Ենթադրաբար չեզոքացված ադրբեջանցիներից երկուսը մահացել են 4 տարի առաջ. քաղաքագետ

Արխիվ 16-20 13 Հուլիս, 2020 2:55

Ադրբեջանի պաշտպանության նախարարությունը հուլիսի 12-ին պաշտոնապես հայտարարել էր, որ Թովուզի ուղղությամբ ադրբեջանական բանակը 2 կորուստ եւ 5 վիրավոր ունի։ Ադրբեջանական ԶԼՄ-ներում հրապարակված տեղեկատվության համաձայն, այդ կորուստներից մեկը եղել է ենթասպա Մամեդով Էլշադ Դյոնմեզ օղլուն: Սակայն, անդրադառնալով վերոնշյալին՝ մոսկվաբնակ քաղաքագետ ՄԱՐԻԱՄ ՀՈՎՍԵՓՅԱՆԸ ուշագրավ բացահայտում է արել. «Այս ենթադրաբար չեզոքացված ադրբեջանցիներից մեկը, ըստ էության, արդեն մահացել էր 2016-ին: Այն ժամանակ ներկայացրել են նրան, որպես Զի Հասանով: Համացանցում ադրբեջաներենով բազմաթիվ հոդվածներ կան նրա ընտանիքի պատմության մասին: Միջազգային հանրության ուշադրությունն եմ հրավիրում նման խարդախությունների վրա»:

Ի դեպ, քաղաքագետը նաեւ հրապարակել է Հասանովի 4 տարի առաջ տեղի ունեցած հուղարկավորության արարողության տեսանյութը: Դեռեւս չճշտված տեղեկությունների համաձայն, Ասկեր Համիդով Ռահման Էնվեր օղլին, որին նույնպես ադրբեջանական աղբյուրները ներկայացնում են, որպես հուլիսի 12-ի «զոհ», մահացել է մի քանի տարի առաջ:

Հիշեցնենք, որ ՀՀ պաշտպանության նախարարությունից երեկ նախ տեղեկություն տարածվեց, որ Ադրբեջանի զինված ուժերի զինծառայողներն անհասկանալի պատճառով՝ ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո՝ Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Ժամը՝ 13:45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից եւ կորուստներ կրելով, հետ շպրտվել: Իսկ արդեն ուշ գիշերին ՀՀ ՊՆ մամուլի քարտուղար Շուշան Ստեփանյանը հայտնեց, որ ադրբեջանական կողմը վերսկսել է հրետակոծել մեր նույն դիրքի ուղղությամբ 82 մմ ականանետից եւ տանկից: Միեւնույն ժամանակ, նա տեղեկացրեց, որ Հայկական զինված ուժերը կորուստներ եւ վիրավորներ չունեն։ Իսկ հակառակորդի բոլոր փորձերը թիրախավորվում եւ չեզոքացվում են: