7.5 բալով չպետք է համալսարան ընդունվեն. Նարինե Դիլբարյան

Այսօր բուհ չընդունված դիմորդները և նրանց ծնողները ԳԹԿ-ի դիմաց բողոքի ակցիա են անցկացրել:

Դիմորդների ծնողները բողոքում էին, որ տեղյակ չեն եղել, որ նախապատվությունը տրվելու է առաջին հայտին, ոչ թե դիմորդի ստացած գնահատականին: Արդյունքում, բարձր գնահատական ստացած դիմորդը ԲՈՒՀ չի ընդունվել: Նրանք նշում էին, որ խնդրի լուծման համար դիմել են ԳԹԿ-ին և ԿԳՄՍ-ին, սակայն դեռ արդյունք չկա: ԳԹԿ ներկայացուցիչը պարզաբանել է, որ այս տարի առաջնահերթությունը տրվել է առաջին հայտով դիմած դիմորդներին: Ստացվում է, որ առաջին հայտը գերակա է մյուս հայտերի նկատմամբ, այդ պատճառով նման իրավիճակ է ստեղծվել: ԳԹԿ ներկայացուցիչը նշել է, որ  չընդունված դիմորդները կարող են մասնակցել լրացուցիչ մրցույթին, սակայն այստեղ թափուր տեղերը շատ չեն:

Այս մասին զրուցեցինք  ԵՊՀ հայ բանասիրության ֆակուլտետի Հայոց լեզվի պատմության ամբիոնի դոցենտ Նարինե Դիլբարյանի հետ:

Մեր այն հարցին, թե ի՞նչ գնահատական կտաք այս ամենին և առհասարակ ինչպե՞ս եք վերաբերվում այն հանգամանքին, երբ 16 ստացող դիմորդը դուրս է մնում բուհից, իսկ 7.5 ստացողն ընդունվում է, Նարինե Դիլբարյանը պատասխանեց հետևյալ կերպ.

- Ըստ ամենայնի, տեղի է ունեցել սխալ հանգուցալուծում, որի հիմքում, ինչպես տեսնում ենք, ԳԹԿ-ն առաջ է մղում մի հիմնադրույթ, այն է, թե  նա, ով սրտանց ցանկացել է դառնալ քաղաքագետ, նշելով առաջին հայտով Միջազգային հարաբերությունների ֆակուլտետը, ապա կապ չունի, թե նա 7.5 է ստացել, թե ավելի վատ: Ըստ ԳԹԿ-ի` տվյալ ուսանողը պետք է գրավի այդ տեղը և վերջ:

Նարինե Դիլբարյանի պնդմամբ` այդ տարիքում մասնագիտություն ընտրելու սրտի թրթիռն այդքան էլ կարևոր հանգամանք չէ:

Ըստ մեր զրուցակցի` առաջին և երկրորդ հայտերով ընտրված մասնագիտությունները հիմնականում լինում են փոխկապակցված և սարերի ու ձորերի տարբերություն, ըստ էության, չկա:

« Օրինակ` միջազգայնագետը շատ լավ պետք է իմանա միջազգային իրավունք ասվածը: Այնպես որ, ասել, թե միջազգային հարաբերություններն ու իրավագիտությունը միանգամայն տարբեր մասնագիտություններ են, ճիշտ չէ:

Մեկ անգամ ևս կրկնում եմ` հարցին տրվել է սխալ հանգուցալուծում, և մտածել, թե առաջին հայտով ընդունված դիմորդը շատ ավելի նվիրված է իր ընտրած մասնագիտությանը, քան նա, ով երկրորդ հայտով է դիմել, շատ սխալ է:

Իմ համոզմամբ, 7.5-ը միավորն այն միավորը չէ, որով պետք է բուհ ընդունվեն: Լավ կլիներ,  գոնե հետագայում այդպես չլիներ:

Եթե մենք ուզում ենք բարձրորակ մասնագետներ ստանալ և ուզում ենք բարձրանա կրթության արդյունքի որակը, ապա եկեք չիջեցնենք այն »: 

Նարինե Դիլբարյանի խոսքով` պետք չէ արդարանալ, թե համավարակ է:

Մեր այն հարցին, թե ԵՊՀ հայ բանասիրության ֆակուլտետի դիմորդների հետ կապված կա՞ արդյոք նման խնդիր, մեր զրուցակիցը պատասխանեց հետևյալը.

- Ո՛չ, մեզ մոտ չկա նման խնդիր, բանասիրականի դիմորդները կարծես հենց միայն բանասիրական ֆակուլտետի համար են դիմել:

Հայկ Գևորգյան 

Այս թեմայով Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար Պետությունը չպետք է քաղաքացու փոխարեն որոշի՝ նրա վիշտը ֆինանսապես «բավարար ծանր» է, թե ոչ ՀՐԱՏԱՊ. ԴՕԿ կուսակցության պատվավոր նախագահ Վարդան Ղուկասյանի հայտնի փաստաբանը հայտարարությամբ է հանդես եկել 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Ունի Հայաստանը գազի այլընտարանք. Մեկնաբանում է տնտեսագետը