ՍԵՐԳԵՅ ԲԱԳՐԱՏՅԱՆԸ ԿԱ°Մ ՆԵՂԱՑԵԼ Է, ԿԱ°Մ ՆՐԱՆ ՍՊԱՌՆԱՑԵԼ ԵՆ

ԱԺ ԲՀԿ-ական պատգամավոր ՍԵՐԳԵՅ ԲԱԳՐԱՏՅԱՆՆ ԱԺ նախագահին ուղղված գրությամբ տեղեկացրել է, որ դուրս է գալիս «Բարգավաճ Հայաստան» խմբակցությունից: Ըստ էության, խորհրդարանում նա կլինի երրորդ պատգամավորն անկախ կարգավիճակում` Տիգրան Ուրիխանյանից եւ Արման Բաբաջանյանից հետո: Միայն թե, Բագրատյանի պարագայում դեռ պարզ չէ` ընդդիմադի՞ր, թե՞ իշխանական դաշտում է շարունակելու իր պատգամավորական գործունեությունը: Այս առումով մի շարք անհանգստություններ եւ հարցեր ունեն նաեւ հենց «Բարգավաճ Հայաստանում», քանի որ ոչ միայն երեկ էր Բագրատյանի հեռախոսն անջատված ու ֆեյսբուքյան էջն ապաակտիվացված, այլ դեռ այն ժամանակվանից, երբ իշխանությունը սկսեց թիրախավորել ԲՀԿ առաջնորդ Գագիկ Ծառուկյանին եւ դատական քրգործեր լցնել ԲՀԿ-ականների գրպանները: Մասնավոր զրույցներում ԲՀԿ-ականները, նույնիսկ Բագրատյանի հետ մտերիմները, պնդում են, որ վերջին շրջանում գրեթե չեն շփվել իր հետ, իսկ խմբակցությունից դուրս գալու լուրն ուղղակի շոկի է ենթարկել իրենց: Սրանով պայմանավորված` անգամ չեն շտապում որակումներ տալ` Բագրատյանի քայլը դավաճանությո՞ւն էր, թե՞ ստեղծված իրավիճակից հնարավոր ելք, օրինակ, իր դեմ քրգործ չհարուցելու դիմաց` այն նույն մեղադրանքով, ինչի համար երկու ամսով կալանավորել են «Ծառուկյան» խմբակցության նախկին պատգամավոր Վանիկ Ասատրյանին, կալանավորել, ապա ազատ են արձակել նախկին պատգամավոր Աբրահամ Մանուկյանին: Սա իհարկե ամենահավանական վարկածն է` հաշվի առնելով նաեւ իշխանական մամուլի ցնծությունը: Սակայն շատերը նաեւ հասկանում են, որ դժվար է անգամ սպառնալիքի ներքո` Սերգեյ Բագրատյանից ստանալ իշխանությանը սպասարկող «Արման Բաբաջանյան-2»: Այս առումով` քաղաքական կուլիսներում ակտիվորեն քննարկվում է նաեւ, որ Բագրատյանը պարզապես նեղսրտած է «Բարգավաճ Հայաստանից» ու Գագիկ Ծառուկյանից` հայտնի «ղազագրերի» պատմության հետ կապված: Մի կողմից` ընտրողների առաջ է ամոթով մնացել, մյուս կողմից` կուսակցության աջակցությունն իր հայտարարության հետ կապված չի եղել: Հիշեցնենք, որ Բագրատյանը հայտարարությամբ էր հանդես եկել, թե համացանցում շրջանառվում են կեղծ տեղեկություններ` իր անձի հետ կապված, իբրեւ թե խոստացել է ԲՀԿ-ի օգտին ձայներ ապահովել ընտրությունների ընթացքում: «Պատասխանատու հայտարարում եմ, որ այդ տեղեկատվությունը չի համապատասխանում իրականությանը: Առաջիկայում դիմելու եմ դատարան...»: Նշենք, որ «Դատալեքս» դատական տեղեկատվական համակարգում նման հայցադիմում դեռեւս չկա:

ՀՐԱՆՏ ՍԱՐԱՖՅԱՆ

Այս թեմայով Ինչպես փաՌատոները վերածվեցին փաՐատոների... Ա՛խ...ամենացավոտ հարցը տվեցիք. Սպորտի լեգենդի վերջին հարցազրույցը Կյանքից հեռացել է «Արարատ-73»-ի ֆուտբոլիստ Սերգեյ Պողոսյանը Նիկո՛լ, սա էլ կանցնի, Մխիթար Գոշի դատաստանով ես դատվելու. քաղաքացի Ի՞նչ է մեզ սպասում Եվրոպայում․ թվեր, որոնք չեն ուզում տեսնել