Նոր հարվածի վտանգը մեծանալու է անդորրի հաստատումից հետո. Դավիթ Ջամալյան

Այսպիսով, տավուշյան մարտերի ժամանակ հայկական ուժերի վերահսկողության տակ իրոք նոր դիրքեր հայտնվե՞լ են: Ինչո՞ւ թշնամին ակտիվացավ ոչ թե Արցախում, ինչպես միշտ, այլ՝ հայ-ադրբեջանական սահմանին, ի՞նչ մեսիջներ է դա պարունակում: Այս բոլոր հարցերի պատասխանը ստանալու ակնկալիքով զրուցեցինք հայտնի ռազմական փորձագետ ԴԱՎԻԹ ՋԱՄԱԼՅԱՆԻ հետ:

- Պարոն Ջամալյան, ինչո՞վ եք պայմանավորում թշնամու դիվերսիոն փորձը հայ-ադրբեջանական սահմանի ուղղությամբ: Ինչ մեսիջ է այն պարունակում:

- Հակված չեմ այն տեսակետին, թե սա ներքին խնդիրներից ադրբեջանական հանրության ուշադրությունը շեղելու նպատակն ունի: Բանն այն է, որ ձախողվելու դեպքում իրենք միաժամանակյա մեծաթիվ կորուստներ կունենան, ինչը միայն թափ կհաղորդի դժգոհության ալիքին: Իսկ բախում հրահրելու հետեւանքով ձախողվելու հավանականությունը, հատկապես 2016-ի ապրիլից հետո, Բաքվում չեն կարող անտեսել: Այս տարիների փորձը հուշում է, որ թշնամին վախենում է միաժամանակյա մեծաթիվ կորուստներ խոստացող ապակայունացնող պոտենցիալից: Կարծում եմ, որ այս ագրեսիան ունի մեզ վրա բանակցային սեղանի շուրջ ճնշում բանեցնելու եւ զիջումների մղելու նպատակ: Այլ հարց է, որ Բաքվում չէին սպասում, որ հայկական կողմի պատասխանը կլինի այսքան կտրուկ` ընդհուպ հենակետի զբաղեցում: Հայոց բանակն իր բարձունքի վրա է: Անկասկած, սա դաս կլինի Բաքվին, կհասկանան, որ ի պատասխան ագրեսիայի, հայկական կողմը կարող է «հեռուն գնալ», եւ անհամաչափ հարված հասցնել` ընդհուպ  հենակետերի զբաղեցում:

- Պարոն Ջամալյան, ոչ պաշտոնապես, բայց խոսվում է, որ հայկական կողմը դիրք է գրավել, ինչը Դուք եւս հիշատակեցիք: Սակայն մեր պաշտպանական գերատեսչությունը հայտարարել է բացառապես պաշտպանական մարտերի մասին: Ինչպե՞ս է հնարավոր՝ պաշտպանության ժամանակ դիրքի գրավում:

- Ակտիվ պաշտպանության դեպքում` այո: Հայկական կողմն իրեն պետք է իրավունք վերապահի հարվածել այնտեղ, որտեղից վտանգ է բխում մեր խաղաղ բնակչությանը: Եթե ադրբեջանական կողմից մեր ուղղությամբ կրակ է բացվում, ապա գործ ունենք ագրեսիայի դրսեւորման հետ, եւ, ըստ այդմ, տվյալ վտանգի օջախը վերացնելու նպատակով հայկական կողմը պետք է գործի անկաշկանդ, նաեւ անհրաժեշտության դեպքում զբաղեցնելով հակառակորդի հենակետը: Հանդուգն նախաձեռնողականությունը եղել ու լինելու է հակառակորդի հանդեպ վճռորոշ առավելության հասնելու գրավականներից մեկը:

- Ի՞նչ վտանգներ կան արցախա-ադրբեջանական սահմանի ուղղությամբ: Հնարավոր համարո՞ւմ եք, որ թշնամին գնա հետագա էսկալացիայի` մասշտաբային պատերազմի աստիճան: Նաեւ աչքի առաջ ունենալով ապրիլյանի դեպքերը:

- Չեմ կարծում, թե այս պահին թշնամին կհարվածի որեւէ այլ ուղղությամբ, քանզի ակնհայտ է, որ Ադրբեջանի հետ ՀՀ եւ Արցախի սահմանը հայոց զինուժը վերահսկում է աչալրջորեն` պատրաստ լինելով ցանկացած պահի հարված հասցնել՝ հակառակորդի ակտիվությանն ի պատասխան: Կարծում եմ, որ առաջիկա օրերին լարվածությունն աստիճանաբար կնվազի: Իսկ ահա, երբ հարաբերական անդորրը վերահաստատվի, ապա սթափվելով ստացած հարվածից՝ հակառակորդը, անշուշտ, կփորձի փոխհատուցել կրած կորուստներն ու հարվածել հայոց պետությունների հետ սահմանի որեւէ հատվածում: Հետեւաբար, նոր հարվածի վտանգը մեծանալու է հարաբերական անդորրի հաստատումից հետո:

Զրույցը` ԻԼՈՆԱ ԱԶԱՐՅԱՆԻ

Այս թեմայով Արարատում ծեծկռտուքի գործով կալանավորվել է Մասիսի նախկին քաղաքապետ Դավիթ Համբարձումյանի եղբայրը. Armlur Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան CNN. ԱՄՆ-ն քիչ էր մնացել, որ պատերազմ սկսեր Չինաստանի հետ «Դաբրոներ են» տվել Փաշինյանի աշխատակազմի նախկին ղեկավար Հարությունյանը, առողջապահության ոլորտը «վարած-ցանած» նախկին նախարար Արսեն Թորոսյանը, Կոտայքի մարզպետ Ահարոն Սահակյանն ու ՏԿԵ նախարար Դավիթ Խուդաթյանը