Մեր զինվորների կյանքի հաշվին Փաշինյանն ու Ալիեւը ուզում են իրենց իշխանությունը երկարաձգել. Գառնիկ Իսագուլյան

ՀՀ անվտանգության խորհրդի նիստում վարչապետ Նիկոլ Փաշինյանը ներկայացրել է ազգային անվտանգության նոր ռազմավարությունը: Այն կազմվել է իշխանափոխությունից հետո` վերջին երկու տարիների ընթացքում եւ փոխարինում է 2007-ին ընդունված հայեցակարգին: Այս եւ մի շարք այլ հարցերի շուրջ «Իրավունքը» պարզեց «Ազգային անվտանգություն» կուսակցության նախագահ ԳԱՌՆԻԿ ԻՍԱԳՈՒԼՅԱՆԻ տեսակետը:

«ՕՐ ԱՌԱՋ ՊԵՏՔ Է ԱՅՍ ԻՇԽԱՆՈՒԹՅԱՆԸ ՀԵՌԱՑՆԵԼ»

– Պարոն Իսագուլյան, ինչո՞վ է տարբերվում ազգային անվտանգության նոր ռազմավարությունը նախորդից:

– Հայաստանի այսօրվա քաղաքական իշխանությունը հասնելու են նրան, որ ոչնչացնեն այն ամենը, ինչ ձեռք է բերվել: Դրա լավագույն օրինակներից մեկն ազգային անվտանգության հայեցակարգն է: Նախորդ հայեցակարգի երրորդ գլուխը կոչվում էր` Լեռնային Ղարաբաղի հանրապետություն: Իսկ այս հայեցակարգի մեջ «Արցախի հանրապետություն» կամ «ԼՂ հանրապետություն» բառակապակցություն չկա: Երբ խոսում են ՀՀ տարածքային ամբողջականության եւ անվտանգության մասին, Արցախի մասին որեւէ ձեւակերպում չկա: Այս հայեցակարգում արդեն Արցախ գոյություն չունի, այն Ադրբեջանի մաս է, կարդացեք եւ ինքներդ կհամոզվեք: Պարզ է, որ Նիկոլը եկել է այդ ամենը տալու, ինչի համար մեկ ձեւ կա` թուլացնել բանակը: Օր առաջ պետք է այս իշխանությանը հեռացնել, քանի դեռ սրանց ձեռքերը բանակին չի հասել: Հայեցակարգի մեջ, որպես ազգային արժեքներ, Հայ Առաքելական Սուրբ եկեղեցու կողքին հավասարապես դնում են կաթողիկե եկեղեցին ու ավետարանականներին: Հարց է առաջանում` ինչո՞ւ օրինակ ոչ իսլամը, չէ՞ որ համշենահայեր ունենք: Բայց` ոչ, նրանք Հայ ավետարանական եկեղեցու անվան տակ, որին 200 տարի առաջ Հայ Առաքելական Սուրբ եկեղեցու կողմից նզովքի է արժանացել, աղանդավորներին բերում եւ դնում են Հայ Առաքելական սուրբ եկեղեցուն հավասար: Այս մարդիկ սատանայապաշտ են, նրանց համար Հայ Առաքելական Սուրբ եկեղեցին, վանող է: Սա այն խաչն է, որից իրենք վախենում են:

– Իսկ ի՞նչ կասեք այս օրերին Տավուշի ուղղությամբ սահմանում ստեղծված եւ արդեն մի քանի օր  չդադարող լարված իրավիճակի մասին:

– Դաժան է, բայց եթե նրանց կապը ձայնագրվում է, ապա վաղը կարող ենք հանդիպել մի իրականության, որ այս իրավիճակը Փաշինյանի եւ Ալիեւի պայմանավորվածության արդյունքում է եղել: Հայաստանում կորոնավիրուսն է միակ միջոցը մնացել, որ իշխանության կողմից անընդհատ շահարկվի, ուստի` իրենց հիմա պետք է սահմանային միջադեպեր, զոհեր: Հետեւաբար, այն, ինչ տեղի է ունենում Հայաստանի եւ Ադրբեջանի ներքաղաքական կյանքերում, ամենեւին չեմ բացառում, որ միջադեպերը պայմանավորված կարող են լինել Փաշինյան-Ալիեւ ամենաբարձր մակարդակով: Վստահ եմ, որ ուղիղ կապը Փաշինյանի եւ Ալիեւի միջեւ պահպանվում է, եւ նրանք մեկը մյուսին «պաս» տալով կարող է երկու պետություններում քաղաքական իրավիճակը վերահսկողության տակ պահելու համար գնան նման սադրանքների:

