Այս խմորը դեռ շատ ջուր է վերցնելու. Իվետա Տոնոյան

Ազգային ժողովը երկրորդ ընթերցմամբ եւ ամբողջությամբ` երեկ ընդունեց իմքայլական պատգամավորներ Վահագն Թեւոսյանի, Մխիթար Հայրապետյանի եւ անկախ պատգամավոր Արման Բաբաջանյանի հեղինակած «Տեսալսողական մեդիայի մասին» օրինագիծը: Հիշեցնենք, որ վերոնշյալ նախագծի հետ կապված ՀՀ-ում ՌԴ դեսպանատան մամուլի ծառայությունը հայտարարություն էր տարածել` մտահոգություն հայտնելով, որ նոր օրենքն ուղղակիորեն կազդի ՀՀ-ում ռուսական հեռուստաալիքների ճակատագրի վրա: Անդրադառնալով վերոնշյալին` «Իրավունքի» հետ զրույցում ԱԺ «Բարգավաճ Հայաստան» խմբակցության պատգամավոր ԻՎԵՏԱ ՏՈՆՈՅԱՆԸ նշեց, որ ոչ միայն ռուսական հեռուստաալիքների մասով, այլեւ գլոբալ առումով այս օրենքի հետ կապված բազմաթիվ խնդրահարույց կետեր կան:

- Անկախ նրանից, որ բազմաթիվ լրագրողական կազմակերպություններ, կոմիտեներ, միություններ արձագանքում էին «Տեսալսողական մեդիայի մասին» օրենսդրական նախաձեռնությունը միջազգային փորձաքննության ուղարկելու անհրաժեշտության մասին, որեւէ կերպ նախաձեռնության հեղինակները չանսացին այդ կոչերին: Ընդ որում` ոլորտի խնդիրներով զբաղվող բավականին լուրջ կառույցներ էին այդ մասին խոսում: Ոլորտում կար օրենսդրության կարգավորման անհրաժեշտություն, եւ հանուն արդարության պետք է նշեմ, որ իսկապես մեծածավալ աշխատանք էր տարվել «Իմ քայլի» պատգամավորների եւ անկախ պատգամավոր Արման Բաբաջանյանի կողմից: Սակայն տրամաբանությունը չեմ հասկանում, թե ինչու էր պետք կիսատ-պռատության պայմաններում, ափալ-թափալության ռեժիմով նման կարեւորագույն օրենսդրական նախաձեռնությունը, առանց միջազգային փորձաքննության, բերել խորհրդարան եւ առաջին ու երկրորդ ընթերցումներով անցկացնել: Իհարկե, նաեւ հեղինակները նշեցին,  որ որոշակի հապճեպության խնդիր կա, մասնավորապես` նոր հեռուստաընկերությունների լիցենզիայի ժամկետների ավարտի հետ կապված:

– Ձեր գնահատմամբ` որո՞նք են օրինագծում տեղ գտած խնդրահարույց կետերը:

– Շատ է գերագնահատվում լիազոր մարմնի` Հեռուստատեսության եւ ռադիոյի հանձնաժողովի դերակատարումը: Բացի այդ, օրինագծում կոնկրետ իրավակարգավորումներ կան լրատվական թողարկումներում ընդամենը 25 տոկոս եթերաժամ հատկացնել յուրաքանչյուր թեմային: Առիթ ունեցել եմ այս մասին խոսելու, որ անկախ ամեն ինչից, որեւէ դեպքում այս հարցը չի կարող սահմանափակումների ենթարկվել: Օրինակ, այս օրերին ունենք սահմանային իրավիճակի լարվածություն կամ նախորդող օրերին համավարակի հետ կապված թեմաներն ավելի մեծ ծավալով լուսաբանելու անհրաժեշտություն կար, այսինքն` որեւէ դեպքում այս իրավակարգավորումը չի կարող աշխատել: Օրենքում, իհարկե, արտակարգ դրության եւ ռազմական դրության հետ կապված իրավակարգավորում կա, սակայն այս դեպքում` երբ ռազմական դրություն հայտարարված չէ, բայց սահմանին կա լարվածություն, եւ ես ինքս` որպես շարքային հեռուստադիտող, տեսնում եմ, որ լրատվական թողարկումները մեծապես անդրադառնում են այդ թեմաներին, ոչ թե շարքային մամուլի ասուլիսներին կամ, այսպես ասած, խոսող գլուխներին: Եվ, ի վերջո, այս օրինագծում կան խնդիրներ`  միջպետական հեռուստաընկեությունների մասով: Իհարկե, նախագծի հեղինակները նշել էին, որ դրանք կառավարությունների միջեւ ձեռք բերվող պայմանավորվածությունների հիմքով են տեղի ունենալու, բայց սպասենք օրենքի կիրարկմանը: Կարծում եմ` այդ ժամանակ առաջ են գալու բազմաթիվ խնդիրներ, ինչի մասին խոսելու հնարավորություն կունենան թե՛ ԶԼՄ-ների ներկայացուցիչներն ու պատասխանատուները, թե՛ լրագրողական կազմակերպությունները:

– Փաստորեն, ռուսական հեռուստաալիքների հետ կապված մտահոգությունն այդպես էլ որեւէ կերպ չի՞ փարատվել:

– Այդ խնդիրներն արդեն օրենքի գործունեության մեջ մտնելուց հետո ջրի երես են դուրս գալու, եւ ինչպես ասում են` այս խմորը դեռ շատ ջուր է վերցնելու:

ՀՐԱՆՏ ՍԱՐԱՖՅԱՆ

Այս թեմայով Իրանում հանդիսավորությամբ նշվել է Հայաստանի Անկախության տոնը Ուկրաինական աղբյուրների տարածել են ռուսական «Գերան-5» հրթիռային անօդաչուի թռիչքի եւ թիրախի խոցման կադրերը (Տեսանյութ) Ռուսական բանակը խորը ճեղքումով է իրականացրել Վելիկիյ Բուռլուկի հյուսիսային թեւում Վիրավոր իմ Հայաստան, դու դեռ ուղղելու ես քո ողնաշարը Թրամփը կրկին պահանջել է, որ Զելենսկին դադարեցնի ռուսական նավթավերամշակման գործարաններին հարվածները. Axios