ԱՆՕԳՈՒՏ ԵՆ ԲԱՆԱԿՑՈՒԹՅՈՒՆՆԵՐՆ ԱԴՐԲԵՋԱՆԱԿԱՆ ԿՈՂՄԻ ՀԵՏ, ՀԱՅԱՍՏԱՆԸ ՊԵՏՔ Է ԲԱՆԱԿՑԻ ՌՈՒՍԱՍՏԱՆԻ ՀԵՏ. ՆՈՐԱՏ ՏԵՐ-ԳՐԻԳՈՐՅԱՆ

Հակառակորդի ակտիվացման, Ալիեւի հոխորտանքների, Արցախի հարցի լուծման հիմնական բանալու մասին «Իրավունքը» զրուցել է 1992-1995թթ. ՀՀ ՊՆ գլխավոր շտաբի պետ, 1993 թ. պաշտպանության նախարարի պաշտոնակատար, Արցախյան պատերազմի հերոս, գեներալ-լեյտենանտ ՆՈՐԱՏ ՏԵՐ-ԳՐԻԳՈՐՅԱՆԻ հետ: Գեներալը, անդրադառնալով Ալիեւի հոխորտանքների եւ թշնամու ակտիվացմանը, նախ նկատեց.

- Ալիեւը մենակ կարողանում է մեծ-մեծ խոսել, օդի մեջ սպառնալ, խոսել Հայաստանը ոչնչացնելու մասին` մոռանալով, որ եթե մեր բանակը ցանկանա, ապա Ադրբեջանն այնպես կոչնչացնենք... Ե՛վ գազախողովակները, ե՛ւ ստրատեգիական նշանակության օբյեկտները, ե՛ւ  երկաթգիծը: Ախր խոսելուց մի բան լավ հասկացեք, պարոն Ալիեւ, ամբողջ աշխարհն է Ձեզ վրա ծիծաղում: Հոխորտալու փոխարեն մտածեք, որ դուք դեռ մեր տարածքները պետք է հետ տաք` Մարտակերտի, Մարտունու հատվածները, Շահումյանի շրջանը: Դրանց ախորժակին նայեք` Զանգեզուրն են ուզում, Երեւանը, Ստեփանակերտը:

- Պարոն գեներալ, Ալիեւը պարբերաբար պատերազմով է սպառնում:

- Պատերազմով սպառնալն Ադրբեջանի պաշտոնական, ավանդական քարոզչությունն է: Անընդհատ խոսում են Հայաստանին մեկուսացնելու, պատերազմ սկսելու մասին, իսկ մենք մեր անօգուտ վերաբերմունքով նպաստում ենք դրան, փոխանակ բացահայտենք եւ ցույց տանք աշխարհին, թե ինչպես է Ադրբեջանը հայկական սահմանները, անկախ պետության սահմանները թիրախավորում: Մենք ոչինչ չենք ասում: Ինչո՞ւ է, ըստ Ձեզ, Ադրբեջանն ատելություն սերմանում իր ժողովրդի շրջանում, որպեսզի ատելությամբ նախապատրաստի ժողովրդին պատերազմի: Բնական է, որ երբ լինի պատերազմ, այդ ոգով դաստիարակված մարդիկ հեշտությամբ կպատերազմեն: Դա ահաբեկչական բանակ է, դա կենդանական ատելություն է քրիստոնյա ժողովրդի՝ Հայաստանի հանդեպ:

- Ո՞րն է, ի վերջո, ըստ Ձեզ, Արցախի լուծման հիմնական բանալին:

- Իհարկե, խաղաղ ճանապարհով հարցի լուծումն է: Իսկ եթե պետք է կոմպրոմիսի գնալ, ապա պետք է նաեւ հայ բնակչությանը վերադարձնել Ադրբեջանի զինված ուժերի կողմից օկուպացված Շահումյանի շրջանը: Երկրորդ. Ղարաբաղի կարգավիճակի որոշումից հետո վերադարձնել 7 շրջաններ բնակիչներին, իհարկե, նրանց, ովքեր կցանկանան վերադառնալ: Չէ՞ որ ժողովուրդը փախել է ադրբեջանական կողմի բացած կրակից եւ գնացել է Ադրբեջանի Հանրապետության իշխանությունների հրամանով: Եվ պատերազմի կանոններով` այդ տարածքները մնացել են Ղարաբաղի բանակի թիկունքում: Եվ նրանք այդ տարածքներն անվտանգության գոտի են սարքել, ինչպես Կյոնիսբերգ-Կալինինգրադում: Անօգուտ են բանակցություններն ադրբեջանական կողմի հետ, որը պատրաստվում է պատերազմի: Հայաստանը պետք է բանակցի Ռուսաստանի հետ, որը ՌԽՍՖՀ-ի իրավահաջորդն է եւ 1921 թվականին Լեռնային Ղարաբաղը հանձնեց  ԱԽՍՀ-ին:  Սա, իմ պատկերացմամբ, միակ ելքն է, որի մասին ես պարբերաբար ասում եմ:

Զրույցը` ԻԼՈՆԱ ԱԶԱՐՅԱՆԻ

Այս թեմայով Անբարոյական մոտեցում է, եթե ՊՆ նախարարը գտնում է, որ բանակի ողբերգական դեպքերում իր մեղքը չկա 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Հայաստանի իշխանությունը ներկայացնողները դավաճանել են մի բուռ հայ ժողովրդին ու մտադիր են ոչնչացնել նրան Գեներալ, մի նեղացեք հայրենիքից, մի հրաժարվեք Հայաստանից. Հայտնի փաստաբանը դիմել ԽՍՀՄ գեներալին Ո՞ւր են կարգալույծ սրբապիղծին հսկող ոստիկաններն ու մյուս ապստամբողները․ Տեր Մանուկ