«ՀՆԱՐԱՎՈՐ Է` ԴԱՎԻԹ ՏՈՆՈՅԱՆԸ ՍՏԻՊՎԱԾ ԼԻՆԻ ՀՐԱԺԱՐԱԿԱՆ ՏԱԼ»

– Ինչո՞վ կբացատրեք Ձեր այդ մտահոգությունը:

– Փաշինյանը կառավարության նիստին հայտարարությամբ հանդես եկավ, որտեղ, կարծես թե, սեւով սպիտակի վրա գրված էր սահմանային իրավիճակի մասին ինչ պետք էր: Բայց երբ զեկուցում էր պաշտպանության նախարարը, այլայլված, սարսափած կամ հոգեկան ծանր վիճակում գտնվող Նիկոլ Փաշինյանը մի տեսակ սկսեց փորձել արդարացնել «բարեկիրթ» Ալիեւին` ասելով, որ գուցե նրանք մոլորվել էին, հրետակոծում էին, որ գային իրենց ՈՒԱԶ-ը տանեին: Իհարկե, պաշտպանության նախարար Դավիթ Տոնոյանի հստակ պատասխանը, որի մեջ կար նաեւ այն, ինչ պետք է լինի պաշտպանության նախարարների խոսքերի մեջ, սթափեցրեց Նիկոլին: Բայց նա, կարծես, չբավարարված մնաց, որովհետեւ ախր, ինքն ու Ալիեւը մի քիչ ուրիշ ձեւով էին պայմանավորվել: Ուղղակի, մտածել էին, որ ասֆալտին են փռում, պատին են ծեփում եւ մինչեւ գործողության դիմելը` պետք է զեկուցեին ու թույլտվություն ստանային Փաշինյանից: Էլ չգիտի, որ ոչ պատերազմական իրավիճակում նա շարքային վարչապետ է, այն էլ` տգետ: Մեր Պաշտպանության նախարարությունը եւ գլխավոր շտաբը գործողությունները կատարել էին, առանց զեկուցելու Նիկոլ Փաշինյանին: Կարծում եմ` այստեղ ինչ-որ բան Փաշինյան-Ալիեւ պայմանավորվածության մեջ չի ստացվել, եւ մեր բանակը ցույց է տվել, որ մեր ոստիկանի նման պատրաստ չէ ենթարկվել տգետ որեւէ մեկի, որը հրամայում է տատիկին ու պապիկին փռել գետնին` թոռների աչքի առաջ, ինչ է թե դիմակ չեն կրում:

– Իսկ ինչպե՞ս կբնութագրեք Աննա Հակոբյան-Մեհրիբան Ալիեւա հայտարարությունները:

– Տիկին Աննա Հակոբյանը փոխանակ իր ամուսնուն ասի` էս ի՞նչ ես անում, չես կարողանում երկիր ղեկավարել, հրաժարական տուր, այս ընթացքում Մեհրիբան Ալիեւայից խաղաղություն է հայցում ու խնդրում է, որ գնա իր հետ Շուշիում մուղամի տակ թեյ խմի: Այսքանից հետո` էլ ինչպե՞ս հավատաս այս իշխանությանը: Չի բացառվում, որ այս ամենն արվում է, որ մեր զինվորների կյանքի հաշվին Փաշինյանն ու Ալիեւը ուզում են իրենց իշխանությունն ուղղակի երկարաձգել: Ի դեպ, եթե այս սադրանքի արդյունքում էլի ունենանք զոհեր, հնարավոր է` պաշտպանության նախարար Դավիթ Տոնոյանը ստիպված լինի հրաժարական տալ, որովհետեւ Նիկոլ Փաշինյանի վերջնական երազանքներից մեկը բանակից պրոֆեսիոնալ կադրերին հանելն է, եւ նրանց տեղը իմքայլականի նշանակելը. օրինակ` Ստյոպիկ Սաֆարյանին, Արման Բաբաջանյանին կամ իր աներձագին:

