սակայն ապարդյուն: Իրեն չի հետաքրքրում ոլորտի խնդիրները՝ ուսումնական հաստատությունների գործունեության լիարժեք ապահովումը, վերահսկումն ու կառավարումը, իրական վիճակի վերլուծությունը, առկա խնդիրների բացահայտումն ու լուծումը: Չի հետաքրքրում, որովհետև չի հասկանում ու պատկերացնում, գնահատում ու կարևորում այն, որի պատճառով էլ շատ կարճ ժամանակում կրեց հերթական խոշոր պարտությունները հենց այս ոլորտում, և կշարունակի կրել, եթե մնա էշի ականջում քնած ու հետևություններ չանի:

1. Երկար փնտրտուքից և չարչարումից հետո ս/թ մայիս սկզբներին գտավ ու կարգեց մարզպետարանի Կրթության, մշակույթի եւ սպորտի վարչության պետ, ըստ իրեն, երազած մարդուն: Թվում էր թե վարչության նոր պետը կկարողանա կոլեկտիվում ստեղծել առողջ, ջերմ ու աշխատանքային մթնոլորտ, միահամուռ ուժերով լուծելու մարզի հանրակրթության խնդիրները: Ցավոք, մթնոլորտը այն աստիճանի լարվածության հասավ, որ վարչության պետը հազիվ էր պաշտոնավարել երկուսուկես ամիս իր դիմումի համաձայն ազատվեց զբաղեցրած պաշտոնից, նույնիսկ չհասցնելով ծանոթանալ կամ տեսնել դպրոցների տնօրններից շատերին: Ըստ օդում կախված լուրերի այս ամենի մեջ ամենամեծ բաժինը կրթության բաժնի պետ Ռ. Նալբանդյանինն է, որի մասին նույնիսկ բարձրաձայնել է պարոն մարզպետը: Նախորդ հրապարակման հերոսներից է նաև այս տիկինը, և այս մասով հետևությունը թողնում ենք մարզպետին, թե ինչու է հանդուրժում նման պաշտոնյային, ո՞ր առավելությունների, կարողությունների կամ էլ հմտությունների համար: Կրթության, մշակույթի եւ սպորտի վարչության ներսում լարվածության մասին խոսում ու քննարկում են մարզպետարանի մյուս վարչություններում ու բաժիններում, նաև տնօրեններից շատերը: 2. Վերջերս՝ 02.07.2020թ պետք է տեղի ունենար Աշտարակի Վ. Պետրոսյանի անվան հիմնական դպրոցի թափուր տեղի մրցույթը: Սակայն դպրոցի մանկավարժական և ծնողական խորհրդի անդամները բոյկոտեցին մրցույթը, չմասնակցելով խորհրդի նիստին, քանի որ հստակ տեղեկություն են ունեցել այն մասին, որ խորհրդի վերը նշված անդամներից մի քանիսի նկատմամբ մարզպետը փորձել է ճնշումներ իրականացնի դպրոցի տնօրենի պաշտոնում իր թեկնածուի հաղթանակը ապահովելու համար: Մրցույթի նիստերը չկայանալու պատճառով տնօրենի թափուր տեղի մրցույթին հայտ ներկայացրած երկու մասնակիցների անձնական գործերը փոխանցել են փոխվարչապետին: Դպրոցի կոլեկտիվի ճնշումների տակ դպրոցի տնօրեն է նշանակվել կոլեկտիվի ներկայացուցիչը, ափին թողնելով մարզպետի հովանավորյալին: Խոսում են, որ մարզպետը այս ամենից հետո դուրս է եկել ափերից և սկսել է ուղիներ փնտրել անցանկալի տնօրենից ազատվելու համար: Օդում կախված լուրերի համաձայն նշանակված տնօրենի և դպրոցի կոլեկտիվի թիկունքին կանգնած է ՀՀ ԱԺ պատգամավոր Ս. Մովսիսյանն ու պատգամավորի օգնական Ա. Գրիգորյանը, վերը նշված դպրոցի շախմատ առարկայի նախկին ուսուցիչը: