Տարածաշրջանում կարող է նոր հրդեհ բռնկվել. Հայկ Նահապետյան

Ռազմական փորձագետ, պահեստազորի գնդապետ ՀԱՅԿ ՆԱՀԱՊԵՏՅԱՆԻ գնահատմամբ` հայ-ադրբեջանական սահմանին տեղի ունեցող դեպքերին շատ արագ, օպերատիվ միջազգային արձագանքը մի փոքր տարօրինակ է:

- Մինչ այս պահը` փաստորեն, արձագանքել են ՄԱԿ-ը, ԱՄՆ պետքարտուղարությունը,  ՌԴ ԱԳ նախարարությունը, ՀԱՊԿ-ը, մի քանի անգամ Թուրքիան: Տարօրինակն այն է, որ այսօր աշխարհի տարբեր երկրներում գոյություն ունեցող հակամարտություններում, որոնք նաեւ ռազմական գործողություններով են ուղեկցվում, միջազգային կառույցների կողմից, կարծես թե, նման պայմանավորված կամ ոչ պայմանավորված արձագանք չի եղել: Սա նշանակում է, որ ամենայն հավանականությամբ` կա լուրջ մտահոգություն, որ տարածաշրջանում կարող է նոր հրդեհ բռնկվել:

– Պարոն Նահապետյան, ինչո՞ւ հիմա իրավիճակը թեժացավ սահմանում:

– Այդ բախումների առարկայական պատասխանատուն երկու մարդ է` Ադրբեջանի նախագահը, որի անմիջական հրամաններով է այս ամենը կատարվում եւ ՀՀ վարչապետի աթոռին հանգամանքների բերումով հայտնված Փաշինյան Նիկոլը, որովհետեւ հայտնվելով այդ աթոռին` առաջին հերթին ուղղակիորեն չեղյալ հայտարարեց 2016 թվականի ապրիլյան ռազմական գործողություններից հետո ձեռք բերված Վիեննայի եւ Սանկտ Պետերբուրգի պայմանավորվածությունները: Այդ պայմանավորվածության համաձայն` արցախա-ադրբեջանական սահմաններում դիտարկող սարքեր պետք է տեղադրվեր եւ դիտորդական խմբեր աշխատեին: Ի դեպ, նման մեխանիզմներ բավականին արդյունավետ կիրառվում է Դոնեցկում եւ Լուգանսկում, որտեղ հակամարտող կողմերի միջեւ ռազմական գործողությունները սառեցված են: Մինչդեռ Փաշինյանի վերելակային դիվանագիտության հետեւանքն այն եղավ, որ «կիրթ» Ալիեւն այժմ ռազմական գործողություններ է սկսել ինքնիշխան Հայաստանի Հանրապետության նկատմամբ:

– Հայ-ադրբեջանական սահմանում տեղի ունեցող դեպքերի վերաբերյալ ՀՀ ԱԳ նախարար Մնացականյանի ահազանգից հետո`  ՀԱՊԿ-ը նախ արտահերթ նիստ գումարեց, ապա հետաձգեց այն, իսկ հետո` հայտարարությամբ հանդես եկավ` Երեւանին եւ Բաքվին կոչ անելով անհապաղ վերականգնել հրադադարը` զերծ մնալով որեւէ կողմին դատապարտող կոշտ գնահատական տալուց: Ի՞նչու չարդարացվեցին հույսերը ՀԱՊԿ-ից:

– ՀԱՊԿ-ին չեն դիմել` նշելով, որ Ադրբեջանի կողմից ռազմական ագրեսիա է եղել: Երբ դու օգնություն ես ակնկալում քո ռազմական դաշնակիցներից, պետք է նշես, որ ագրեսիայի փաստ գոյություն ունի: Իսկ ագրեսիան ո՛չ հրետակոծումն է, ո՛չ հրթիռակոծումը, ոչ էլ անգամ դիվերսիոն հետախուզական խմբերը, որոնք մտել են քո տարածք ու հետո հետ են քաշվել: Ագրեսիան այն է, երբ ռազմական ուժը տեխնիկայով եւ մարդկանցով մտնում է քո տարածք եւ խախտում է քո տարածքային ամբողջականությունը: Այդ ժամանակ Հայաստանը կարող է դիմել ՀԱՊԿ-ին` իր տարածքային ամբողջականությունը խախտելու հիմնավորմամբ` ակնկալելով օգնություն: Այս դեպքում` ուղղակի ՀԱՊԿ-ին դիմել են, որպես ի գիտություն, ասելով, որ նման խնդիր կա, եւ Ադրբեջանի կողմից որոշակի պայմանավորվածություններ է խախտում «կիրթ» Ալիեւը:

ՀՐԱՆՏ ՍԱՐԱՖՅԱՆ

Այս թեմայով Գերմանիայի ամերիկյան Շպանգդալեմ ավիաբազայում ռազմական ինքնաթիռ է կործանվել Բաբուխանյանը բարձրացրեց Արցախի օկուպացված քաղաքների հարցը «Ժողովուրդ». Այսօր կորոշեն Հայկ Սարգսյանի ճակատագիրը ԻՀՊԿ. Գերմանիայում կայացած գաղտնի հանդիպման ժամանակ որոշվել է ռազմական գործողություններ ձեռնարկել Իրանի և Եմենի դեմ  Դմիտրի Մեդվեդևը իսկապես վախեցրել է եվրոպացիներին. Ուկրաինական գնդապետ