«ՈՐԵՎԷ ԻՄՔԱՅԼԱԿԱՆԻ ՉԵՄ ԷԼ ՈՒԶՈՒՄ ՃԱՆԱՉԵԼ»

– Կամ էլ ԱԺ «Իմ քայլը» խմբակցության պատգամավոր Քրիստինե Պողոսյանին, քանի որ նա արդեն խորհրդարան է գալիս զինվորական հագուկապով...

– Չեմ ճանաչում իրեն ու որեւէ իմքայլականի չեմ էլ ուզում ճանաչել: Եթե կամուֆլյաժով էր եկել, երեւի, ադրբեջանական է եղել: Պետք է ուշադիր նայեիք` կարո՞ղ է վրան էլ Սաֆարով-մաֆարով գրած լիներ: Կամուֆլյաժ դասալիք Նիկոլն էլ է հագնում: Եթե իրենք էլ իմ նման 1987 թվականից արցախյան ազատամարտի մասնակից լինեին ու առաջին ջոկատը, առաջին զենքերը տեղափոխողներից լինեին, իրավունք կստանային նման հագուստ կրելու: Բայց քանի չեն արել, իրավունք չունեն: Այդ պատգամավորներից շատերը դեռ Արցախում չեն եղել: Իշխանական 88 պատգամավորների, որոնց թվում պատերազմի մասնակից կա, հարցում ենք անցկացրել, ու ոչ ոք չի կարողացել ասել` Արցախում քանի՞ շրջան կա եւ շրջկենտրոնների անունները չեն կարողացել նշել, մինչեւ հիմա տալիս են ադրբեջանական անուններ: Այդ հարցին ոչ ոք ճիշտ չի պատասխանել, ընդ որում` 97 տոկոսն էլ ՀՀ մարզերն ու մարզկենտրոնները չեն իմացել: Այդ մարդիկ երեւի անգամ չգիտեն` Ստեփանակերտ Վրաստանո՞վ են գնում, թե` ինչպես:

– Ինչո՞ւ է այս օրերին լռում Երկրապահ կամավորական միությունը:

– Ամեն մեկին թվում է, որ ինքն էլ կարող է գեներալ Մանվել Գրիգորյան լինել: Բայց Մանվել Գրիգորյան լինելու համար` պետք է նրա ճանապարհն անցած լինես: Նա «կալենդարնի» 7 տարի Արցախում է եղել` 1989 թվականից մինչեւ 1994 թվականի մայիսի հաղթական օրը ու դրանից հետո էլ: Իսկ մնացածի կենսագրությունները, ովքեր այսօր ղեկավարում են այդ կառույցը, չմանրամասնեմ: Դրա համար էլ Գրիգորյան Մանվելին մինչեւ այսօր պատժում են: Արցախի բոլոր հերոսները, քանի Նիկոլը Հայաստանում ղեկավար է, պատժվելու են: Իսկ ԵԿՄ անդամ կդառնան այն մարդիկ, ովքեր ընդհանրապես կապ չունեն կամ ունեն միջանկյալ կապ ազատամարտի հետ:

ՀՐԱՆՏ ՍԱՐԱՖՅԱՆ

Այս թեմայով Բարեկամ հայ ժողովրդին մաղթում եմ բարեկեցություն և բարգավաճում․ Պուտինը ուղերձ է հղել Փաշինյանին Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար Փաշինյանը նպատակ ունի կտրել թաղման նպաստները ՀՐԱՏԱՊ. ԴՕԿ կուսակցության պատվավոր նախագահ Վարդան Ղուկասյանի հայտնի փաստաբանը հայտարարությամբ է հանդես եկել