Կարեւոր է, որ մեր նախագծերը ընկալվեն մեր հայ գործընկերների կողմից,-Հայաստանում Բելառուսի դեսպան Ի․ Նազարուկ

 «Իրավունք»-ը հյուրընկալել էր ՀՀ-ում Բելառուսի Հանրապետության արտակարգ եւ լիազոր դեսպան Իգոր  Նազարուկին, ով ամփոփեց իր աշխատանքի արդյունքները Հայաստանում իր` դիվանագիտական ​​առաքելության ավարտի կապակցությամբ:

Հարցին` ինչպես նա կգնահատի Հայաստանում անցկացրած ժամանակը, դեսպանը նշեց, որ հայկական կողմի հետ  աշխատանքը դրական է ընթացել: «Մենք գտանք փոխըմբռնում շատ հարցերի շուրջ եւ հասանք լավ արդյունքների  Բելառուսի եւ Հայաստանի փոխադարձ շահի համար»,- նշեց  դեսպանը, սակայն ընդգծեց, որ  փոխադարձ ներուժը տարբեր ուղղություններով լիովին չի օգտագործվում:

«Ես կցանկանայի, որ մեր համագործակցությունը հիմնված լինի ընդհանուր կայուն կոոպերատիվ նախագծերի վրա: Մենք պատրաստ ենք առաջարկել համագործակցության մեր տարբերակները: Բայց այստեղ կարեւոր է, որ մեր նախագծերը ընկալվեն մեր հայ գործընկերների կողմից»,- ասաց Նազարուկը:

Նա  գոհունակությամբ հայտնեց, որ Երեւանի քաղաքապետարանի կողմից հայտարարված վերելակների փոխարինման այս տարվա մրցույթը շահել է բելառուսական հավակնորդ «Մագիլեվլիֆտմաշ» ՓԲԸ-ն:

«Մենք մատակարարելու եւ թարմացնելու ենք 500 միավոր, ինչը զգալի ծավալ է»,- նշեց դեսպանը: Ինչպես նաեւ հավելեց, որ նրանք պատրաստ են Երեւանում ստեղծել լիֆտերի արտադրման համատեղ ձեռնարկություն, եթե ​​լինի հայկական կողմի հետաքրքրվածությունը:

Ինչպես նաեւ  պատրաստ են դիտարկել ուղեւորատար ավտոբուսաների համատեղ արտադրության տարբերակը:

Պատասխանելով ներքաղաքական լարվածության մասին հարցին` կապված «Բարգավաճ Հայաստան» կուսակցության առաջնորդ Գագիկ Ծառուկյանի հետ, Նազարուկը նշեց, որ դիվանագետի աշխատանքը արգելում է միջամտել կամ մեկնաբանել երկրի ներքին գործերը:

«Կան իրավասու մարմիններ, որոնք պետք է զբաղվեն բացառապես իրենց գործերով  եւ չխառնվեն քաղաքականությանը: Այստեղ շատ կարեւոր է ցուցաբերել խոհեմություն եւ   զսպվածություն»,- ընդգծեց դեսպանը:

Խոսելով հայ-ադրբեջանական սահմանի լարվածության մասին, դեսպանը կողմերին կոչ արեց փոխել ռազմատենչ հռետորաբանությունը եվ  լռեցնել թնդանոթները: «Անհրաժեշտ է նստել բանակցությունների սեղանի շուրջ եւ կողմերի հաշտեցման հարցը լուծել շարունակական դիվանագիտական ռեժիմով: Հեշտ չէ, երբ բոլորը բորբոքված են, բայց 21-րդ դարը մեր ժողովուրդներին ինչ-որ բան պետք է սովորեցնի: Մենք անընդհատ ապրում ենք ինչ-որ կոնֆլիկտի մեջ: Բայց իրականում մարդկային կյանքը գեղեցիկ է իր արարման մեջ, իսկ պատերազմը կործանիչ է»,-նշեց դեսպանը:

Նազարուկը կիսվեց, որ հեռանալով Հայաստանից, նա կկարոտի մարդկային ջերմությունը:

«Հայերը  շատ բարի մարդիկ են, հյուրընկալ: Մի ժողովուրդ, որը չարակամ չի դառնում` չնայած  որ անցել է տառապանքների, Ցեղասպանության միջով,  ունեցել է տարածքային զրկանքներ»,- ասաց Նազարուկը:

Նա  ցանկություն հայտնեց, որ Հայաստանը դառնա տնտեսապես ուժեղ, որպեսզի հայ-բելառուսական հետագա փոխգործակցությունը երկկողմ ձեւաչափով կամ միջազգային հարթակներում ունենա իր դրական շարունակությունը՝ լինի դա  առեւտրային, կոպերացիոն նախագծերի տեսքով կամ խորհրդարանական հարթությունում:

«Ամեն դեպքում ես բաց եմ համագործակցության, լավ առաջարկների համար՝ մեր կոնտակտները պահպանելու համար»,- ամփոփեց նա:

Զարուհի Բաբուխանյան

Այս թեմայով Վիրավոր իմ Հայաստան, դու դեռ ուղղելու ես քո ողնաշարը Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Թող մեր եռագույնը միշտ հպարտ ծածանվի ազատ և խաղաղ երկնքի տակ Քվեարկողների շատ մեծ հոսք է, հայկական կողմն ապահովում է անվտանգությունը. ՀՀ-ում ՌԴ դեսպան ՇՏԱՊ. 36-ամյա գործարարին մահացած են գտել. Հրապարակ